Isaías 37 - Qheshwa Biblia DC

Señorqa Judá jallp'ata enemigosninmanta qhechun

¹ Rey Ezequiastaj chayta uyariytawan, llakiywan p'achasninta llik'irakorqa, qhashqa p'achasta churaykukuytawantaj Señorpa wasinman mañakoj rerqa.

² Chaymantataj palaciopi mayordomo Eliaquimta, qelqeri Sebnata, sacerdotespa kurajkunasnintawan qhashqa llakiy p'achaswan churaykuchispa, Amospa wawan sut'inchaj Isaiasman kacharqa.

³ Chayaspataj Isaiasman willarqanku: Kay jinata nin rey Ezequías: Kunan p'unchayqa may llakiypi tarikunchej, may k'amisqa, k'umuykachachisqataj. Imaynachus uj onqoj warmeqa onqokunampachapi mana kallpayoj llauch'ipacha tarikun, ajinata rikhurinchej.

⁴ Ichapis Señor Diosniyki soldadosta kamachejpa palabrasninta uyarin ari; paytaqa Asiriaj reynin kachamun chaypi Kausaj Diospa contranta sajrata parlanampaj, noqanchejpa contranchejta ima. Ichapis Señor Diosniyki paykunata jasut'inman. Diosniykimanta mañapuwayku ari, kaypi mashkhachus puchunkuraj chaykunapaj.

^5-6 Chaymanta Ezequiaspa kachasnin Isaiasman willajtinkukamataj, paykunaman Isaiasqa nerqa: Kunanqa ajinata nimuychej reyniykichejman: Señorqa ajinata nin: Ama chay uyarisqayki palabrasmantaqa llakikuychu, noqaj contrayta Asiria reypa kamachisnin parlasqanmantaqa.

⁷ Qhaway, noqa payman uj iskayrayachej yuyayta churasaj. Payqa mana allin willayta uyarispa llajtanman kutiponqa, chaypitaj espadawan wañuchichisaj.

⁸ Llajtanman kutispa soldadosta kamachejqa, yacharqa Asiriamanta reyqa manaña Laquis llajtapichu kasqanta, mana chayqa Libna llajtawan maqanakamushasqanta.

⁹ Chaypi Asiria reyqa uyarerqa nejta, Etiopiamanta Tirhaca reyqa, paypa contrampi ashkha soldadosta kachashasqanta. Chayta uyariytawan, ujtawan Rey Ezequiasman kachasta kacharqa kay jinata nimunankupaj:

¹⁰ Kunanqa ujtawan Judamanta rey Ezequiasman nimuychej: Atienekunki chay Dioswanqa ama ch'aukiyachikuychu; Jerusalenqa mana Asiria reypa makinman urmanqachu, nisojtin.

¹¹ Qanqa allinta yachanki, imaynatachus Asiriamanta reyesqa tukuy nacionesta tukuchisqankuta. Kunanqa qampunichu librakuwaj?

¹² Ñaupa tatasniyku chay nacionesta chinkachishajtinku, Gozán llajtata, Harán llajtata, Resef llajtata ima, Dioskunasninkoqa aterqankuchu qhechuyta, chantá Telasarpi tiyakoj Edén runasta ima?

¹³ Hamatmanta, Arfadmanta, Sefarvaim llajtasmanta, Henamanta, Ivamanta ima reykuna maypitaj kashankuri?

^14-16 Rey Ezequiasqa chay kachaspa jaywasqanku cartasta jap'iytawan leerqa; jinaytawantaj Señorpa wasinman kachaykukorqa, chaypi chay papelta mast'aspataj, Señormanta mañakorqa: Tukuy Atiyniyoj Señorníy, Israelpa Diosnin querubines sutichasqa angelespa patapi tiyakoj Dios, kay jallp'a patapi kaj chhika nacionespa Diosnin; qanlla ruwarqanki janaj pachata, kay pachatawan.

¹⁷ Uyariway ari Señorníy, ñawiykita kicharispa qhawarimuy ari. Senaqueribpa tukuy nisqanta uyariy ari, pay kachamun kayman, qan kausaj Diosniypa contranta kaypi rimanampaj.

¹⁸ Cheqamanta Señor, Asiriamanta reyes jamuytawan kay llajtasta, tukuy ranchosnintinta tukucherqanku.

¹⁹ Chay llajtaspa dioskunasninkutaqa ninaman enqhaykorqanku, imaraykuchus chaykunaqa cheqamanta manapuni dioskunachu karqanku, mana chayqa runaj, ruwasqallan, k'aspimanta, rumimanta ima; chayrayku chaykunataqa t'unararqanku.

²⁰ Kunanqa Señor Diosniyku, Asiriospa makinmanta jark'awayku ari; ajinamanta kay jallp'a patapi kaj chhika naciones yachanankupaj qan k'atalla atiyniyoj Señor kasqaykita, nispa.

²¹ Chaymanta Isaiasqa Ezequiasman willacherqa: Ajinata Israelpa Señor Diosnenqa nimusunki: Asiria rey Senaquerib imastachus ruwayta munasqanmanta mañakuwasqaykitaqa uyariyki.

²² Kay jinata Señorqa nin chay reypa contranta: Rey Senaquerib, Sión llajtaqa uj sipas jina qhesachasunki, uyaykipi asiykukusunki. Jerusalén llajtaqa qhepaykimanta umanta khiwirispa asiykakamusunki.

²³ Pipaj qanqa rimankiri, pimantataj alqochakunkiri? Pejpa contrantataj chhika jatunmanta qhaparinki, jatun jatunmanta qhawaykachaspari? Israelpa Santo Diosnimpa contranta ruwanki.

²⁴ Qanqa kamachisniykita kachamunki kaypi Señorpa contranta qhaparinankupaj, nichimunkitaj: Ashkha carrosniywan orqo puntasman wicharini, Líbano kinraykunaman. Jatuchaj kaj cedros sach'asta k'utuni, sumachaj kaj pinostawan, aswan jatuchaj kaj orqo puntasniykiman wicharini, aswan ch'ipasqa kaj montesniykiman ima.

²⁵ Noqaqa jallp'ata jusk'uspa chaymanta yakuta ujyani. Noqaqa chakisniywan saruspalla Egipto mayu yakusta ch'akichini, nispa.

²⁶ Qanqa manachu yacharqanki noqaqa Señor kasqayta, unaymantapachaña kay imasta wakichisqayta? Unay unaymantapacha kay wakichisqayta kunanqa ruwani. Chayrayku qanqa pakakuna jark'achisqa llajtasta urmarachinki, raqay rumi qontusmantaj tukuchinki.

²⁷ Chaypi tiyakoj runasqa pisi atiyniyoj karqanku, manchali manchalilla, musphasqastaj. Paykunaqa karqanku campo qhora jina, q'omer qhora jinataj. Wasi patapi wiñaj qhora jina karqanku, inti llojsimuymanta wayramojtinkama ch'akirpayan, kikillan.

²⁸ Noqa rejsiyki imaynachus kasqaykita, imaynatachus llojsisqaykita, yaykusqaykitapis, jinallataj noqapaj phiñakusqaykitapis.

²⁹ Qanqa noqaj contrayta oqharikorqanki, noqaj contraypi mayta phiñakusqaykita uyarini. Kunanqa senqaykiman uj muyu fierrota warkhusqayki, simiykiman frenota churasqayki; chantaqa may ñantachus jamorqanki chayllatataj kutirichisqayki.

³⁰ Isaiasqa Ezequiasman nillarqataj: Qankunapajqa kay uj señal kanqa: Kunan wata, qhepan watatawan k'ipa poqoj trigota mikhunkichej. Kinsa watamantataj qankunaqa tarpunkichej, cosechankichej, uva sach'astapis wiñachinkichej, chaymantataj poqoyninta mikhunkichej.

³¹ Judá ayllumanta qhepakojkunaqa, sach'a jina sumajta saphichakonqanku, chaymantataj poqonqanku.

³² Jerusalenmanta Sión orqomantawan puchojkuna kanqanku. Sumajta munakoj Tukuy Atiyniyoj Señorlla chaytaqa ruwanqa.

³³ Señorqa Asiria reymanta kay jinata nin: Jerusalén llajtamanqa manapuni yaykumonqachu, nitaj flechallantapis kachaykamonqachu. Mana pipis ñaupaqenta escudo oqharisqa jamoj kanqachu, manallataj llajtaj muyuyninmampis ima jallp'a moqosta churanqachu.

³⁴ May ñantachus jamorqa chayllatataj kutirenqa; kay llajtamanqa manapuni yaykumonqachu. Ajinata noqa Señor nini.

³⁵ Noqa kay llajtamantaqa sayaykusaj, librasajtaj, noqa paykunata munakusqayrayku, jinallataj kamachiy Davidta munakusqayrayku.

³⁶ Maypichus asirio soldados kashanku chayman rispataj, Señorpa angelnin pachaj pusaj chunka phishqayoj asirio soldadosta wañuracherqa. Q'ayantintaj tukuyninku wañusqaslla rikhurerqanku.

³⁷ Chaymanta Asiria rey Senaqueribqa tukuy imasninta oqharikuspa Ninivepi tiyakoj riporqa.

³⁸ Uj kutitaj Nisroc nisqa diosninta yupaychashajtin, iskaynin wawasnin Adramelecwan, Sarezerwan tatankuta espadawan wañurpacherqanku, chaymantataj Ararat nisqa jallp'aman ayqerqanku. Esarhadón wawantaj paypa cuentanmanta rey karqa.