Isaías 9 - Qheshwa Biblia DC

Diospa ajllasqampa nacekusqan kamachisqantaj

¹ Manaña laqhayayqa kanqachu, pichus kunan llakiypi kashan chaypajqa, imaynatachus Zabulón jallp'aman, chanta Neftalí jallp'amanwan llakiy chayarqa ajina. Kunanqa k'anchaykonqatajmin mar qochaman rej ñantaqa, Jordán mayu chimpata, gentilespa Galilea jallp'ankupi.

² Laqhapi purej runasqa, rikunku jatun k'anchayta; laqhayaypi tiyakoj runasmantaj k'anchaykamun.

³ Señor, qanqa jatun kusiyta apamunki, may jatumpuni kusikuytaqa. Tukuy kusikonqanku cosechapi kusikunku, ajinata; maytapuni kusikonqanku, qhapaj imasta rak'inakuspa kusikunku, ajinata.

⁴ Qan Señorqa phashkaranki yugonkumanta, lijrasninkupi k'aspismanta, sinch'i llakiypi jarap'asqa kayninkumanta ima. Chayta qanqa urmachinki, imaynatachus Madianta urmacherqanki, ajinata.

⁵ Soldadospa sonachinanku zapatos, yawar rara p'achasninku ima, ruphachisqas, q'olachisqastaj kanqanku.

⁶ Uj wawa nacepuwanchejña, Dios uj wawata qowanchej. Chayman qosqa kashan jatun atiy kamachinampaj. Sutisnintaj kaykuna kanqa: Mayta T'ukuna Yuyaychaj, Atiyniyoj Dios, Wiñaypaj Tata, Sonqo tiyachej Rey ima.

⁷ Kamachisqanta, chanta sonqo tiyakuyta qosqampis manapuni tukukonqachu Davidpa reinompi, jinallataj paypa reinompipis. Kamachiynenqa sumaj sayasqa kanqa, cheqa kajpi, maychus kajta ruwaypitaj kunanmantapacha wiñaypajtaj. Kaytaqa Tukuy Atiyniyoj Señormin sinch'i munayninrayku ruwanqa.

Señorqa, Israelpaj k'ajajta phiñakun

⁸ Señorqa Israelman uj willayta apachimorqa, Jacobpa ayllunman.

^9-10 Chaytataj tukuy Efraín runas yachanqanku, tukuy Samariapi tiyakojkuna. Paykunataj may kasqankuta yuyakuspa wapuchaspa nerqanku: Ladrilloschus urmanku chayqa, sumaj ch'eqosqa rumiswanñataj ruwasunchej. Sicómoro k'aspistachus k'uturanku chayqa, cedro sach'astañataj churasunchej.

¹¹ Señorqa manchachikuna enemigosta apachimun. Pay kikin maqanankuta kamachin.

¹² Sirios inti llojsimuynejmanta jamunku, inti yaykuynejmantataj filisteos. Chaykunataj Israeltaqa simi junt'ata mikhuykorqanku. Chaywampis Señorpa phiñakuynenqa manarajpuni thasnukunchu, jasut'inampaj wakichisqallapuni kashan.

¹³ Chay tukuywampis israelitasqa manapuni jasut'ejninkuman kutirerqankuchu, Tukuy Atiyniyoj Señortaqa manapuni mask'arqankuchu.

¹⁴ Chayrayku Señorqa Israel naciompa umanta, chupantawan qholonqa uywata jina, chantá palma sach'ata jina, soqososta jinataj uj p'unchayllapi k'utonqa.

¹⁵ Umaqa niyta munan kuraj runas, kurajkunasninku ima, chupataj niyta munan llullata yachachej profetas.

¹⁶ Chay llajtata kamachejkunaqa ch'aukiyajkuna kanku, kasojkunataj chinkapunku.

¹⁷ Chayrayku Señorqa mana khuyanchu waynasta, nitaj wajcha wawasta, nitaj viudastapis. Tukuyninku sajras kanku, juchasapastaj; tukuyninkutaj parlanku sajra palabrasllata. Chay tukuywampis, Señorpa k'ajaj phiñakuynenqa manarajpuni thasnukunchu, payqa jasut'inampaj makin oqharisqallarajpuni kashan.

¹⁸ Tukuy sajra kajqa nina jina laurarin, imaynatachus nina q'olaykun khishkasta, qhorasta ima, ajinata; chanta imaynatachus uj monteta q'olaykun, q'osñipis chaymanta manchayta llojsimun ajinata.

¹⁹ Tukuy Atiyniyoj Señorpa phiñakuynenqa jallp'ata manchayta kharkatichin, runasqa nina enqhampaj llant'a jina kanku. Runaqa, runa masinta mana khuyanchu, sapa ujtaj mikhunakunku.

²⁰ Sapa uj paña ladomanta mikhonqa, chaywampis yarqhasqallapuni qhepakonqa. Lloq'e kajmanta mikhonqanku, manataj sajsanqankuchu.

²¹ Manasés aylloqa Efraín aylluwan maqanakonqanku, Efraín ayllutaj Manasés aylluwan. Jinashaspalla Judá aylloj contranta sayarinku. Chaywampis, Señorpa k'ajaj phiñakuynenqa manarajpuni thasnukonqachu, makin oqharisqallapuni kashan.