Isaías 51 - Qheshwa Biblia DC

Señorqa Jerusalenta sonqochan

¹ Cheqan kajta mask'ajkuna, Señorta mask'ajkuna, uyariwaychej. Qhawariychej ima chhankamantachus ch'eqosqas kasqaykichejta, ima canteramantachus orqhosqa kasqaykichejta.

² Qhawariychej tataykichej Abrahamta, mamaykichej Saratawan. Paykuna manaraj wawasniyoj kashajtinku wajyarqani, ashkha imasta qospataj paytaqa miracherqani.

³ Cheqamanta Sión llajtataqa sonqochasaj, jinallataj ch'in raqaykunasmanta. Ch'aki ch'in jallp'asninta qhallallarichisaj, imaynatachus Señorqa Edén huertata qhallallaricherqa ajinata. Chaypeqa may kusikuy, Diosta yupaychaspa, takiykuna ima kanqa.

⁴ Uyariwaychej llajtas, naciones ima. Noqa uj yachachiyta orqhosaj. Chay cheqan yachachiyneyqa tukuy llajtaspaj k'anchay kanqa.

⁵ Qayllallapiña kashan cheqanchayneyqa, salvacionneyqa llojsimunña, runastaqa atiyniywan kamachisaj. Mar qocha cantospi kajkunaqa noqapi suyanku, atiyniypitaj suyanku.

⁶ Janaj pachata qhawariychej, pampatapis qhawariychej. Janaj pachaqa q'osñi jinalla chinkariponqa, jallp'apis p'acha jinalla thantarparikonqa. Chaypi tiyakojkunapis ch'uspis jina chinkarparenqanku. Noqaj salvacionniyrí wiñaypaj kanqa. Cheqanta ruwasqayqa mana jayk'ajpis chinkankachu.

⁷ Uyariwaychej, cheqan kajta rejsejkuna, yachachiyniyta sonqoykichejpi jap'ejkuna. Ama runaspa rimasusqantaqa manchachikuychejchu, amataj chay jinatapuni rimasqankuraykoqa umphuyaychejchu.

⁸ Paykunaqa tukukonqanku thutaj thutasqan p'acha jina, khuruswan mikhusqa millma jina. Noqaj cheqanchayniyrí wiñaypaj kallanqapuni, salvacionniypis wiñay wiñaynintimpaj kanqa.

⁹ Señorpa makin, rijch'ariy, rijch'ariy ari atiyniykiwan, imaynatachus unay ruwaj kanki jinata rijch'ariy, ñaupa tiempospi jina. Qan Rahabta t'unarparerqanki, chay mar qochapi sierpeta.

¹⁰ Qanqa mar qochata ch'akicherqanki chay chhika ukhu yakuta, chaynintataj ñanta ruwarqanki, chayninta librasqa israelitas chimpanankupaj.

¹¹ Cheqamanta Señorpa orqhomusqasnenqa kutimonqanku, may kusiywan takirispa Sión llajtaman chayamonqanku; kusiyllapipuni kanqanku. Paykunaqa kusikonqanku. Nanaywan, waqaywantaj chinkaponqanku.

¹² Noqa, noqamin kani sonqochajniykeqa. Pitaj qan kanki runata manchachikunaykipajri? Qhora jina wañoj chay runatachu manchachikunki?

¹³ Ruwasojniyki Señortaqa qonqapunkiñachu, janaj pachata qhatatajmanta, jallp'atapis sumajta sayachejmanta? Qanqa tukuy p'unchaynintin manchachikuspallapuni kanki, pichus llakichisuspa, phiñakuspataj chinkachisuyta munarqa chaymanta. Kunan maytaj chay jinata llakichisuspa purej runaj phiñakuyninri?

¹⁴ Carcelpi ñak'arichisqa kajqa usqhayllata kacharisqa kanqa. Nitaj calabozopi wañonqachu, manataj yarqhaymantapis ch'ayñanqachu.

¹⁵ Noqa kani Señor Diosniyki, suteyqa Tukuy Atiyniyoj Señor. Noqa Señormin mar qochataqa aytiykachachini, maytataj qhollchoqeyachini.

¹⁶ Palabrasniyta simiykiman churarqani. Makiypa llanthumpi pakarqayki, janaj pachata aysatataspa, kay jallp'atapis sumajta sayachispa, Sionman nerqani: Qanqa noqaj aylluy kanki, nispa.

¹⁷ Jerusalén, rijch'ariy, rijch'arikuy, sayarikuy; qanqa Señorpa k'ajaj phiñakuyninta kikin makinmanta jap'ispa ujyarqanki. Qanqa machachej Señorpa phiñakuynin copamanta, qhonchuntinta ujyaykorqanki.

¹⁸ Tukuynin wawasniykimanta mana ujllapis pusasunkichu, mana mayqen wawallaykipis makiykimanta aysasunkichu.

¹⁹ Kay iskay llakiykuna qantaqa qhatirisorqa: Llajtaykeqa tukuchisqa ch'impacha saqesqa karqa, runasniykeqa yarqhaywan, espadawantaj wañurachisqas karqanku. Chaypacha pitaj qanta llakiysisunkiri? Pitaj sonqochaykurisunkiri?

²⁰ Wawasniykeqa yarqhaywan llauch'iyaspa tukuy ñan pataspi wijch'urakorqanku. Tojllapi jap'isqa tarukas jina. Señorpa k'ajaj phiñakuyninwan jasut'isqas, Diosniykej k'amisqanwan ima.

²¹ Llakisqa llajta, machasqa, manataj vinowanchu, kayta uyariy:

²² Señor Diosniyki, ayllunta jark'akoj Diosniykeqa ajinata nin: Qhaway, umata muyuchej phiñakuyniywan kaj copayta makiykimanta qhechuykiña; kunanqa manaña jayk'ajpis chay phiñakuyniytaqa ujyankichu.

²³ Chaytataj llakichisunki chaykunamanñataj qosaj, pikunachus pampaman siriykuy, pataykita purinaykupaj, nisunku chaykunaman. Qantaj paykunata kasuspa pampaman sirerqanki, paykunataj pataykita ñanta jina purerqanku.