Isaías 36 - Qheshwa Biblia DC

Senaquerib Judaj contranta maqanakun

¹ Chunka tawayoj watataña rey Ezequías kamachishajtin, Asiriamanta rey Senaquerib, maqanakoj wicharerqa Judaj contranta, chaypitaj tukuy jark'achasqa llajtasta jap'erqa.

² Chay Asiriamanta reyqa uj kuraj kamachejta ashkha soldadosniyojta Laquismantapacha Jerusalenman kachaykorqa rey Ezequiaswan maqanakamunampaj. Chay soldadostaj muyuykunankupaj jarakorqanku patanejpi yaku qocha cantopi, t'ajsaspa jallp'anman rina ñan patapi.

³ Chaymantataj chay kurajwan parlamoj llojserqanku Hilciaspa wawan palaciopi mayordomo Eliaquimwan, qelqeri Sebnawan, Asafpa wawan yuyaychaj Joawan ima.

⁴ Chaypitaj Asiria soldadosta chay kamachejqa paykunaman nerqa: Kayta willamuychej Ezequiasman: Jatun kaj, Asiria reyqa kay jinata nimun: Imapitaj qan chay jinatapuni atienekunkiri?

⁵ Qanqa yuyanki yuyaychasusqanku, parlasusqankupis maqanakupaj sumaj kasqanta. Chay palabrasqa qhasi manakajlla kanku. Kunan qanqa, pipitaj atienekunki noqaj contraypi oqharikunaykipajri?

⁶ Noqa yachani Egiptoj yanapaynimpi atienekusqaykita. Egipto nacionqa uj ch'ejtarpayasqa soqoso jina, pipis chayman atikojqa t'ojsiykuchikonqa. Chay jinamin rey Faraón paypi atienekojkunapajqa.

⁷ Sichus qan niwankiman: Noqaykoqa Señor Diosniykupi atienekuyku, nispa chayqa; imajtintaj chantá Diosta yupaychana altaresta, alto lugarestawan Ezequiasllataj urmaracherqa, kamachintaj Judá llajtata, Jerusalén llajtatawan uj altarllapi Diosta yupaychanankutari?

⁸ Kunanqa uj tratota ruway ari Asiriamanta wiraqochi reyniywan. Noqa qoykiman iskay waranqa caballosta, sichus chay caballospi rinankupaj runasta tariwaj chayqa.

⁹ Qanqa mana atiwajchu tukuy asirio soldadosta kamachejkunamanta aswan juch'uy kajllatapis ayqechiytaqa. Qanqa qhasita suyakushanki Egipto nación carrestasta, jinallataj caballospi rejkunatapis kachamusunanta.

¹⁰ Chantapis, qanqa yuyankichu mana Señorllawan kay llajtata chinkachej jamusqayta? Señorqa niwan kay llajtaman wicharimuspa chinkachinayta.

¹¹ Chaymantaqa, Eliaquimwan, Sebnawan, Joawan soldadosta kamachej asirioman nerqanku: Qanta mañayku arameo parlaypi kay kamachisniykiman parlanawaykuta, imaraykuchus noqaykoqa arameo parlayta yachayku. Amataj Judá llajtaj parlaynin hebreopi parlawaykuchu, kay perqa patapi qhawajkunaj uyarinantaqa, nispa.

¹² Chay kamachejtaj paykunaman nerqa: Kaytaqa wiraqochi reyneyqa, mana qankunaman, nitaj wiraqochi reyniykichejman ninaypajchu kachamuwan, mana chayqa kay perqa patapi qhawajkunaman ninaypaj kachamuwan. Paykunaqa qankunawan khuska akasninkuta mikhukonqanku, kikin jisp'ayninkutataj ujyakonqanku.

¹³ Chaymantataj chay kamachejqa sayaykuytawan jatunmanta Judá llajtaj parlaynimpi qhaparerqa: Uyariychej Asiriamanta jatun reypa nimusqanta:

¹⁴ Ama Ezequiaswanqa ch'aukiyachikuychejchu, imaraykuchus payqa mana qankunata librayta atisonqachejchu.

¹⁵ Ama Ezequiaswanqa Señorpi atienechichikuychejchu. Payqa nisonqachej: Cheqamanta Señorlla jark'akuwasunchej. Kay llajtaqa mana Asiriamanta reypa makinmanqa urmanqachu, nispa.

¹⁶ Qankunaqa ama Ezequiasta kasuychejchu. Chayrayku, qankunaman nimusunkichej Asiriamanta rey: Noqawan tratota ruwaychej, noqawan ujchakuychej. Chaywanqa sapa ujniykichej kikin uva sach'asniykichejmanta, jinallataj higostapis sach'asniykichejmanta mikhunkichej, yakutapis sapa uj pujyuykichejmanta ujyankichej.

¹⁷ Chayta ruwankichej noqa jamuspa pusamusunaykichejkama. Noqaqa pusasqaykichej jallp'aykichejman rijch'akoj jallp'allamantaj granowan, trigowan, uvaswan poqojman.

¹⁸ Chayrayku Ezequiaswanqa ama ch'aukiyachikuychejchu. Payqa nillasonqachejpuni: Señorninchej salvallawasun, nispa. Qankuna yachankichej, Asiriaj atiyninmanta ima naciompa diosnintaj jallp'anta qhechuyta atisqari?

¹⁹ Maypitaj kashan Hamatpata, Arfadpatapis diosninkuri? Maypitaj kashan Sefarvaimpa diosnimpisri? Samariataqa Asiria reypa atiyninmanta qhechuyta aterqankuchu?

²⁰ Chay mayqen naciompa diosnintaj nacionninkuta Asiriaj atiyninmanta librarqa? Imajtintaj qankunaqa Señorniykichej Jerusalenta qhechunanta yuyankichejri?

²¹ Chay kachasqa runasqa chay palabrasta uyarillarqanku, mana imatapis kuticherqankuchu; imaraykuchus paykunataqa reyninku kamacherqa ch'inlla kanankuta: Amapuni imatapis kutichinkichejchu, nispa.

²² Chaymantaqa Hilciaspa wawan palaciopi mayordomo Eliaquimwan, qelqeri Sebnawan, Asafpa wawan yanapaj Joawanqa, p'achasninkuta llakiywan llik'irakuspa Ezequiaspaman kachaykukorqanku, chayaspataj willarqanku Asiriamanta kamachej imastachus parlasqanta.