Isaías 58 - Qheshwa Biblia DC

Cheqan kaj ayuno

¹ Ama samarispa atisqaykita qhapariy, pututu jina qhapariy, Jacobpa miraynin aylluyta juchasninmanta k'amiy.

² Sapa p'unchay mask'awanku. Paykuna ñanniyta rejsiyta munanku, cheqanta ruwaj naciompis kanman jina, Diosninkoj kamachisqasninta manapis saqenkumanchu karqa jina. Paykuna cheqan kamachiykunata mañawanku, Diosman qayllaykamuytataj munanku.

³ Imaraykutaj ninkichej: Noqaykoqa ayunayku, qantaj mana qhawariwaykuchu; noqaykoqa sonqoykuta llamp'uyachiyku, qantaj mana uyariwaykuchu, nispari? Qankunaqa ayunashaspa munasqaykichejta ruwankichej, chay p'unchaypipuni peonesniykichejtapis astawan llank'achej tukunkichej.

⁴ Qankunaqa ayunashaspa phiñanakunkichej, maqanakunkichej ima, makiykichejwan mana kajmanta maqankichej. Qankunaqa janaj pachapi uyarichikunaykichejpaj ama kunan jinachu ayunaychej.

⁵ Noqaqa ajinatachu ayunota ruwanaykichejta munarqani, runa llakisqa kasqanta rikuchinan p'unchaypi? Qankunapajqa niytachu munan totora qhora jina k'umuykunata, chayri qhashqa p'achata churakuspa ushpha patapi puñunata? Chaytachu qankunaqa ayuno nispa sutichankichej, Señorpajtaj allin kananta yuyankichej?

⁶ Manachu yachankichej imayna ayunotachus munasqayta? Noqaqa munani sajra kaj watanasta phashkaranaykichejta, yugo watanasta phashkaranaykichejta, llakichisqa kajkunata kacharinaykichejta, yugopi jina watasqa kajkunatapis.

⁷ Munani yarqhasqaswan khuskamanta mikhunaykichejta; wasiykichejman mana wasiyojkunata wajyarinaykichejta; mana p'achayojkunata p'achallichinaykichejta; runa masisniykichejmantapis ama pakakunaykichejta.

⁸ Chanta k'anchayniykeqa sut'iyamushanmampis jina llojsimonqa. Chaypacha nanasqasniykeqa usqhayta thañiranqanku; tukuy imata cheqanta ruwasqasniykipis sut'iman llojsenqanku, Señorpa k'anchaynintaj qhepamanta jark'akusonqa.

⁹ Chaypacha, sichus Señormanta qhaparikunki chayqa, pay uyarisonqa. Ajinata paymanta mañakojtiyki nimusonqa: Kaypi kashani, nispa. Chaypi kanqa wasiykipi manaña chay jina ñak'arichiy kajtin, manaña chejninakuy kajtin, manañataj ch'ichi palabraspis kajtin.

¹⁰ Sichus yarqhasqasman mikhuchinki, ñak'arichisqa runamanchus mikhuchinki chayqa, laqhayajpipis k'anchayniykeqa k'ancharenqa, laqhayayniykeqa chaupi p'unchayman jina tukonqa.

¹¹ Señorqa pusaykachasonqapuni. Ch'in pampaspi sumajta mikhuchisonqa. Tullusniykita sumajta kallpachasonqa. Qanqa sumaj qarpasqa huerta jina kanki, mana jayk'aj ch'akej yaku juturi jina.

¹² Qampa mirayniyki thuñisqa ñaupa raqaykunata watejmanta ruwanqanku; chay ñaupa runaspa ruwasqallanmantaj sayachenqanku; chaymantataj qankunata nisonqachej: Raqaykunata watejmanta sayachejkuna, chaypi tiyakunapaj watejmanta wasichajkuna, nispa.

Samakuna p'unchaymanta

^13-14 Sichus samakuna p'unchaypi mana purinkichu, nitaj ajllakusqay p'unchaypi munayniykita ruwankichu, ninkitaj chay p'unchayqa Señorpa sumaj p'unchaynin kasqanta; chay p'unchaypichus payta yupaychanki, mana imatachus munasqaykita ruwaspa, mana qampa munasqaykita mask'aspa, manataj qampa palabrasnillaykitachu parlaspa kanki chayqa, may kusisqa tarikunki Señorman parlaspa; chay jallp'aj jatuchaj orqosninman noqa wicharichisqayki. Noqa mikhuchisqayki tataykej Jacobpa chayaqen jallp'api. Kaytaqa kikin Señorman nisunki.