Isaías 38 - Qheshwa Biblia DC

Ezequías onqoykun, thañikuntaj

¹ Chaypachataj Ezequiasqa onqoykuspa wañupunayasharqa. Jina kashajtintaj Amospa wawan parofeta Isaías watukoj rispa nerqa: Señorqa nisunki: Wasiykipi kajkunaman imatachus ruwanankuta willay. Qanqa wañupunkiña, mana sanuyawajchu.

^2-3 Ezequiastaj perqaman uyanta kutirichiytawan, Señormanta ajinata mañakorqa: Señor, yuyarikuway noqamanta ari. Noqaqa qampa ñaupaqeykipi purerqani tukuy cheqa kajta ruwaspa tukuy sonqowan, munayniykiman jina. Chanta Ezequiasqa sonqo nanayta waqarqa.

⁴ Chaymantataj Señorqa ujtawan Isaiasman kamacherqa:

⁵ Rispa Ezequiasman nimuy: Tatayki Davidpa Diosnenqa kay jinata nimusunki: Mañakusqaykita, waqasqaykitapis uyariyki. Chayrayku noqaqa niyki chunka phishqayoj watastawanraj kausanaykita.

⁶ Qantawan Jerusalén llajtatawan mana imanachisqaykichejchu Asiria reywan. Noqa kay llajtata jark'asaj, nispa.

^7-8 Kay señalta Señorqa qosonqa, nisusqanta junt'anampaj. Qhawariy, Acazpa inti relojnimpi chunka thaskiytawan kutirichisaj intej llanthunta qhepaman. Chaymantataj, intej llanthonqa chay uraykamusqanmanta chunka thaskiytawan qhepaman kutirerqa.

⁹ Judamanta rey Ezequiasqa, chay onqoyninmanta thañiytawan, kay takiyta qhelqarqa:

¹⁰ Noqaqa nerqani: Noqaqa kay khuskan kausayniypi ripusaj. Wañuy punkupi kasaj tukuy kausayniypi.

¹¹ Noqaqa nerqani: Manaña Señorta rikusajchu kay jallp'a patapi kausajkunaj chaupimpi. Manaña pitapis kay pachapi kausajta rikusajchu.

¹² Kunanqa kausayniyta qhechukapuwan, uj michejpa toldonta jina. Bayetata awaj runa jina kausayniyta k'uturparin kay onqoywan; uj tutallapi chinkachiwanki.

¹³ Noqaqa sut'iyaykama qhaparikorqani. León jina tullusniyta qhaj nicherqanki. Qanqa Señor tutallapi chinkachiwanki.

¹⁴ Para p'isqos jina waqani, paloma jina ayqoni. Patata qhawasqaypi ñawisniy k'arawanña. Señor, kay jina ñak'ariypi tarikuni, kallpachaway ari.

¹⁵ Ima nisajtaj pay kikin nishawaspa ruwashawajtinri? Puñuyniypis chinkapun, kay jina ñak'ariypi tarikusqayrayku.

¹⁶ Pi runastachus Señor waqaychan, chaykunaqa kausanqanku. Noqapis chaykunawan kausasaj. Qanlla thañichiwanki, kausachiwankitaj.

¹⁷ Qhawariy, kay jinata ñak'arispa waqayneyqa, kusiyman tukun. Qanqa kausayniyta t'oqopi ismunanmanta jark'arqanki. Qanqa tukuy juchasniyta pampachanki.

¹⁸ Aya p'ampanaqa mana qanta jatunchasunkimanchu, nitaj wañuypis jatunchasunkimanchu. Pikunachus sepulturaman yaykojkunaqa cheqa kayniykipi mana suyankuchu.

¹⁹ Pikunachus kausashanku chaykunalla qantaqa yupaychasunku, noqa kunan yupaychashayki ajinata. Tatasqa wawasninkuman cheqa kayniykimanta parlanku.

²⁰ Señorneyqa salvawanqa; chayrayku takirikunachej Señorpa wasimpi takiykunata, sapa p'unchay tukuy kausayninchejpi.

²¹ Isaiastaj nerqa: Higosmanta ch'aqerqospa chaywan chay nanasqanman laq'aykuychej, thañenqataj, nispa.

²² Ezequiastaj nillarqataj: Ima señaltaj kanqa Señorpa wasinman wicharinaymantari?, nispa.