Isaías 4 - Qheshwa Biblia DC

¹ Chaypacha qanchis warmis uj qharillamanta qhechunakonqanku, nenqankutaj: Noqaykoqa mikhunallaykumanta mikhusqayku, p'achallaykuwantaj p'achallikusqayku, qanqa sutillaykita apachiywayku ari, p'enqaypi kanaykumantataj orqhowayku, nispa.

Qhepaman Jerusalempa kusikuynin kanqa

² Chaypacha, Señorpa sach'an ch'illchin kanqa may sumaj, k'achataj salvakoj israelitaspaj, jallp'aj poqoyninmantataj mayta kusikonqanku, jatunchakonqankutaj.

³ Pikunachus Siompi qhepakojkuna, chantá Jerusalempi saqesqas kajkunapis, Diospa ajllasqas sutichasqas kanqanku, imaraykuchus Señormin Jerusalempi kausanankupaj sutisninkuta qelqarqa.

⁴ Chayqa kanqa maypachachus Señor Siompi kaj warmispa ch'ichi kayninkuta mayllajtin, jinallataj Jerusalempi yawar jich'asqankuta pichajtin, Señor tukuy atiyninwan cheqanchajtin, jasut'ejtintaj.

⁵ Señorqa tukuynin Sión orqota, tantasqa runasmampis, p'unchaypi yana phuyuwan phuyuykuchenqa laqhapachata, tutantaj nina lauray k'anchayta rikhurichenqa. Señorpaj atiynintaj chay tukuy patampi kanqa.

⁶ Chayqa toldo jina qhataykonqa, jark'anampaj p'unchaypi ruphaymanta, chanta paramanta, sinch'i wayramantawan.