Isaías 57 - Qheshwa Biblia DC

Lanti yupaychajkuna juchachasqa

¹ Cheqan kaj runaqa chinkachisqa, mana pipis paymanta yuyarikojqa kanchu. Diosta manchachikoj runasqa wañupunku. Mana pipis paykunamanta dakunchu, imaraykuchus cheqan runaqa orqhosqa kapun.

² Sonqo tiyasqa kayman yaykun; Diospa ñaupaqempi tukuy allinta purejkunaqa wañuypi samarikuyta tarenqanku.

³ Qankuna layqa warmej wawasnin jamuychej kayman. Qankunaqa millay qhencha warmej miraynin.

⁴ Pimantataj qankunaqa alqochakunkichejri? Pejpa contrantataj chhikan chhikanmanta parlankichej, qalluykichejtapis sik'inkichejri? Manachu qankunaqa juchaj wawasnin kankichej, llullakojkunaj miraynin?

⁵ Qankunaqa thansa sach'a uraspi lantisniykichejta yupaychankichej sajra imasta ruwaspa. Qankunaqa vallespi, qaqa jusk'uspi wawasniykichejta rikuchikuta qospa ruphachinkichej.

⁶ Jerusalén valles mayuspi llusk'a rumis qanmanqa chayasunki; arí, chay rumis qampajqa kashan; chay rumisman qanqa vinoswan ch'allanki, chayman rikuchikustapis jaywamunki. Chay imastaqa manachu jasut'isaj?

⁷ Jatuchaj orqo puntaspi qanqa puñunata wakichikamunki, chaykama qanqa wicharinki uywa wañuchisqata jaywanaykipaj.

⁸ Wasi punku wasapi, quejo wasallapi qanqa lantiykita churanki. Ñaupaqeypi q'alakuspa lantiykita yupaychanki. Wicharispataj puñunaykita astawan jatunyachinki, jinaspataj pitachá munakunki chaywan puñuykunki.

⁹ Moloc sutiyoj lantiman sumajta k'achanchakuspa, sumaj q'apashaj jawinaswan jawiykukuspataj rerqanki. Kachasniykita karuman, wañuy cheqakama, kacharqanki.

¹⁰ Chay chhika purisqaykipi qanqa sayk'orqanki, manataj nerqankichu: Manaña atinichu, nispa. Ujtawan makiykipi kallpaqa rikhurillarqataj, chayrayku qan mana llauch'iyarqankichu.

¹¹ Pimantataj qanqa mancharikunki, pitataj manchachikorqanki, ajinata llullakunaykipaj, noqamantataj mana yuyarikunaykipaj, nitaj noqapi yuyanaykipaj? Noqa unayta ch'inlla kajtiychu, qanqa mana manchachikuwarqanki?

¹² Kunanqa noqa sut'inchasaj cheqanta ruwasqasniykita, wakin ruwasqasniyki mana allinchu kajkunatawan.

¹³ Yanapata mañakuspa qhaparejtiyki chay lantiyki librasuchun. Chaywampis paykunata wayralla aparanqa, uj phukuyllapi chaykunaqa chinkarichisqas kanqanku. Pichus noqapi atienekojrí, chay jallp'ata chayaqempaj jap'ikonqa, Santo orqopitaj tiyakonqa.

Diosta jasut'in Israelta, sanoyachintaj

¹⁴ Chaypitaj nenqa: Ñan t'oqosman junt'achiychej; ñanta pichaychej, aylluypa rinan ñanmanta tukuy misk'anasta oqhariychej.

¹⁵ Ajinata nin jatun Diosqa, wiñaypaj tiyakojqa, sutenqa Santo Dios: Noqaqa patapi tiyakuni, Santo cheqaypi. Llamp'u sonqoyojwan, k'umuykukojwan kashani, k'umuykukoj sonqoyojkunata, llakisqakunatawan kusichinaypaj.

¹⁶ Mana wiñaypajchu juchachasqayki, manataj wiñaypajchu phiñakusaj; imaraykuchus espiritoqa ñaupaqeypi urmanman, jinallataj ruwasqasniy kausay samaypis.

¹⁷ Pay sajrata munapayasqanrayku noqaqa phiñakuni, chayrayku paykunata jasut'ini, uyayta pakakuni. Chayta ruwani pay mana kasuspa sajra sonqompa munasqanta ruwaspa purisqanrayku.

¹⁸ Imaynatachus purisqankuta rikuni, chaywampis noqaqa thañichisaj, michisaj, sonqochasaj, paykunata kusichisaj, jinallataj llakiywan waqajkunatapis.

¹⁹ Señorqa nin: Noqa paykunata asirichisaj; karupi kajkunapaj, qayllapi kajkunapajpis sonqo kausay kanqa. Ima nanayninmantapis noqa thañichisaj.

²⁰ Juchasapasqa wayraj qhollchoqeyachisqan mar qocha jina kanku, kayman jaqayman q'opasninta, t'urusninta, phosoqosnintapis wijch'un, ajinata mana allinta kayta atinkuchu.

²¹ Sajra runaspajqa mana sonqo tiyakuy kanchu, nin Señorqa.