Isaías 35 - Qheshwa Biblia DC

Sionman israelitas kutiykapunku

¹ Q'omeryaspataj rosas jina qhallallarishaj t'ikanqa.

² Chay ch'in pampaqa qhallallarispa t'ikanqa, mayta kusikuspataj takenqanku. Líbano orqo jina may k'achitu kanqa, Carmelo jallp'as, Sarón jallp'as jinataj sumajta poqoj jallp'as kanqa. Ajinamanta paykunaqa Señorpa atiyninta rikonqanku, Diosninchejpa k'acha kaynintawan.

³ Sayk'usqa kajkunata kallpachaychej, mana sayayta atej llauchhu qonqorista sumajta sayachiychej.

⁴ Manchachikojkunaman niychej: Kallpachakuychej, amataj manchachikuychejchu; qhawariychej Diosniykichej jamushan salvasunaykichejpaj enemigosniykichejmantaj pagota qonampaj.

⁵ Chaypacha ciegospis rikonqanku, lojt'ospis uyarenqanku.

⁶ Cojosqa tarukas jina phinkiykachanqanku, opapis parlarenqa. Chay jina ch'aki ch'in jallp'api ashkha correshaj yakus llojsimonqanku.

⁷ Chay ch'aki jallp'aqa yaku qochaman tukonqa mana jayk'aj yaku llojsinaspi yaku juturis rikhurenqa; maynejkunapichus atojkuna puñoj kanku chaykunapi, soqososwan, totoraswan wiñanqanku.

⁸ Chaypi kanqa uj sumaj ñan, sutintaj kanqa Santo ñan. Chayta juchayoj runaqa manapuni renqachu, nitaj ima wampu runapis chay ñantaqa pantanqachu.

⁹ Chaypeqa mana leones tiyanqankuchu, nitaj runa mikhoj animalespis chaynejta purenqankuchu. Chay ñanninta librasqa kajkunalla purenqanku.

¹⁰ Ajinata Señorpa salvasqasnenqa kutimponqanku, Sionmanqa may kusisqas yaykuponqanku. Umankupeqa kusiy yuyayllapuni kanqa. Chaypacha may kusiyniyoj kanqanku. Paykunamanta llakiywan, ayqoywan ayqenqa.