Isaías 49 - Qheshwa Biblia DC

Israel runaspa k'anchaynin

¹ Mar qocha cantopi kaj llajtas, karupi kaj naciones uyariwaychej: Manaraj naceshajtiy Señorqa wajyawarqa, mamaypa wijsampi kashajtillayraj payqa sutichawarqa.

² Payqa simiyta uj filo espadata jina ruwawarqa, makimpa llanthuyninwan pakaykuwarqa; uj puntayoj flechaman tukuchiwarqa; flecha waqaychanan cajapitaj waqaychawarqa.

³ Niwarqataj: Israel, qanmin kamacheyqa kanki. Qampi noqaqa jatunchakusaj.

⁴ Noqataj nerqani: Qhasi mana kajta llank'ani, qhasillapaj kallpayta tukuchini; cheqamanta chayaqeyqa Diosniypa ñaupaqempi kashan, t'inkaytaj Diosniywan kashan.

⁵ Kunanqa Señor nin, pichus mamaypa wijsanmantapacha kamachimpaj ajllakuwarqa chay, Jacobpa ayllunta payman kutirichinaypaj, paywan ujlla kanankupaj. Noqaqa Señorniypa ñaupaqempi allimpaj qhawasqa kasaj, Diosnillaytaj kallpaypis kanqa.

⁶ Chanta payqa niwarqa: Kamachillay kanaykeqa mana allinchu, Jacobpa ayllusninta kutirichimunallaykipajqa, Israelmanta puchojkunata kutirichimunallaykipajqa. Astawampis nacionespa k'anchaynin kanaykipaj churayki, salvacionniyta apanaykipaj, karu jallp'aspi kajkunasnintinman.

⁷ Israelpa Santo Diosnin, salvaj Señorqa, sinch'i qhesachasqa llajtanman, waj llajtaspa chejnikusqan llajtaman, ñak'arichejkunaj kamachinman, kay jinata nin: Reykuna, kurajkunawan qanta rikususpa, qonqorikuspa Diosta yupaychanqanku, imaraykuchus Israelpa Diosnin noqa Señor, qanta ajllarqayki, imatachus nisqaytataj junt'anipuni.

Dios nin Jerusalenta watejmanta sayarichinanta

⁸ Señorqa nin: Khuyakuy p'unchaypi uyarerqayki, salvación p'unchaypitaj yanaparqayki, noqa waqaycharqayki, qannejta uj tratota tukuy aylluywan ruwasaj, chay llajtata watejmanta sayarichinaykipaj, saqerpayasqa jallp'asta watejmanta rak'iranaykipaj;

⁹ wisq'asqa kajkunaman ninaykipaj: Qankunaqa llojsimuychej, nispa. Laqhapi kajkunatapis: K'anchayman llojsimuychej, nispa. Tukuy ñankunapi uywasninkupaj pasto kanqa, jinallataj may orqospipis kallanqapuni mikhunaqa.

¹⁰ Mana yarqhachikonqankuchu nitaj ch'akichikonqankuchu, manataj q'oñipis, intipis llakichenqachu; imaraykuchus munakuyniywan paykunata pusaykachanqa, maykunamantachus yaku phullchimushan chaykunaman.

¹¹ Orqosnejta jatun ñankunasta kichasaj. Chay ñankunasqa sumaj pichasqas kanqanku.

¹² Kaykunaqa karumanta jamunku, jaqaykunataj patanejmanta jamunku, wakintaj inti yaykuymanta, wakintaj Asuán jallp'asmanta jamunku.

¹³ Janaj pacha kusiywan takiy ari; jallp'a mayta kusikuy. Qankunapis, orqos, kusiywan qhapariychej: Señorqa ayllunta sonqochan; llakisqa llajtanmanta khuyakun.

¹⁴ Sión llajtataj nerqa: Señorqa saqerpariwan, Señorqa noqata qonqarpariwan, nispa.

¹⁵ Uj warmeqa wawitanta qonqarparinmanchu? Wijsanmanta llojsej wawanta manachu munakunman? Pay qonqapunman chaypis, noqaqa ni jayk'aj qonqasqaykichu.

¹⁶ Makiypi qelqasqata jap'iyki, muyuyniykipi kaj perqasniykitapis qhawashanipuni.

¹⁷ Llajtaykita watejmanta sayachejkuna usqhayllata chayamonqanku, chay tukuy imasniykita chinkachejkuna, urmachejkunawanqa ripunku.

¹⁸ Umaykita oqharispa muyuyniykita qhawariy; runasniyki tukuynejmanta tantaykukuspa jamusunku. Señorqa nin: Noqa kausayniyrayku nini. Chay tukuyninkuwan qanqa novia p'achaswan jina sumajta p'achallikunki, chaykunawantaj sumaj k'achanchasqa kanki.

¹⁹ Llajtaykeqa thuñispa chinkachisqa, ch'impacha. Kunantaj jallp'aykeqa kutimoj runasniykipaj pisi kanqa. Urmachisojkunataj karuman ayqenku.

²⁰ Wajcha wawasniykipis nisonqanku: Kay jallp'asqa ancha pisi noqaykupajqa, qanqa suchuriy ari, noqa chaypi tiyakusaj, nispa.

²¹ Qantaj sonqoykipi ninki: Pitaj kay wawasta yumapuwarqari? Noqajtaqa manapuni wawasniy karqachu, noqatarí sapayta saqewarqanku. Pitaj kaykunata uywanman karqari? Noqataqa sapayta wijch'umuwarqanku. Chaykama kaykunaqa maypitaj kankuman karqari?

²² Ajinata Señorqa nin: Noqa makiyta oqharispa nacionesta kamachisaj, chay runaspaj uj señasta ruwasaj banderata oqharispa; paykunataj qhari wawasniykita, warmi wawasniykitapis makisninkupi marq'ampusonqanku.

²³ Reyqa kanqanku uywaqe tatayki jina, reinapis mamayki jina. Paykunaqa pampaman umankuta chayachinankukama qanman qonqorikusonqanku, chakisniykipi jallp'as kajtapis qallunkuwan llajwasonqanku. Ajinapi qanqa yachanki noqa Señor kasqayta, noqapi atienekuwajkunaqa mana jayk'ajpis p'enqaypi rikhurerqankuchu.

²⁴ Kallpasapa soldadomanta imatachus qhechusqanta qhechuyta atisunmanchu? Uj jap'isqa runaqa, presochajninmanta ayqekuyta atinmanchu?

²⁵ Señortaj nin: Cheqamanta jap'isqa runaqa chay jina kallpayoj soldadoj makinmanta qhechusqa kanqa; uj jap'isqapis uj sujsojkiri runaj makinmanta qhechusqa kanqa. Noqa kutichisaj, quejasojniykiwan yachanakusaj, noqa kikiytaj wawasniykitaqa qhechumpusqayki.

²⁶ Chay ñak'arichisojkunaman kikin aychallankutataj mikhuchisaj; yawarnillankuwantaj vinowan jina machachisaj. Ajinamanta tukuy runas yachanqanku noqa Señor Salvadorniyki kasqayta, Jacobta kallpachaj salvajniyki kasqaytataj.