Isaías 62 - Qheshwa Biblia DC

Jerusalén ujtawan sayarinanmanta

¹ Sión llajtata munakusqayrayku mana ch'inyakusajchu, Jerusalenta munakusqayrayku mana samarikusajchu, cheqanchaynin lliphirimunankama, Salvacionnin k'anchay jina k'anchaykamunankama.

² Chaypacha runasqa cheqanchayniykita rikonqanku, reyespis imaynachus atiyniyki kasqanta rikonqanku. Mosoj sutiwan sutichasqa kanki, chaytataj kikin Señorpuni sutichasonqa.

³ Sumaj pillu jina Señorpa makimpi kanki, k'acha sorteja jina Diosniykej makimpi kanki.

⁴ Manaña jayk'ajpis saqerpayasqa nisonqankuchu, jallp'aykipis manaña ch'in pachachu kanqa, manachayqa kusikuy nispa sutichasonqanku, jallp'aykitataj runayojña nenqanku. Señorpa munakuynin qampi kanqa. Jallp'aykeqa casarasqa jina kanqa.

⁵ Imaynatachus uj waynaqa sipaswan casarakun, ajinallatataj wawasniykeqa jampusonqanku may munakuywan. Imaynatachus qhari warmi kusikunku, ajinata Diosniyki qanwan kusikonqa.

⁶ Jerusalén, perqasniyki patasman qhawajkunata churani. Mana sayk'uspa tuta p'unchay ninkupuni: Señormanta yuyarikojkuna ama sayk'upuychejchu, nispa.

⁷ Jerusalenta sumajta sayarichinankama amapuni saqeychejchu, Señorta yupaychaytapis kay pachapi rikhurichinankama.

⁸ Señorqa paña makimpa atiyninwan juraspa nerqa: Mana jayk'ajpis enemigosniykiman trigoykitaqa mikhuchisajchu, manataj waj runaspis llank'asqayki vinotaqa ujyanqankuchu.

⁹ Mana chayqa pikunachá oqharejkunalla mikhonqanku, Señortataj yupaychanqanku. Wakin pallajkunapis ch'irwaspa ujyanqanku ajllakusqay wasiy patiopi.

¹⁰ Punkusnejta puriychej, llajtaspaj ñanta kicharipuychej, chay ñan t'oqosta khuskachaychej, ñanmanta rumista orqhoychej, tukuy runas rikunankupaj wiphaylatapis pataman oqhariychej.

¹¹ Señorqa tukuy jallp'a patapi kajkunaman nimun: Uyariychej, Siompa ususinman niychej: Salvajniyki t'inkan aparisqa jamushan, imatachus wakichisqantawan oqharisqa.

¹² Nisonqachejtaj ajllasqa runas, Señorpa orqhomusqasnin, nispa. Jerusalentataj nenqa: May munasqa llajta, mana saqerpayasqataj, nispa.