Isaías 29 - Qheshwa Biblia DC

Jerusalempa contrampi

¹ Ay, Arielmanta, Arielmanta, Davidpa jarakunan llajta! Uj watastawan fiestasta ruwallachumpuni.

² Chaymanta Arielta llakiypi rikhurichisaj. Chaypi llakiy waqay kanqa. Chay llajtaqa noqapajqa Ariel jinapuni kanqa.

³ Qampa contraykita soldadosniywan muyuykuchisqayki, muyuyniykitataj k'aspista churasaj; contraykipitaj pakakuna t'oqosta allaykusaj.

⁴ Qantaj may k'umuykusqa rikhurinki, parlasqaykitaj jallp'a ukhumanta uj almajta jina uyarikonqa; parlasqaykipis jallp'a ukhumanta chhichimonqa.

⁵ Enemigosniykeqa ñut'u jallp'a jina kanqanku, manchay atiyniyojkunapis wayrawan apachikoj q'opa jina kanqanku; mana yuyasqamanta ujllata.

⁶ Tukuy Atiyniyoj Señortaj paykunata jasut'enqa, qhon qhonkunawan, jallp'a kuyuykunawan, manchay ch'ajwawan, sinch'i wayrawan, llojlla parawan, manchayta q'olaj ninawan ima.

⁷ Chay chhika runas tukuy nacionesmanta Arielwan maqanakusqankoqa, mosqoypi jinalla kanqa. Tukuy paypa contranta maqanakojkunapis tukuy pakakunasninkuta urmachejkuna, jinallataj llakiyman churajkunapis.

⁸ Imaynachus uj yarqhasqa runa mosqoynimpi mikhun, rijch'arintaj manchay yarqhasqa; jinallataj mosqoynimpi manchayta ch'akichikuspa ujyan, rijch'arintaj may ch'akisqa. Mallq'ampis manchay ch'akisqa. Ajina kanqa chay chhika runas Sión llajtawan maqanakojkunawanqa.

Israelitaspa puraj kayninku

⁹ Israelitas, wampusllapuni kaychej, ciegos kaychej mana imata rikuspa. Machasqas jina chankaykachallaychejpuni, mana machachej ujyanata ujyashaspapis.

¹⁰ Señorqa qankunaman uj sayk'uy puñuyta apachimusunkichej. Profetasniykichejtapis Señorqa puñurparichin, ñawisninkuman velowan jina qhataykuspa.

¹¹ Tukuy mosqoypi jina rikusqasqa qankunapaj wisq'aykusqa libro jina. Chaytataj qonkichej pichus leejman, ninkichejtaj: Kayta leey, nispa. Paytaj kutichisonqachej: Mana leeyta atinichu wisq'asqa kasqanrayku.

¹² Sichus uj mana leeyta yachajman qonkichej, ninkichejtaj: Leey kayta, nispa. Paytaj nisonqachej: Mana leeyta yachanichu, nispa.

¹³ Señortaj nin: Kay runasqa simillankuwan qayllamuwanku, simillankuwan yupaychawanku, sonqonkutaj noqamanta karupi kashan. Noqata kasuwasqankoqa, runaspa kamachisqallan kapun, imatachus yachasqankullata ruwanku.

¹⁴ Chayrayku, kay runastaqa jatuchaj t'ukuna imasta ruwaspa t'ukushajta saqesaj. Yachayniyojkunasniyoj yachaynenqa chinkaponqa, yuyayniyojkunaj yuyayninkupis manaña kanqachu.

¹⁵ Ay, Señormanta pakakojkunamanta, imatachus yuyasqasninkuta pakajkunamanta, imatachus ruwasqasninkupis laqhayaypi kashan! Chanta ninkutaj: Mana pipis rikuwanchejchu, manataj reparawanchejchu!

¹⁶ Cheqamanta qankunaj sajra ruwasqaykichejqa rijch'akun manka ruwajpa llink'i t'uruman. Chay imatachus ruwasqanqa ruwajninta ninmanchu: Mana qanchu ruwawanki. Chay ruwasqan p'uñoqa ruwajninta ninmanchu: Mana yachankichu imatachus ruwasqaykita.

Israel salvasqa kananmanta

¹⁷ Manachu Líbano q'ara orqo pisi tiempomantawan sumaj llank'ana jallp'aman tukonqa? Llank'ana jallp'apis manachu sach'araraman tukonqa?

¹⁸ Chaypacha libromanta leesqa palabrasta joq'aras uyarenqanku, ciegospis laqha ukhupi kaspa sut'ita rikonqanku.

¹⁹ Llamp'u sonqo kajkunaqa mayta kusikonqanku Señorpi, aswan wajcha kajkunapis Israelpa Santo nisqa Diosnimpi maytapuni kusikonqanku.

²⁰ Tukuy ñak'arichejkunaqa tukukaponqanku, alqochakojkunapis chinkachisqas kanqanku; tukuy sajra imasllata ruwayta munajkunapis chinkachisqas kanqanku.

²¹ Sajra palabraswan mana juchayojta juchachajkuna, allinta cheqanchajpajpis misk'anata churajkuna; mana juchayojta imaymana llulleriosninkuwan ch'aukiyajkuna ima.

²² Chayrayku Israelpa Diosnin, Abrahamta libraj Señorqa, Jacobman nin: Jacob, mana kunanqa p'enqachisqachu kanki, manataj uyaykipis khuyay khuyayta qhawaykachanqachu.

²³ Wawasniykeqa paykuna ukhupi imastachus ruwasqasniyta rikonqanku. Paykuna nenqanku noqaqa Santo kasqayta, Israelpa Diosnintataj kasuwanqanku.

²⁴ Pantasqa yuyayniyojkunaqa, yachayniyojman tukonqanku. Thutojkunapis Diosmanta yachaqakonqanku.