Jeremías 14 - Qheshwa Biblia DC

Waj ch'aki watas jamunanmanta

^1-2 Ch'aki watasrayku Señorqa Jeremiasman parlaykorqa, nerqataj: Judaqa llakiywan waqan, llajtasnenqa llakiypi kashanku, runasnenqa pampaspi mast'alla kashanku; Jerusalén nanaywan qhaparikun.

³ Qhapajkunaqa uywasqasninkuta yakuman kachanku, chaykunataj yaku qochasman rinku, manataj yakuta tarinkuchu, kutipunkutaj ch'usaj p'uyñusniyojlla, ch'aukiyasqas, may p'enqasqastaj umasninkuta qhataykukuspa.

⁴ Chajrata poqochej runas, ch'aukiyasqas rikhurerqanku, p'enqaywan umasninkuta qhataykukuspa, imaraykuchus chay ch'aki jallp'aman mana paramorqachu.

⁵ Chaywampis, chay tarukaspis q'ata uñitasninkuta saqerparinku, mikhunankupaj pastos mana kasqanrayku.

⁶ Chay k'ita burrospis ch'in orqospi wayrata upispa sayakushanku atojkuna jina. Ñawisninkutaj ayphuyaykushanña, mikhunankupaj pasto mana kasqanrayku.

Israelrayku profetaqa qhaparin

⁷ Señor, juchasniykupis ch'ataykuwachuyku, ruway ari sutiyki may jatunchasqa kasqanrayku! Ashkha kutista qanmanta t'aqakorqayku, contraykipi juchallikorqayku.

⁸ Israelpa suyaynin qan kanki, ñak'ariykuna p'unchaykunaspitaj qanqa salvajniyku kanki. Imaraykutaj kay llajtaykupi uj mana rejsisqa runa jina kanki, chayri, imaynatachus uj ñan purejqa uj ch'isillata qheparikun ajinatari?

⁹ Imaraykutaj t'ukusiri runa jina, uj maqanakoj runa manaña yanapayta atinñachu ajinari? Jinapis, Señor, qan chaupiykupi kashanki, tukuy yachanku qampa aylluyki kasqaykuta. Ama saqerakuwaykuchu ari!

¹⁰ Señorqa kayta Israel ayllunmanta parlaspa nerqa: Ujnejmanta ujnejman puriyta kay aylloyqa maytapuni misk'ichikun. Chayrayku, qhawajteyqa mana allimpajchu rijch'awan. Kunan juchasninkumanta yuyarikuspa, paykunamanta cuentata mañasaj.

¹¹ Señorqa niwarqa: Ama majakuwaychu kay aylluy allin kananmanta mañaspaqa.

¹² Ashkha ayunostapis ruwachunku mana uyarisajchu chay mañawasqasninkuta. Apamuchunkupis rikuchikusta, jinataj poqoykunasmanta ofrendasta, manapuni allimpajchu chaykunatapis qhawasaj. Paykunata maqanakupi tukuchisaj, chanta yarqhaywan onqoywan ima.

¹³ Noqataj kuticherqani: Señor, profetasqa aylluykiman nishanku mana maqanakus kananta, nitaj yarqhaypis kananta. Nillankutaj qan wiñaypaj sonqo tiyasqa kayta kay cheqapi paykunaman qonaykita.

¹⁴ Chaypacha Señorqa kutichiwarqa: Chay tukuy imasta profetas sutiypi nishanku chayqa, llullalla. Mana noqaqa chay profetasta kachamunichu, nitaj kamachinichu, ni parlallanipischu paykunawanqa. Chaykunaqa llulla sut'inchaykunas kanku. Chaykunaqa llulla rikuykunasniyoj kanku, ch'aukiyaypi rikuchiykunas kanku, sonqonkoj munasqanman jinalla chaykunataqa jatarichinku. Sonqonkoj yuyasqallanta chay profetasqa willasunkichej.

¹⁵ Noqa Señormin chay profetasman nini, mana noqa kachajtillay sutiypi parlanku chaykunaman, ninkutaj: Mana maqanakus kanqachu, nitaj kay jallp'api yarqhaykunas kanqachu, nispa. Chay profetasqa maqanakupi yarqhaypitaj wañonqanku.

¹⁶ Pismanchus willashanku chay ayllupis maqanakupi, jinallataj yarqhaypi wañonqa, chanta warmisnin, qhari wawasnin, warmi wawasnintintaj. Chay ayasninkutaj Jerusalén callespi wijch'usqas kanqanku, mana pipis paykunata p'ampaykojqa kanqachu. Ajinamanta juchasninkumanta pagachikusaj.

¹⁷ Aylluyman niy kayta: Tuta p'unchay mana sayk'uyta ñawisninkumanta waqaykunas surumuchunku, aylluypa chay jina sinch'i ñak'ariyninmanta, sinch'i nanasqasniyoj kasqanmanta.

¹⁸ Campoman llojsispaqa maqanakupi wañojkunaj ayasninkuta rikuni, llajtaman yaykuspa rikuni runas yarqhaymanta wañushajta. Rikullanitaj profetasta, sacerdotestawan mana rejsisqa llajtasman ripushajta.

Profetaqa Señorman parlallantaj

¹⁹ Señor, Judataqa qhesachasqatapunichu qhesachapunki? Sayk'upunkiñachu Sión llajtamantaqa? Imaraykutaj maqawarqaykuri thañiyta mana atinaykupajri? Suyarqayku allin sonqo tiyasqa tiyakuyta, mana imapis mana allin kajmantaqa jamorqachu. Suyarqayku kausayta, mancharikuyllataj kashan.

²⁰ Señor, juchayoj kasqaykuta yachakuykuña, jinallataj ñaupa tatasniyku juchallikusqankutapis. Contraykipi juchallikorqayku.

²¹ Sutiyki may jatunchasqa kasqanrayku, ama qhesachawaykuchu ari, amataj aylluykita sajra ñawiwan qhawaychu, maypichus may uyarisqa tronoyki kashan chaytaqa, yuyarikuy noqaykuwan tratota ruwasqaykita.

²² Chay juchasapaspa lantisnenqa mayqellampis parachimunmanchu? Cielomanta paraqa payllamantachu paramun? Mana, Señor Diosniyku! Qanllamin kanki parata apachimojqa, qanllamin kay tukuy imastaqa ruwanki; chayrayku qanllapi suyayniykoqa kashan.