Isaías 59 - Qheshwa Biblia DC

Israelqa juchanta willakun

¹ Señorpa makenqa mana juch'uychu mana salvasunampajqa, manataj ningrimpis joq'ariyapunchu mana uyarinampajqa.

² Qankunaj juchasnillaykichejtaj karunchachisunkichej Diosniykichejmantaqa. Juchasnillaykichejtaj uyanmanta pakasorqachej ama uyarinasuykichejpaj.

³ Qankunaj makisniykichejqa yawarlla kashan, maki dedosniykichejqa jucha ruwayllawan kashan; parlasqaykichejqa llullalla; simiykichejqa juchallata parlan.

⁴ Mana pipis cheqan kajta munajqa kanchu, mana pipis cheqanta cheqanchajqa kanchu. Mana allin kajllaman atienekunku, manakaj imasllata parlankupis. Sajra imasllatapuni yuyanku, juchatataj wachanku.

⁵ Katari runtusta ojllachinku, kusikusi llikhastataj ruwanku. Pichus chay runtusta mikhojqa wañonqa; chay runtusta q'allpirejtinkupis wañuchi katari uñas llojsimonqanku.

⁶ Kusikusi llikhanmanta awasqa p'achaqa churakunapaj mana walejchu, manataj ukhunkutapis jark'anqachu. Chay ruwasqasninkoqa sajrallapuni, chay jina jucha ruwaylla makisninkupeqa kashan.

⁷ Chakisninkoqa sajra ruwanallapaj corren, usqhayta rinku mana juchayojta qhasimanta wañuchinankupaj. Yuyayninkupeqa sajra ruwayllapuni junt'a kashan. Maypichus purisqankupeqa mana allin imasta ruwaspa, may llakiyta saqerparinku.

⁸ Paykunaqa sonqo tiyakuy ñanta mana rejsinkuchu, puriyninkupeqa mana cheqan ruway kanchu; chay ñanninkoqa wist'ulla; chay sajra ñanta rejqa mana sonqo tiyakuyta rejsinchu.

⁹ Kay imas kajtin cheqan ruwayqa noqanchejmanta ayqen, cheqa kajqa mana chayamuwanchejchu. K'anchayta suyanchej, chaywampis laqhalla tiyan; sut'iyamunanta suyaspa laqhallapipuni purinchej.

¹⁰ Perqasta ciegos jina llujchinchej, mana ñawiyojpis kasunman jina tanteaspa purinchej; p'unchaypacha tutapis kanman jina misk'akunchej; laqhayajpi wañusqas jina kashanchej.

¹¹ Tukuyninchej jukumaris jina qhaparinchej; palomas jina uy uy nispa waqanchej; cheqan kajta suyanchej, manataj tarinchejchu. Salvaciompis noqanchejmantaqa karunchakun.

¹² Juchasniykoqa ñaupaqeykipi ashkhaman tukun; juchasnillaykutaj mana allin kasqaykuta ch'ataykuwanku; noqallaykuwampuni juchasniykoqa kashan; yachakuykutaj juchayoj kasqaykuta.

¹³ Chaykunaqa kashan: Oqharikuy, Señorpa contranta llullakuy, Diosninchejmanta t'aqakuy, waj runaj contranta rimay, churanakuy, sonqonchejpi qhasi palabrasta jap'iy. Llulla palabrasta ima sonqonchejpi jap'erqanchej.

¹⁴ Cheqan kaj ruwayqa noqanchejmanta karunchakun, cheqanta ruwayqa noqanchejmanta karupi kashan; cheqan kajqa plazapi misk'akun, maychus kajta ruwaytaj mana jamuyta atinchu.

¹⁵ Cheqan kayqa pachampi sayachisqa, sajra kajmanta t'aqakojrí, wisq'asqa kashan. Chayta rikuspa Señorqa mana allintachu qhawan, cheqanta ruwajqa mana pipis karqachu.

¹⁶ Chaypacha Señorqa repararqa mana uj runallapis allin kasqanta, chaypitaj t'ukorqa mana uj runallapis allinyachej kasqanmanta. Kikin makinwan salvayta qallarerqa, cheqan kaynintaj sumajta sayacherqa.

¹⁷ Cheqan kaywan sumajta p'achallikorqa, salvación monterata umanman churakorqa. Maqanakuna p'achastawan churakorqa. Payllata munayninwan p'achawan jina qhataykukorqa.

¹⁸ Chayta churakorqa sapa uj enemigosninman ruwasqankuman jina qopunampaj. Mayta phiñakuspa enemigosninta jasut'enqa, astawanqa mar qocha cantospi kajkunata.

¹⁹ Inti chinkaykuymantapacha naciones Señorpa sutinta manchachikonqanku, jinallataj inti llojsimuymantapacha k'anchayninta manchachikonqanku. Enemigosqa yaku mayu jina manchayta jamonqanku, Señorpa Espirituntaj bandera jina ñaupaqenkupi contrankupi sayaykonqa.

²⁰ Uj Salvador Sión llajtaman jamonqa, Jacobpa ayllunmanta Señorman kutirikojkunapaj, nispa nin Señorqa.

²¹ Kay tratota paykunawan ruwasaj nin Señorqa. Pataykiman Espirituyta churani, palabrasniytapis simiykiman churallanitaj; chayqa mana simiykimanta llojsenqachu, manallataj wawasniykejmanta, nitaj allchhisniykej siminmantapis. Ajina kunanmantaqa wiñaypaj qankunawan kanqa, ajinata nin Señorqa.