Jeremías 11 - Qheshwa Biblia DCTratota p'akinku 1-3 Noqa Jeremiasman Señorqa parlamuwarqa, niwarqataj: Israelita ayllukuna, kay tratomanta allinta uyarichunku. Judá ayllumanta runasman, tukuy Jerusalempi tiyakojkunaman ima, niy noqa Señor Israel aylloj Diosnin, pichus kay tratota p'akejta maldicisqayta; 4 kay tratota ruwarqani chay ñaupa tatasninkuwan Egiptomanta orqhomorqani chaypacha. Chay jallp'a paykunapajqa, fierrota unuyachinapaj horno jina karqa. Noqa nerqani: Kasuwaychej, ruwaychejtaj tukuy kamachisusqayta, jinamanta qankuna aylluy kanaykichejpaj, noqataj Diosniykichej kanaypaj. 5 Sichus qankuna kasuwankichej chayqa, noqapis chay ñaupa tatasniykichejman jurarqani qonayta, chayta junt'asaj, maypichus tiyakushankichej chaypi lechepis, misk'ipis yaku jina puririshan, nispa. Noqataj chaypi kuticherqani: Arí, Señor, nispa. 6 Chaypacha Señor niwarqa: Judá llajtaspi kay willayta qhaparimuy, jinallataj Jerusalén callespipis. Niy runasman: Uyariychej imaynatachus kay trato ruwasqapi qelqasqa kasqanta, chantá junt'aychejtaj. 7 Ñaupa tatasniykichejta Egiptomanta orqhomorqani chaypachaqa nerqani kasunawankuta, chaymantapacha kunankamataj k'amillarqanipuni kasunawankuta. 8 Chaywampis mana kasuwarqankuchu, nitaj uyariwarqankuchu, manachayqa k'ullukuyninkuwan, rumi sonqonkoj munayninman jina ruwarqanku, manapuni kamachisqasniyta junt'ayta munarqankuchu; chayrayku jasut'isniyta kachamorqani, chay trato ruwasqaypi nisqayman jina. 9 Señorqa nishallawarqapuni: Judá ayllumanta kajkuna, jinallataj Jerusalempi tiyakojkunapis contraypi oqharikunku. 10 Ñaupa tatasninku juchasta ruwasqallankumantaj kutiykapunku. Paykunaqa mana kasuwarqankuchu. Chayrayku waj dioskunata yupaychaj churakorqanku. Israel, jinataj ñaupa tatasninkuwan tratota ruwasqayta p'akerqanku. 11 Chayrayku, uj ñak'ariyta apachimusaj, chaymantaqa mana ayqeyta atenqankuchu. May jinata yanapata qhaparikamuwajtinkupis manapuni uyarisajchu. Noqa Señor chayta nini. 12 Chaypachataj Judamanta kajkunaqa, Jerusalempi tiyakojkunapis mañakoj renqanku, inciensota q'osñichej kanku chay dioskunasninkumanta. Chaywampis chaykunaqa manapuni chay ñak'ariy p'unchay chayamojtenqa paykunata salvanqankuchu. 13 Judajta tiyan may chhika dioskunasnin llajtasninku chhikallataj. Jerusalempi tiyakojkunataj may chhika altaresta oqharinku Baalman inciensota q'osñichinankupaj, chay llajtapi callesnin chhikallataj. 14 Ajinaqa qan Jeremías, ama chay aylloj khuyayninta mañaychu, ama mañawaychu, nitaj paykunarayku majakuwaychu, imaraykuchus ñak'ariypi rikukuspa mañakuwajtinkupis mana uyarisajchu. 15 Israel, munasqa kausaqeyqa, imatataj mask'an yupaychana wasiypi chay tukuy millay imasta ruwaytawanri? Yuyanchu wira aychasta jaywawasqanwan, ñak'ariykunata paymanta ayqechinayta? Paytaj ayqeyta atinmanchu? 16 Waj tiempopi noqa payta suticharqani ashkha ch'ampa olivo sach'a, k'acha poqoyniyojtaj nispa, kunanrí sinch'i qhon qhonkunaspa chaupimpi laphisninta ruphachisaj, ramasnintataj k'ajllarasaj. 17 Noqa Tukuy Atiyniyoj Señormin plantarqani, paypa contrampi ñak'ariykunas jamunankuta kamacherqani Israelpa, jinataj Judá aylloj juchasta ruwasqanrayku, paykuna phiñachiwanku Baalman inciensota jaywaspa. Jeremiaspa enemigosnin wañuchiyta munanku 18 Señorqa willawarqa enemigosniy ima sajratachus ruwanawankupaj wakichikushasqankuta. Pay ñawisniyta kichariwarqa chay tukuyta rikunaypaj. 19 Noqa ch'inlla kakusharqani, imaynatachus uj corderota wañuchej apanku ajinata, mana yachaspa imatachus contraypi ruwayta munashasqankuta. Nisharqanku: Sach'ata k'utunachej, kunan kallpampi kashajtin; t'iranachej kay pachapi kausajkuna ukhumanta, manaña pipis paymanta ujtawan yuyarikunampaj. 20 Qanrí Tukuy Atiyniyoj Señor, uj cheqan juez kanki; qan rejsinki tukuy runaj sonqonta imaynachus kasqanta. Rikuchiway imaynatachus chay runasta jasut'inki chayta, makisniykiman churamuni noqamanta kaj ruwana imasta. 21-22 Anatotmanta kaj runasman, pikunachus wañunayta munarqanku, kamachiwarqankutaj mana parlanayta Señorpa sutimpi ama wañuchisqa kanaypaj, Tukuy Atiyniyoj Señor nin: Qankunawan pagachikunay kanqa: Wayna kaj runas wañonqanku maqanakupi chaykunaj qhari wawasninku, warmi wawasninkutaj yarqhaywan wañonqanku. 23 Paykunamantarí ni ujllapis qhepakonqachu, imaraykuchus chay p'unchay jamushan, chaypacha tukuy qankunawan pagachikunay kanqa, Anatotmanta kaj runas, qankunaj pataykichejman ñak'ariykunasta apamusaj. |
Qheshwa Biblia DC © Sociedades Bíblicas Unidas, 1986.
United Bible Societies