Isaías 22 - Qheshwa Biblia DC

Jerusalempa contrampi willay

¹ Hinom vallej contranta willakun. Imataj tiyan tukuyniykichej wasi pataman wicharinaykichejpajri?

² Imaymana qhapariywan, ch'ajwawan junt'a kaj llajta, kusiypi kausaj llajta. Wañusqasniykeqa mana espadawan wañuchisqaschu kanku, nitaj ch'ajwapi wañuchisqaschu kanku.

³ Tukuy kurajkunasniyki flechamanta ayqekorqanku. Paykunaqa presochasqas karqanku. Wapu runasniyki karuman ayqeshajtinkupis, presochasqas karqanku.

⁴ Chayrayku nerqani: Jatariychej noqamanta; jik'un jik'unta waqarikusaj. Ama sonqochawaytaqa yuyaychejchu, llajtay tukuchisqa kasqanmanta.

⁵ Tukuy Atiyniyoj Señorqa nerqa qhaparina llakiy atipachikuna p'unchay chayamunanta. Hinom vallepitaj perqasta urmachinku, qhapariykunataj orqosman chayan.

⁶ Elammanta kajkunaqa flechasninkuta wakichinkuña, carrosninkuman, caballosninkumampis wicharinkuña. Kirmanta kajkunapis escudosninkuta orqhomunku.

⁷ Chay sumaj vallesniykiman carrosqa junt'aykun, caballospi kajkunataj llajta punkupi sayaykunku.

⁸ Judaj jark'akunanqa urmarqa; chay p'unchaypi qankunaqa arma waqaychana wasipi ashkha maqanasta rikorqankichej.

⁹ Davidpa llajtampa perqasnimpa ch'ejtakusqanta rikorqankichej, ura kaj estanquemantaj yakuta junt'acherqankichej.

¹⁰ Jerusalempi wasista qhawarqankichej, wakin wasista urmacherqankichej llajta perqasta sumajta sayachinaykichejpaj.

¹¹ Chay iskay perqas chaupipi uj estanqueta ruwarqankichej, chay mauk'a estanquemanta yakuta jap'inaykichejpaj. Manataj pichus ruwajta allimpi qhawarqankichejchu, nitaj unay ruwajtapis yuyarikorqankichejchu.

¹² Chayrayku, Tukuy Atiyniyoj Señorqa wajyasorqachej, mayta llakikuspa waqanaykichejpaj, umaykichejtataj ruthunaykichejpaj, qhashqa p'achastataj churakunaykichejpaj.

¹³ Astawampis asikorqankichej, kusikorqankichejtaj, ovejasta, wakastapis ñak'aspa, sumajta aychata mikhuspa, vinotapis ujyaspa, nerqankichej: Mikhuna, ujyana, imaraykuchus q'aya wañupusun.

¹⁴ Chayta Tukuy Atiyniyoj Señorqa sut'inchaspa uyarichiwarqa: Wañunaykichejkama kay juchataqa mana perdonasqaykichejchu, nispa nin Tukuy Atiyniyoj Señorqa.

Sebna sutiyoj kamachej contrampi willay

¹⁵ Tukuy Atiyniyoj Señorqa niwarqa: Rispa qolqe jallch'aj mayordomo Sebnaman nimuy:

¹⁶ Imata kaypi ruwanayki tiyan? Pitaj sepulturata ruwakunaykita kamachisunkiri alto patapi, chhankapi jusk'uspa ruwakunaykitari?

¹⁷ Señorqa karuman wijch'umusonqa, chaypitaj sinch'ita jap'isonqa.

¹⁸ Qantaqa pelotata jina morq'oykuspa karuta jallp'a patanta bolalachisonqa. Chaypitaj wañunki, chayman mentasqa carretasniyki renqanku, qantaj wiraqochiykej wasimpaj uj p'enqay kanki.

¹⁹ Chay maypichus kashanki chaymanta wijch'usqayki, maypichus llank'anaykimantawan qharqosqayki.

²⁰ Chaypacha Hilciaspa wawan Eliaquim kamachiyta wajyasaj.

²¹ Payta p'achasniykiwan p'achallichisaj, kamachina chumpiykiwantaj chumpichisaj. Qampa atiyniykita payman qopusaj. Paytaj Jerusalempi tiyakojkunapaj uj tata jina kanqa, jinallataj Judá ayllupajpis.

²² Davidpa wasimpa llaventapis kunkanman warkhuykusaj. Pay kicharejtenqa ni pipis wisq'ayta atenqachu, wisq'ajtintaj ni pipis kichariyta atenqachu.

²³ Payta uj takarputa jina sinch'i perqaman takaykusaj, tatampaj ayllumpaj allin kanampaj.

²⁴ Tatampa wasimpi imaschus allin kajkunata chayman warkhonqanku, wawasnin, allchhisnin ima, tukuy vasosta, imaymana kaj yurusta ima.

²⁵ Chaypacha, chay sinch'i perqapi takarpoqa sik'ikaponqa, urmachisqataj kanqa. Chaypi warkhusqa kajkunataj tukuyninku ñut'ukonqanku. Ajinata Señorqa nin.