Isaías 64 - Qheshwa Biblia DC

¹ Señor, sichus janaj pachata llik'ispa uraykamuwaj chayqa, qampa ñaupaqeykipi tukuy orqos kharkatinkuman.

² Imaynatachus ninaqa unuyachin, mankapi yakutapis t'impuchin ajinata, enemigosniykiman imaynachus kasqaykita rikuchinaykipaj, qampa ñaupaqeykipi nacionespis kharkatitinankupaj.

³ Maypachachus qanqa ajinata ruwaspa mana jayk'aj rikusqaykuta rikuchiwayku, kayman uraykamuspa chaypacha, tukuy orqos ñaupaqeykipi manchayta kharkatitinku.

⁴ Mana jayk'ajpis chaytaqa uyarerqankuchu, manataj pipis qan jina Diostaqa rikojchu kanku, qampi atienekojkunapaj ajinata ruwapojtaqa.

⁵ Pikunachus qampa nisqaykita cheqanta ruwanku chaykunamanta, qanqa jark'akoj kanki, may purisqankupipis qanmanta yuyarikusoj kanku chaykunamanta ima. Juchallikusqaykumanta qanqa phiñakorqanki; chay juchasniykupi noqaykoqa unay watasta karqayku. Chay juchasniykumanta salvasqas kayta atiykumanchu?

⁶ Tukuyniyku millay ch'ichis kayku, tukuy ima ruwasqaykupis millay ch'ichi thanta jina. Noqaykoqa sach'a laqhes jina t'akakuyku, sajra ruwasqasnillaykutaj wayra jina apawayku.

⁷ Sutiykita oqharejqa mana pipis kanchu, rijch'arispa sutiykimanta yuyarikojpis manallataj kanchu. Chayrayku qanqa uyaykita noqaykumanta pakaykukunki, sajra ruwasqasniykupi qawejta qhawallawayku.

⁸ Kunanqa Señor, qan tatayku kanki. Noqaykoqa t'urulla kayku imaraykuchus qanmin t'urumanta ruwawarqayku. Chayrayku noqaykoqa tukuyniyku makisniykej ruwasqasnin kayku.

⁹ Señor, amaña ari chay jinataqa phiñakuwaykuchu, amataj juchasniykumantaqa yuyarikullaypunichu ari. Tukuyniyku qampa ayllusniyki kayku.

¹⁰ Ajllakusqayki llajtasqa chay jina ch'impacha. Sión llajtaqa ch'impacha, Jerusalempis raqaykunalla kashan.

¹¹ Diosta yupaychaspa kusikuna wasiyku, mayqempichus tatasniyku qanta yupaychasorqanku chayta ninawan ruphaykuchinku. Tukuy ima allin kajta mana ujniyojta chinkarichinku.

¹² Chay jinasta ruwashajtinkupis qanqa Señor ch'inllachu kakunki, manachu ima ninkipis, astawanrajchu llakichiwasqayku?