Jeremías 13 - Qheshwa Biblia DC

Ismusqa chumpi uj señal

¹ Señor niwarqa: Riy, rantikamuy linomanta awasqa chumpita, ñañu wasaykimantaj chumpiykukuy, amataj yakuwan joq'ochankichu.

² Chay chumpita noqa ranterqani, imaynatachus Señor, kamachiwasqanman jina, chaywantaj chumpiykukorqani.

^3-4 Chaypacha Señorqa watejmanta parlallawarqataj: Chay rantisqayki chumpita, churakushankiña chayta oqharikuy, riytay Eufrates mayuman, chhanka jusk'umantaj pakaykamuy, nispa.

⁵ Rerqani Eufrates mayuman, rispataj pakaykamorqani, imaynatachus Señor kamachiwasqanman jina.

⁶ Chaymanta unayninmantaj Señor nillawarqantaj: Rillaytaj Eufrates mayuman, apamuytaj chay pakaykamuy nerqayki chay chumpita.

⁷ Eufrates mayuman rispataj, mask'arqani maypichus pakaykorqani chay cheqata. Chay chumpitaj allin imusqaña kasqa, manañataj ni imapaj allinchu karqa.

^8-9 Chaypacha Señorqa ujtawan parlamullawarqataj: Kay kikillantataj Judajpatawan, Jerusalempatawan runaykachasqasninkuta chinkachisaj.

¹⁰ Kay sajra aylloyqa kamachisqasniyta mana junt'ayta munanchu. Rumi sonqompa munayninman jinalla rishan. Qhepaman kutiripun waj dioskunata yupaychaj. Chayrayku chay chumpi jina mana imapaj allinchu kanku.

¹¹ Imaynatachus pipis chumpinta ñañu wasanman mat'iykukun, ajinallatataj ruwarqani Israel aylluywan, jinallataj Judá aylluywampis, noqaman sumaj ujchasqas kanankupaj, aylluytaj kanankupaj. Sutiymantataj yachachinankupaj, yupaychasqa, jatunchasqataj kanaypaj. Chaywampis, mana kasuwarqankuchu. Noqa Señormin chayta nini.

Wich'eqa Judapaj uj señal

¹² Nillaytaj paykunaman: Israelpa Señor Diosnenqa nin: Mayqen wich'illapis vinowan junt'a kachun. Israelitastaj kutichisonqanku: Manachu yacharqaykuña mayqen wich'illapis junt'achinaykupaj jina kasqanta?, nispa.

¹³ Qantaj kutichinki: Señorqa nin: Kay jallp'api tukuy tiyakojkunata machaykuchisaj; Davidpa tiyanampi tiyashanku chay reykunatapis, sacerdotesta, profetasta, jinallataj Jerusalempi tukuy tiyakojkunatapis.

¹⁴ Kaymantataj paykunata wich'ista jina phirirasaj, tatasta wawasnintawan. Paykunata mana khuyakuspa mana ujniyojta tukuchisaj. Noqa Señor chayta nini.

Judá apasqa kananmanta

¹⁵ Israelitas Señormin parlan! Ama wapuykachaychejchu, as allinta uyariychej.

¹⁶ Señor Diosniykichejta yupaychaychej, manaraj pay laqhayayta apachimushajtin, manaraj laqhayaj orqopi misk'akushajtiykichej, Manaraj laqhayayman tukuchishajtin, Manchay suyasqaykichej chay k'anchay manaraj tukukapushajtin.

¹⁷ Sichus mana kasuwankichej chayqa, mayta runaykachasqaykichejrayku pakayllapi waqasaj, ñawisniymanta waqaykuna sururenqanku; Señorpa ayllonqa waj llajtaman presos apasqas kashanku.

Reypaj uj willayta Dios apachin

¹⁸ Reyman niy, jinataj maman reinamampis, chay tronoykichejmanta pampallapi uraykuychej. Chay k'achanchakorqankichej chay pillu umaykichejmanta urmanña.

¹⁹ Neguevmanta llajtas muyuykusqasña kanku, ni pi chayninta pasayta atinchu. Tukuynin Judamanta kajkuna presos apasqas karqanku, jallp'ankumanta tukuynin wijch'usqas kaspa.

²⁰ Ñawisniykichejta oqhariychej, qhawariychejtaj imaynatachus wichaynejmanta jamushasqanta. Maypitaj kashan jap'ichikorqayki chay t'aqari, umaykita oqharichishasorqa chayri?

Jallp'anmanta Israel wijch'usqa kananta willakun

²¹ Ima ninkitaj, qan Jerusalén, qampa yachachisqayki runasllawantaj kamachisqa kaspari? Onqoj warmej nanaykunasnin jina jamusonqanku.

²² Sichus qan tapukunki imaraykuchus kay imas qhatirisusqanta chayqa, allinta yachay chay jatun juchasniykirayku kasqanta. Chayraykumin p'achaykita ch'uskisunku, chantá qhesachasorqankutaj.

²³ Uj yana runaqa atinmanchu yurajman tukuyta? Atillanmantajchu chay leopardoqa chay yanasninta qhechukuyta? Qankunapis sajra ruwayman yachasqa kashaspaqa, nillataj allin kajta ruwayta atiwajchejchu.

²⁴ Chayraykumin qankunataqa ch'eqerachisqaykichej, ch'in pampaspi ichhusta wayra apan ajinata.

²⁵ Achaymin qantaqa Israel qhatirinasun karqa. Chanta ruwanasuyta qan kikiykimanta mask'akorqanki. Noqa Señor chayta nini. Qan noqamanta qonqaporqanki, waj mana kaj lantismantaj riporqanki.

²⁶ Noqapis qanta q'alallata sayachisqayki, p'enqayniykita rikhurichisqayki.

²⁷ Qhenchachakuypi purisqasniykita rikuni, chay p'enqayta qhenchachakuypi purisqasniykita, chay millachikuna kajkunata ruwasqasniykita, chay orqospi, jinallataj campospipis. Ay, imachus kanqa qanmanta Jerusalén! Mayk'ajkamataj millay ch'ichi puriykunaspi callenkipuniri?