Isaías 44 - Qheshwa Biblia DC

Señorlla Diosqa

¹ Kunanqa Jacobpa ayllun Israel, ajllakusqay kamachíy, uyariway ari.

² Noqa ruwasoj Diosniyki kani. Manaraj naceshajtiyki ruwarqayki, yanaparqaykitaj. Ama manchachikuychu kamachíy, Jacob, Jesurún. Qanta noqaqa kamachiypaj ajllakorqayki.

³ Noqaqa ch'aki pampaspi yakuta phullchichisaj. Ch'aki jallp'aspipis yakuta puririchisaj. Mirayniykiman Espirituyta apachimusaj. Allin imastataj apachimusaj.

⁴ Mirayniykeqa mayu cantopi qhoras chaupipi sauces q'erqemunku jinata wiñanqanku.

⁵ Chaypacha sapa uj nenqanku: Noqaqa Señorpata kani, ujtaj nenqa: Noqaqa Jacobpa m irayninmanta kani, nispa. Ujnin kajtaj makinwan qhelqanqa, noqaqa Señorpata kani, apellidontataj Israelta churakonqa.

⁶ Tukuy Atiyniyoj Señorqa, Israelta salvaj reyqa ajinata nin: Noqamin kani qallariytaj tukukuytaj. Noqamanta astawan waj diosqa mana kanchu.

⁷ Pitaj noqa jina kanmanri? Parlachun rikuchichuntaj ñaupaqeypi. Pitaj jamoj imasmanta ñaupajta willarqa, jinallataj qhepaman imaschus pasananmantari?

⁸ Qankunaqa ama iskayrayaychejchu, amataj manchachikuychejchu. Noqaqa unaymantapachaña uyaricherqaykichej, nerqaykichejtaj imachus kananta. Chaymanta qankunaqa mana llullakuwajchejchu. Noqamanta astawan waj diosqa manapuni kanchu; mana waj pakakunaqa kanchu; manapuni pitapis rejsinichu.

Lanti yupaychayqa yanqhalla

⁹ Tukuy lantista, ruwajkunaqa qhasi manakaj kanku. May chhika k'achitu ruwasqasninkupis qhasi manakajlla. Paykuna kikinku yachanku chay ruwasqasninkoqa qhasi mana kajlla kasqanta, chay lantisqa mana rikusqankuta manataj unanchasqankuta.

¹⁰ Pichus jich'aspa lantista dios nispa ruwajqa, qhasi manakajllata tiemponta usuchin.

¹¹ Tukuy chay lantista yupaychajkunaqa p'enqaypi rikhurenqanku, imaraykuchus chaykunataqa runaslla ruwanku. Chay runasqa tukuyninku cheqanchasqa kanankupaj tantakonqanku. Chaypi manchariywan may p'enqaypi rikhurenqanku.

¹² Uj herreroqa fierrota ninapi q'oñichispa, martillowan wajtaspa munasqanman tukuy kallpanwan q'ewin. Chaymantataj yarqhachikun, kallpampis pisiyan. Mana yakullatapis ujyaspaqa llauch'iyan.

¹³ Lanti ruwajpis carpinteropis reglata jap'iytawan lapizwan rayan. Chaymantataj compaswan rayaytawan cepillayta qhallarin. Chay jinamanta lantitaqa runaman rijch'akojta k'achituta ruwan. Chaymantataj uj yupaychana wasiman sayachimun.

¹⁴ Uj runaqa cedro sach'asta, cipresta encinas nisqa sach'astawan k'utun monte ukhupi wiñajkunata. Chaymantataj pinosta plantan. Chaykunataj parawan wiñanku.

¹⁵ Chaywan runaqa ninata enqhakun, chaywan q'oñikun; chaywan hornopipis t'antata chayachikun. Chay k'aspillamantataj uj diostapis ruwaspa yupaychakun. Chay sach'asllamantataj uj lantita ruwaspa tukuy sonqo chayman qonqorikun.

¹⁶ Wakin llant'atataj ninaman enqhanku, chay nina k'ajajpi aychata kankaspataj sajsanankama mikhun. Chayllapitaj q'oñikun, nintaj: Aj, sumajta q'oñirakuni, ninata sumajta k'ajarejtapis rikuni.

¹⁷ Chay puchoj llant'amantataj uj lantita ruwakun, chaypa ñaupaqenman qonqoriykukuspataj yupaychan. Mañakuntaj: Libraway ari, imaraykuchus qanqa diosniy kanki, nispa.

¹⁸ Chay runasqa mana yachankuchu, manataj unanchankuchu imatachus ruwashasqankuta, imaraykuchus qhawaykachashaj ciegos kanku, manataj yuyayninkupipis imachus kasqanta jap'inkuchu.

¹⁹ Chay runasqa manapuni reparakunkuchu, mana paykuna kikinkumanta unanchakunkuchu, nitaj ninkuchu: Kay llant'amanta wakintaqa ninaman enqhaykuni, chay nina k'ajajpitaj t'antata chayachini, chayllapitaj aychatapis kankani mikhunaypaj. Chay puchojmantaqa uj millachikunata ruwani. Uj k'ulloj ñaupaqempitaj qonqorikuni, nispa.

²⁰ Cheqamanta chayqa ushphata mikhoj jinamin; chayqa llulla yuyajkunawan ch'aukiyachikuymin. Chayrayku chay runaqa almanta mana salvanchu, nitaj ninchu: Manachu paña makiypi kajqa lullalla?, nispa.

Señorqa israelitasta salvan

²¹ Jacobpa ayllun Israel, yuyarikuy kay imasmanta, noqa ruwasusqayta, kamachiytaj kasqaykita. Israel, noqamantaqa ama qonqapuwaychu.

²² Noqa juchasniykitaqa uj phuyuta jina chinkarichini, mana kasukusqaykitataj urphuta jina. Noqaman kutirimuy, noqamin qantaqa salvarqayki.

²³ Janaj pachaqa, kusiywan takiy, imaraykuchus kaytaqa Señor ruwan. Jallp'aj ukhusnin kusiywan qhapariychej. Qankuna orqos, montes, chaypi kaj tukuy sach'as ima kusikuywan takiychej. Señorqa atiyninta rikucherqa Jacobpa ayllun israelitasta salvaspa.

²⁴ Manaraj naceshajtiyki ruwasoj salvajniyki Señorqa ajinata nin: Noqa, tukuy imata ruwaj Señorqa kani. Noqa cielota qhatatatani, jallp'atapis sumajta sayachini ni pejpa yanapasqan.

²⁵ Llullakojkunaj señalesninkuta pantachini, layqastapis t'ojpichini, yachayninkutapis mana kajman tukuchini.

²⁶ Kamachisniypa palabrasninta sut'iman orqhoni. Chay kachasqasniypa yuyasqankuta sut'iman orqhoni. Chaymantaqa noqa nini Jerusalenqa runa junt'ayoj kananta. Jinallataj Judá jallp'aj llajtasnimpis, watejmanta ruwasqas kanqanku, urmasqa raqaykunasninkutapis watejmanta sayarichisaj.

²⁷ Noqa nini mar qocha ch'akinanta, mayuspis mana yakusniyoj kananta.

²⁸ Kamachej Cirotapis nini: Qanqa michejniy kanki, qanqa ruwanki imatachá munasqayta, nispa. Jerusalentapis nillanitaj: Qanqa watejmanta ruwasqa kanki. Diospa wasintapis nillanitaj: Qantapis watejmanta sayachisonqanku, nispa.