Isaías 39 - Qheshwa Biblia DC

Ezequiasta Babiloniamanta kachas taripanku

¹ Chaypacha Babilonia wawan Meradac-baladanqa, cartastawan t'inkastawan Ezequiasman apacherqa, onqosqa kasqanta thañirasqantaña taj yachaspa.

² Chay kachaswan Ezequiasqa mayta kusikorqa, Chaymantataj tukuy kapuyninta paykunaman rikucherqa, qolqeta, qorita, sumajta q'apaj jawinasta, sumajnin kaj aceiteta, arma jallch'ana wasista, tukuy iman kajtawan. Palaciompi, nacionnimpipis manapuni imapis qhepakorqachu mana rikuchisqasnenqa.

³ Chay qhepatataj Isaiasqa rey Ezequiasta watukoj rispa taporqa: Maymantataj chay runas jamusqankuri? Ima nisunkutajri? Ezequiastaj nerqa: Karumanta, Babiloniamantapacha watukuwaj jamusqanku, nispa.

⁴ Isaías tapullarqataj: Imatataj wasiykipi rikunkuri? Ezequiastaj kuticherqa: Paykunaman rikuchini imaschá wasiypi kajkunata. Wasiypeqa mana imapis puchunchu mana paykunaj rikusqankoqa.

⁵ Chantá Isaiasqa Ezequiasman nerqa: Uyariy Tukuy Atiyniyoj Señorpa palabranta:

⁶ Uj p'unchay chayamonqa, chaypacha paykunaqa Babiloniamanta jamuspa, kunankama tatasniykej waqaychasqasninkuta apakaponqanku, qampa jallch'asqasniykitawan. Chaykunamanta ni ima puchonqachu, nispa nimusunki Señorqa.

⁷ Mirayniykimanta kajkunata wakinta Babiloniamanta kajkunaqa, kapaspa Babilonia reypa palaciompi kamachismanta churanqanku.

⁸ Ezequiasqa Isaiasman kuticherqa: Señorpa palabranta parlasqaykeqa sumajpacha: Noqa kausanaykamallapis k'acha kausakuy, sonqo tiyakuytaj kachun nispa.