Isaías 40 - Qheshwa Biblia DC

Señor Jerusalenta sonqochan

¹ Qankunaj Diosniykichejqa nin: Sonqochakuychej, sonqochakuychej, israelitasníy.

² K'acha simiwan Jerusalenmanqa parlaychej. Kamachi kanaykichej p'unchayqa tukukapun, juchasniykichejqa pampachasqaña. Chay juchasniykichejmanta jasut'itaqa uj jinatawanña Señorpa makinmanta jap'inkichej.

³ Uj runaj qhaparisqan uyarikun: Señorpaj uj ñanta pichapuychej ch'in pampapi. Diosninchejpaj ch'in pampapi jatun ñanta cheqanta ruwapuychej.

⁴ Chay tukuy meq'asninman junt'achiychej. Tukuy orqosninta moqosninta pampachaychej. Wist'u kajtaqa cheqanyachiychej. Moqo moqolla kajtapis khuskachaychej.

⁵ Chaypi Señorpa atiynin rikuchisqa kanqa. Tukuy runataj rikonqanku, imaraykuchus kaytaqa kikin Señormin nin.

⁶ Uj runaj kunkan uyarikun: Qhapariy, nispa. Noqataj nerqani: Imatataj qhaparisajri?, nispa. Tukuy runaj kausaynenqa qhora jinalla, tukuy k'acha kasqankoqa pampa t'ika jinalla.

⁷ Qhoraqa ch'akipun, t'ikapis qawerparin, Señorninchej wayrata wayrachimojtin. Cheqamanta runaqa qhora jinalla.

⁸ Qhora ch'akipun, t'ika qawipun; Diosninchejpa palabranrí wiñaypaj wiñaynintimpaj.

⁹ Sión, uj alto orqoman wichariy, jatunmanta qhapariy, sumaj willaykunata willanaykipaj. Jerusalén, ama manchachikuspa qhapariy. Judá llajtasman willay: Kaypi Diosniykichej kashan, nispa.

¹⁰ Señor Diosniykichejqa jatun atiyninwan jamushan, makinwan tukuyta atipaspa. Payqa t'inkanwan jamushan, pagontapis apamushan.

¹¹ Uj michej jina ovejasninta michin, corderosta makisninwan marq'arikun, uñayoj kajkunatataj allinta pusanqa.

Israelpa Diosnin jinaqa mana kanchu

¹² Pitaj mar qochata makinwan t'ajlliyan, janaj pachatapis mashkhanchus kasqanta wikiyan? Pitaj kay pachata kaj chhika jallp'ata chimpuman churanri, romanawantaj jatuchaj orqosta pesan, jinallataj juch'uy lomastapis?

¹³ Pitaj Señorpa Espiritunta reparachinri, chayri yuyaychanri?

¹⁴ Pitaj Señorta imatapis yachanampaj tapukunri? Pitaj payman imatapis cheqanta ruwanampaj yachachinri? Pitaj payman ima yachaykunasmantapis yachachinri? Pitaj payman yuyaychan chay jina yuyayniyojpuni kanantari?

¹⁵ Paypajqa tukuy naciones uj sut'oj yaku jinalla, pesaspi uj chhika ñut'u jak'itu jinalla, yaku churuspis uj ñut'u t'iyuta jina chinkarichin.

¹⁶ Líbano orqopi llant'aqa nina enqhanapaj mana kanmanchu nitaj tukuy uywaspis ruphachispa jaywanapaj.

¹⁷ Paypa ñaupaqempi nacionesqa mana imachu kanku. Paypajqa chay tukuy imas manapis kankumanchu jinalla.

¹⁸ Pimantaj qankunaqa Diosta rijch'achinkichejri? Chayri ima lantimantaj rijch'achinkichejri?

¹⁹ Lantita ruwaj runaqa ninapi wakichin, qolqe cadenasta ruwaj runaqa, qorita unuyachispa cadenaj patanta jawerqon.

²⁰ Runaqa, mana thutaj k'ulluta ajllakun. Chaymantataj lantita sumajta ruwayta yachajta mask'an, chaywan sumaj ruwasqa lantita sayachipunampaj.

²¹ Manachu yacharqankichej, manachu uyarerqankichej? Manachu uyarerqankichej kay pacha imaynatachus qallarikusqanta? Manachu qallariymantapacha willasorqachej?

²² Payqa kay pachamanta aswan patapi tiyasqa kashan. Chaymanta qhawarimun runasta, t'intis jinallata. Kay toldota cielota jina aysan. Chay toldotaqa runa tiyakunampaj jina qhataykun.

²³ Diosqa yachayniyoj runastaqa mana kajman tukurpayachin. Kay jallp'a patapi kamachejkunataqa manapis kankumanchu jina chinkarpayachin.

²⁴ Paykunaqa chaypachallaraj plantasqa sach'aman rijch'akunku, manaraj allinta saphinchakojman. Paykunaman sinch'ita Dios wayrachimojtenqa ch'akipunkupacha, muyu wayrapis jamuytawan q'opata jina apakapun.

²⁵ Santo Diosqa tapurin: Pimantaj rijch'achiwankichejri? Pitaj noqa jina kanmanri?, nispa.

²⁶ Patata cielota qhawariychej. Pitaj kay tukuy qoyllurkunata ruwarqa? Pichus chaykunata orqhomuspa yupan, tukuyninkutataj sutisninkumanta wajyan; mana ujta puchuchispa. Chay jinapuni kamachinampaj atiyninwan kallpanwanqa.

²⁷ Jacobpa ayllun, Israel, imajtintaj rimanki, ninkitaj: Purisqaypi Señorqa mana rikuwanchu. Noqaj llakiyniymanta Diosqa mana yuyarikuwanchu, nispari?

²⁸ Manachu yacharqanki, manatajchu uyarerqanki wiñaypaj kaj Diosqa Señor kasqanta, kay tukuynin jallp'atapis pay ruwasqanta? Payqa mana iskayrayanchu, nitaj sayk'unchu. Payqa yuyasqantaqa mana pipis yachayta atinchu.

²⁹ Payqa sayk'usqa kajta astawan kallpachan, pisi kallpayojmampis kallpata yapan.

³⁰ Majt'illosqa llauchhuyanku, sayk'upunkutaj. Waynakunapis sayk'upunku, urmapunkutaj.

³¹ Señorpi atienekojkunaqa mosoj kallpayojllapuni kanqanku. Paykunaqa kallpachakuspa astawan oqharikonqanku ankas jina. Paykunaqa correnqanku manataj sayk'onqankuchu, karusta rispapis mana llauch'iyanqankuchu.