Isaías 61 - Qheshwa Biblia DC

Israel kaj sumaj willaykuna

¹ Señorpa Espíritun noqawan kashan, imaraykuchus Señorpuni noqataqa ajllawan. Sumaj willaykunata wajchasman willanaypaj kachamuwan, llakisqastataj sonqochanaypaj. Kachamuwantaj wata kamachis librasqas kanankuta ninaypaj, jinallataj carcelespi kajkunatapis kacharichinaypaj.

² Señorpa allin watanta willanaypaj, Señor Diosninchej enemigosninman aynita kutichinanta, tukuy llakisqasta sonqochanaypajtaj.

³ Chantá Siompi llakisqa kajkunata kamachinaykupaj, ushphawan pejtusqa kanankutaqa pilluta qosaj Señorta yupaychanankupaj, llakiy p'achawan kanankutaqa, kusiywan p'achallisqa kanankuta; kusisqaslla kanankuta, llakisqas kanankumantaqa. Paykunaqa cheqanchaj sach'as sutichasqas kanqanku. Diospa plantasqasnin, kusikunampaj, nisqas.

⁴ Paykuna sayarichenqanku urmasqa ñaupa wasista, ch'in saqesqa raqaykunasta watejmanta ruwanqanku, may unay thuñisqa llajtasta watejmanta sayarichenqanku, unay saqesqas wasis kashan chaykunatawan.

⁵ Karu llajtayojkuna ovejasniykichejta michenqanku, llank'anasniykichejta llank'anqanku, jinallataj uva chajrasniykichejtapis qhawanqanku.

⁶ Qankunaqa Señorpa sacerdotesnin nisqa kankichej, Diospa kamachisnin nisqataj. Qankunaqa karu llajtasniyojpa kapuyninta mikhunkichej, qhapaj kapuyninkuwantaj kusikunkichej.

⁷ Chay jina p'enqaypi kasqaykichejmanta, chay jina chejnisqa mana allimpaj qhawasqa kasqaykichejmanta, may jina allimpaj qhawasqas kankichej, wiñaypaj kusikuyniyojtaj,

⁸ Noqa Señorqa imapis cheqampuni kananta munani. Suwakojta, runa wañuchejta ima chejnikuni. Chayrayku runaj ruwasqasninman jina t'inkanta qopusaj, paykunawantaj wiñaypaj tratota ruwasaj.

⁹ Israelitaspa mirayninkoqa tukuy nacionespa chaupimpi rejsisqas kanqanku, llajtas chaupipitaj paykunaj mirayninku. Tukuy chayta rikojkunaqa nenqanku: Kaykunaqa Señorpa allimpi qhawasqasnin kanku.

¹⁰ Noqaqa Señorniypi mayta kusikusaj, almaypis mayta Diosniypi kusikonqa, imaraykuchus payqa salvación p'achawan p'achallichiwan, justiciawan qhataykuwan, uj casarakoj runata jina, casarakoj warmita jinataj faluchosninwan sumaj k'achan ch'asqata.

¹¹ Imaynatachus jallp'aqa plantasta wiñachin, jinallataj uj huertapis ima yurastapis mujuchin, ajinata Señorqa cheqan kajta rikhurichimonqa. Jinallataj Señorta yupaychanqanku tukuy nacionespis.