Isaías 46 - Qheshwa Biblia DC

Belpa urmaynin

¹ Bel diosqa urman, Nebo diospis pampaman wijch'usqa kashan. Lantisninkoqa mulaspi chajnasqas rinku llasa q'epis jina, sayk'usqa burroswampis apachishawajchej jina.

² Chay dioskunaqa p'enqaywan wijch'ukunku, manataj salvakuytapis atinkuchu. Paykuna kikinku apachisqas, wijch'usqastaj kanku.

³ Uyariwaychej Jacobpa miraynin, tukuy israelitasmanta puchojkuna ima. Manaraj naceshajtiykichej noqa qankunataqa apamorqaykichej. Mamaykichej wijsanmantapacha sumaj apaykachasqas karqankichej.

⁴ Machuyanaykichejkama noqaqa kikillampuni kasaj, yuraj chujchallaña kanaykichejkama apaykachasqaykichej. Noqa qankunataqa ruwarqaykichej, noqallataj pusaykachasqaykichej, tukuy imamanta qhawasqaykichej, orqhosqaykichejtaj.

⁵ Pimantaj rijch'achiwankichej; noqa jinaqa pitaj kanmanri?

⁶ Paykunaqa wayaqasninkumanta qorita orqhonku, qolqeta pesaspi aysanku, chaymantataj lantita ruwajta wajyachinku, ruwachinkutaj, jinaspataj chay ruwasqa diosman qonqorikuytawan yupaychanku.

⁷ Lijrariykukuytawan apanku, maypichus kananmantaj churanku. Chaypitaj mana kuyurispa kakullan. Paymanta qhaparikunku, manataj uyarinchu, nirajtaj llakiyninkumantapis libranchu.

⁸ Chaymanta yuyarikuspa p'enqarikuychej ari; yuyayniykichejman tukuspa allinta unanchakuychej ari.

⁹ Yuyarikuychej ari ñaupamantapacha imaschus kasqanta. Noqalla Diosqa kani. Noqamanta astawan waj mana kanchu, manataj kanchu ujllapis noqaman rijch'akojqa.

¹⁰ Qallariymantapacha qhepaman imaschus kananmanta willani. Noqaqa unaymantapacha willani manaraj imapis kashajtin. Noqaqa nini: Noqaj nisqayqa wiñaypaj kanqa. Imatachá munasqayta noqaqa ruwasaj.

¹¹ Inti llojsimunanmantapacha aycha mikhoj p'isqosta wajyani; karu jallp'amantapacha uj runatapis wajyani pipichus yuyasqayta. Imatachus nisqayta noqaqa chayachimunay tiyan. Imatachus yuyasqaytapis ruwanaypuni tiyan.

¹² Uyariwaychej rumi sonqo runas, cheqan kajmanta karupi kajkuna.

¹³ Noqaqa cheqanchayniyta qayllachimusaj. Mana karunchakonqachu, salvacionniypis mana kikimpichu sayanqa. Sionman noqaqa salvacionniyta churasaj, atiyniytaj israelitaswan kallanqapuni.