Isaías 65 - Qheshwa Biblia DC

Mana kakusojkuna jasut'ichikunku

¹ Mana tapukuwajkuna mask'awanku; mana mask'awajkuna tariwanku. Noqaj sutiyta mana wajyakojkunaman nerqani: Kaypi kashani, kaypi kashani, nispa.

² Sapa p'unchay chay mana kasukoj runasman makisniyta jaywani; paykunaqa mana cheqan ñantachu purishanku, sajra yuyayninkupi paykunaqa kasushanku.

^3-4 Chay runasqa sapa kuti phiñachillawankupuni, huertaspi uywa wañuchisqasta jaywaspa, ladrillo pataspi inciensota ruphachispa. Chantaqa sepulturaspi, pakaynejman tutasnin rispa, khuchi aychasta mikhuspa, mana mikhuna uywasta ima mankasninkupi chayachispa.

⁵ Sapa ujtaj nin: Maypichus kanaykipi kakullay, ama qayllamuwaychu, imaraykuchus noqa qanmanta aswan llimphu kani. Chaykunaqa q'oshñi jina senqayta k'arachiwanku, tukuy p'unchaynintin nina k'ajaj jina kanku.

⁶ Chaywampis uj qelqasqa noqaj ñaupaqeypi kashan, chaypitaj nishan, manapuni ch'enqa kasajchu, mana chayqa t'inkaykita qopusqayki, mashkhachus pagoyki kashan chayta, nispa.

⁷ Chantá Señorqa nillantaj: Juchasniykichejrayku, ñaupa tatasniykichejpa juchasninrayku ima, paykunaqa orqo puntaspi inciensosta ruphacherqanku, jinallataj loma pataspipis. Chayrayku noqaqa ñaupa juchasniykichejman jina pagota qopusqaykichej. Señorqa chayta nerqa.

Diosqa bendicionesninta qonqa

⁸ Señorqa ajinata nin: Sichus mayqempis ujnin ramampi uvas chhullchuta tarin, nintaj: Ama kaytaqa usuchiychu, chayqa bendicisqa kashan, nispa. Ajinata kamachisniytaqa mana tukuynintachu chinkachisaj.

⁹ Jacobpa mirayninta sayarichisaj. Judá ayllumanta ajllasaj lomasninta chaypi chayaqenkupaj qonaypaj. Chay ajllasqasneyqa chayaqenkupaj jallp'asta jap'ikonqanku. Chaypi kamachisneyqa tiyakonqanku.

¹⁰ Mask'awaj kamachisneyqa ovejasninkuta Sarompi mirachenqanku, wakasninkutataj Acor vallepi.

¹¹ Qankuna Señorta qonqajkunari, ajllakusqay orqota qonqapunkichej, suertesta choqanaykichejpaj mesasta churankichej, mana rejsisqa diosman vinowan ch'allankichej.

¹² Chayrayku, noqapis qankunaman espadata kachaykamusqaykichej. Tukuyniykichej ñak'asojkunaman qonqorikunkichej. Chhikata wajyashajtiy qankunaqa mana uyariwankichejchu. Qankunaqa parlapayashajtiy astawanraj mana uyarej tukunkichej, rikunayta tukuy ima sajrata ruwankichej. Imachus noqaman mana allinchu rijch'awan, chaytapuni qankunaqa ajllakunkichej.

¹³ Chayrayku Señorqa nin: Kamachisneyqa sumajta mikhonqanku, qankunataj yarqhaymanta wañunkichej. Kamachisneyqa sumaj yakusta ujyanqanku, qankunataj yaku ch'akiywan wañunkichej. Kamachisneyqa kusikonqanku, qankunataj p'enqaymanta wañunkichej.

¹⁴ Kamachisneyqa tukuy sonqowan sumajta takirikonqanku, qankunataj sonqo nanayta mana piniyoj jina mayta llakiywan waqankichej.

¹⁵ Sutisniykichejta ajllasqasniyman saqenkichej chay sutista sajrapaj qhawanankupaj. Señorqa qankunata wañurachisonqachej, kamachisniytataj waj mosoj sutiwan sutichasaj.

¹⁶ Pichus kay jallp'a patapi tukuy imayojpis kayta munan chayqa, cheqa kaj Diosmanta jap'in. Pichus jurayta munan chayqa, cheqa kaj Diospa sutimpi juranqa. Qallariymantapacha ima llakiykunaschus karqa chaykunaqa, qonqasqas kanqa. Mana ujtawan rikunaypaj pakasqas kanqanku.

Mosoj janaj pachawan mosoj kay pachawan

¹⁷ Noqaqa mosoj janaj pachata, mosoj kay pachatawan ruwasaj; chay ñaupaj kajkunaqa qonqasqa kanqa, manapuni yuyarillasajpischu.

¹⁸ Qankunaqa maytapuni wiñaypaj kusikunkichej, imastachus ruwarqani chaykunapi. Jerusalenman kusikuyta apamuni, jinallataj chaypi kaj runaspis kusikunankupaj.

¹⁹ Chaypacha Jerusalenwan kusikusaj, chanta ayllusniywan ima. Chay llajtapeqa manaña jayk'ajpis waqajkunata uyarenqankuchu, manataj llakiywan qhaparejtapis.

²⁰ Manaña chaypeqa pisi watasniyoj wañoj wawas kanqachu, nitaj runaspis machuyayta atenqankuchu. Uj wawa wañupojqa pachaj watasniyojllaraj kanqa. Manaraj pachaj watasnimpi wañojpajqa sajrapaj qhawasqa kanqa.

²¹ Chaypi wasista ruwakuspa tiyanqanku. Uva sach'asta wiñachenqanku, poqoynintataj mikhonqanku.

²² Wasistaqa mana waj tuna tiyanampajchu ruwanqanku, jinallataj uvastapis wiñachenqanku mana waj runa mikhunampajchu. Ayllusneyqa sach'as jina kausanqanku. Jinamanta ajllasqasniypis makisninkoj tarpusqasninwan kusikonqanku.

²³ Paykunaqa mana qhasichu llank'anqanku, wawasninkutapis mana juchachasqas kanankupajchu nacechenqanku. Paykuna, chantá wawasninku imaqa Señorpa ajllasqasnin kanku.

²⁴ Paykuna manaraj wajyamushawajtinku noqaqa kutichisajña, manaraj parlayta tukuchishajtinku, imatachus munasqankuta uyarisajña.

²⁵ Atojwan ovejawanqa uj michejniyojlla kanqanku. Leonqa waka jina ichhuta mikhonqa. Katareqa ñut'u jallp'ata mikhonqa. Chay ajllakusqay lomapeqa manaña pipis llakichenqachu, manañataj ñak'arichenqankuchu paykunata, nispa nin Señorqa.