Isaías 34 - Qheshwa Biblia DC

Nacionespaj Diosqa k'ajaj phiñakuynin

¹ Uyarinaykichejpaj ujllapi qayllamuychej: Naciones, llajtas, allinta uyariychej. Qampis, jallp'a, uyariy, imachus qampi kajkunasnintin. Qampis, mundo, uyariy, qampi tukuy kausajkunaspiwan.

² Señorqa manchay phiñasqa kashan tukuy nacionespaj, tukuy soldadosninkupaj ima. Chaykunata urmachenqa, wañurachichenqataj.

³ Chay wañusqasqa pachanman wijch'urpayasqa kanqanku, chay wañusqasqa millayta asnayta qallarenqanku, orqospitaj yawarninku purirenqa.

⁴ Cielopi qoyllurkunapis chinkaraponqanku, cielopis papel jina mayt'uykukonqa, tukuy qoyllurkuna urmaramonqanku, uva sach'aj qawisqa laphisnin urmaran jinata, chayri higospa laphisnin jina.

⁵ Janaj pachapi Señorpa espadanqa wakichisqa kashan. Chaytaj Edom llajtaman uraykamonqa, wañunampaj juchachasqa llajtaman.

⁶ Señorpa espadanqa sumaj yawarchasqa, wiranchasqataj kashan, imaynatachus ovejasta, cabrastapis rikuchikuspaj wañuchinku ajinata. Señorqa uywa wañuchisqa jaywakuta Bosra llajtapi ruwanqa, jinamanta ruwanqa uj jatun ñak'arakuta Edom llajtapi.

⁷ Chay runaswan khuska wañonqanku búfalos, toros, waka uñas ima. Chay jallp'aqa chay yawarwan ch'aranchasqa kanqa, wirawan qhosqochasqataj kanqa.

⁸ Chay p'unchaypi Señorqa Sionta ñak'arichisqankumanta pagachikonqa.

⁹ Chaypacha Edompa yaku mayusnenqa alquitranman tukonqa, jallp'a jatarejqa azufreman, jallp'ataj alquitrán jina larwanqa.

¹⁰ Chaytaj tuta p'unchay larwallanqapuni, q'osñimpis mana tukukuyniyojta q'osñillanqapuni. Jinamanta chay jallp'aqa watan watan wijch'usqa kanqa, manataj pipis ni jayk'aj chayninta purenqachu.

¹¹ Chaypeqa tiyakonqanku jukus, ch'useqas, q'arqañas, wajchillas imalla. Señorqa chay llajtata tukuchenqa ch'usaj ch'impachaman.

¹² Chay llajtata kamachinampaj mana rey kanqachu, chay tukuy kurajkunataj chinkaponqanku.

^13-14 Chay palaciosninkupeqa khishkaslla wiñanqanku, pakakunasninkupipis itapalloswan, qhorasllawan wiñanqanku. Chantapis chaykunapeqa atojkunallaña puñonqanku, chay patiosnintaj surispa wasillanña kanqa, osqhollus tiyakonqanku, tarukaspis, cabraspis chaypi qhaparinakonqanku, tuta purej sajrapis chaypi tiyakonqa, samarikonqataj.

¹⁵ Chaypi jukupis thapachakuytawan wachanqa, ojllaspataj chillwisninta t'ojyachenqa, lijran urapi sumajta pakaspataj uywanqa. Chayllamantaj suwintuspis tantakonqanku, sapa uj ch'ullanwankama.

¹⁶ Señorpa libronta qhawaychej, leeychejtaj. Chaypi kanqanku tukuynin chay animales, china orqo, imaraykuchus kikin Señorpuni kamacherqa, phukuspataj ujllaman chaykunata tantaykonqa.

¹⁷ Sapa uj animalesman maypichus tiyanankuta rikuchin; chay jallp'api tiyanqanku wiñaypaj, watan watanta kikin jallp'api miraspa.