Isaías 42 - Qheshwa Biblia DC

Señorpa kamachin

¹ Qhawariy kamachiyta. Payta noqaqa sayachini, payqa noqaj ajllasqay. Paypi noqaqa kusikuni. Payman Espirituyta churani, tukuy nacionespaj cheqan kajta apamunampaj.

² Payqa mana qhaparenqachu, nitaj jatunmanta parlanqachu, manataj callespipis qhaparenqachu.

³ Lajrasqa soqosota mana p'akenqachu, nitaj ñak'ayllata larwashaj mecherotapis wañuchenqachu. Cheqan sonqowan cheqan kajta ruwanqa.

⁴ Payqa mana sayk'onqachu, nitaj iskayrayanqachu, kay jallp'a patapi cheqan kajta sayachinankama. Mar qocha cantospi kajkunaqa paypa yachachisqasnimpi suyanqanku.

⁵ Pichus janaj pachata ruwaj, jatunman aysajtaj, kay jallp'ata ruwaj, chaypi poqojkunata ima; chay jallp'a patapi tiyaj runasman kausayta qoj; pichus chay jallp'api purejman samayta qoj, Señor Diosqa ajinata nin:

⁶ Noqa Señorqa qanta wajyayki. Makiykimanta mana kacharisqaykichu. Noqa qantaqa waqaychasqayki. Qanqa runaswan trato ruwanay kanki, tukuy nacionespa k'anchaynintaj.

⁷ Noqa wajyayki ciegosta qhawarichinaykipaj, carcelpi kajkunata orqhomunaykipaj, laqhayaj wasipi jap'isqa tiyajkunata sut'iman orqhomunaykipaj.

⁸ Noqaj suteyqa Señor. Wajkunamanqa mana atiyniyta qosajchu; nitaj yupaychasqa kayniytapis lantismanqa qosajchu.

⁹ Ñaupajmanta willasqasniy imaynatachus tukuynin junt'akusqanta; kunantaj mosoj imasta willashani. Manaraj sut'iman llojsishajtin noqaqa willasqaykichej.

Kusiywan takina

¹⁰ Uj mosoj takiyta Señorman takiychej. Tukuynin jallp'aj tukukuyninmantapacha payta yupaychaychej, mar qochapi purejkuna, chay qochapi animales kajkuna ima, qocha chaupipi kaj churu llajtas, chay llajtaspi tiyakojkuna ima.

¹¹ Ch'in pampas, chaypi kaj llajtas ima jatunmanta takiychej, Cedar jallp'aj ranchosnin ima. Selapi tiyakojkunapis kusiywan takiychej. Tukuy orqo puntasmanta may kusiywan uj sonqo kausayta takirimuychej.

¹² Señorta kusichiychej, tukuy mar qocha canto llajtas kusiywan yupaychaychej.

¹³ Señorqa atipaj runa jina rikhurimonqa, ch'ajwapi maqanakoj runa jina phiñakonqa, jatunmanta manchayta qhaparispa enemigosninta atipanampaj.

¹⁴ Señorqa nin: Unayña noqaqa ch'inyapuni. Ch'inllamanta uyarini sonqoyta ñit'iykuspa. Kunantaj qhaparinay tiyan uj onqokushaj warmi jina. Jeq'eqaspa ñak'ayllataña samani.

¹⁵ Orqosta lomasta ima urmarachisaj. Tukuy qhoras kajta ch'akirachisaj. Mayusta yaku qochasman tukuchisaj. Yaku tantakunasta ch'akirachisaj.

¹⁶ Ciegosta pusasaj mana rikusqanku ñanta, mana rikusqanku chaki ñankunasninta purichisaj. Ñaupaqenkupi laqhayayta k'anchayman tukuchisaj. Mana puriy atina kajtapis pampaman tukuchisaj. Kay imasta noqaqa ruwasaj, mana saqeraspa.

¹⁷ Pikunachus lantispi atienekojkunaqa p'enqaypi rikhurenqanku. Chay jich'asqa lantista, diosniyku kankichej nejkunaqa.

Israelqa mana wananchu

¹⁸ Joq'aras, uyariychej. Qankunapis, ciegos, qhawariychej rikuychejtaj.

¹⁹ Pitaj ciegori, manachu kamachiy? Pitaj kachasqay runa jina joq'arari? Mana pipis ajllakusqay jina ciegoqa kanchu, nitaj kachasqay Señorpa kamachin jinapis.

²⁰ Ashkha imasta rikun, manataj allinta qhawarinchu; ningrin tiyan manataj uyarinchu.

²¹ Señorqa cheqan kasqanrayku salvan, kamachisqasninta allin qhawasqa kananta munarqa.

²² Astawampis Israel aylluta suwanku, sarunkutaj chaykunaqa. Tukuyninku wisq'asqas kanku. Tukuyninku wijch'unapaj qhawasqas kanku, manataj pipis paykunata salvaj kanchu. Paykunamanta suwaj kanku, manataj pipis kutichipunchu.

²³ Mayqenniykichejtaj qankunamanta kayta uyarenqari? Pitaj allinta uyarenqa qhepaman yuyarinampaj?

²⁴ Pitaj Jacobta suwasqa kananta saqerqa? Israelmantataj qhechunankuta? Manachu Señor chaytaqa ruwarqa contranta juchallikusqanchejrayku? Noqanchejqa mana ñannintachu purerqanchej, manataj kamachisqasnintapis kasorqanchejchu.

²⁵ Chayrayku, paykunaj patankuman manchay k'ajaj phiñakuyninta jich'amorqa, manchay ch'ajwapi kanankupaj. Tukuynejman jinata jap'iykucherqa. Chaywampis mana unancharqankuchu. Chay jinata ruphachishajtimpis mana kasorqankuchu.