Isaías 21 - Qheshwa Biblia DC

Babiloniaj urmananmanta

¹ Ch'in mar qochamanta imaynachus kananmanta willakun. Neguevmanta muyoj wayra jamun, ajinata, manchachikuy ch'in jallp'amanta jamun.

² Diosqa mosqoypi jina, manchachikunata rikuchiwan. Suwajqa suwan, chinkachejqa chinkachin. Sayarikuy ari, Elam, soldadosniykiwan; qampis Media soldadosniykiwan muyuykuchiy. Tukuy ayqosqaykita tukuchini.

³ Chayrayku tukuy ukhuy nanawan, onqoy warmi imaynatachus nanaywan q'ewiykachakun, ajinata q'ewiykachakuni. Chay llakikusqayqa mana uyarejta saqewanchu, manchachikuywan mana rikuytapis atinichu.

⁴ Yuyayniy chinkawan, chiri chirilla oqhariwan. Ch'isiyaykunanta suyasqayqa manchachikunaman tukupun.

⁵ Mesaqa churasqaña, patanmampis mast'ata churankuña, jatun mikhoyqa qallarikunña. Kamachejkuna sayariychej ari, escudotapis jawiychej!

⁶ Señorpuni ajinata niwan: Qanqa riy, uj qhawajtataj churamuy, tukuy rikusqanta willanampaj.

⁷ Sichus rikonqa, caballospi montasqasta, iskaymanta iskay jamushajta, wakenqa burrospi, chayri camellospi montasqasta chayqa, chayta sumajta qhawachun.

⁸ Qhawajqa león jina qhaparerqa: Wiraqochíy, maypichus kanaypi noqaqa kashani sapa p'unchay. Sapa ch'isi noqaqa imachá qhawanay kajta qhawashani.

⁹ Ashkha runasta caballospi montasqasta iskaymanta iskay jamushajta rikorqani. Chaymantataj nerqa: Babiloniaqa urmanña, urmanña, jinallataj lantisnimpis pampapi p'akirasqa rikhurin.

¹⁰ Ayllúy, trigo era jina sarusqa, wayrachisqataj. Noqaqa willarqayki Israelpa Diosnin Tukuy Atiyniyoj Señormanta imatachus uyarisqayta.

Edompa contrampi willay

¹¹ Edompa contranta willay: Pichá qhaparimuwan Seirmantapacha: Qhawaj runa, kunan ch'isi ima horasñatajri? Qhawaj runa, kunan ch'isi ima horasñatajri?, nispa.

¹² Qhawaj runataj kuticherqa: Sut'iyamushanña, chaymantaqa ch'isiyayñataj jamushan. Sichus munankichej tapukuyta chayqa, tapukuychej, ujtawantaj kutimuychej.

Arabiaj contrampi willay

¹³ Arabiaj contranta willay. Dedanmanta purejkuna, Arabia orqospi uj ch'isita puñunkichej.

¹⁴ Llojsiychej ch'akichikojta taripamoj, Temapi tiyakojkuna yakuta qoychej, ayqekojta taripamuychej mikhunatataj qoriychej.

¹⁵ Espadamanta ayqekushan, sumaj afilasqa espadamanta, flechanapaj mat'isqa arcomanta, chay sinch'i maqanakuymantawan.

¹⁶ Señortaj niwarqa: Kaymanta uj wataman, runaj sirvinan wata jina, Cedarpa tukuy jatun kaynin tukukonqa.

¹⁷ Cedarpa wapu flechajkunamantaqa pisilla qhepakonqanku, ajinata Israelpa Señor Diosnenqa nin.