Isaías 19 - Qheshwa Biblia DC

Egiptopaj uj willay jamun

¹ Uj willay jamun Egiptoj contrampi. Qhawariychej, Señorqa usqhayta rej phuyupi montasqa jamushan Egiptoman. Egiptopi kaj lantisqa payta rikuytawan kharkatitenqanku, egipciostaj maytapuni mancharikonqanku.

² Chaypacha egipciospurata maqanachisaj, sapa ujninkuta wauqesninkutawankama, sapa ujta runa masintawan, uj llajtata waj llajtatawan, uj nacionta waj naciontawan.

³ Egiptoj yuyayninta mana kajman tukuchisaj. Imastachus ruwananku kajtapis alqachisaj; chantataj paykunaqa taponqanku lantisninkuta, layqasninkuta, wañusqaspa almasninkuta ima.

⁴ Egiptotaqa sajra runaj makinman churasaj, paykunataqa rumi sonqoyoj rey kamachenqa. Ajinata Tukuy Atiyniyoj Señorqa nin.

⁵ Mar qochapi yakusqa pisiyanqanku, mayupi yakupis ch'akiponqa.

⁶ Larq'a yakusqa asnanqanku, jinallataj mayu yakuspis pisimanta pisi ch'akiponqanku. Chantaqa soqososwan totoraswampis ch'akiponqanku.

⁷ Ch'akillanqankutaj Nilo mayu patapi kaj q'omerkuna, mayu cantospi chajraspis. Jinamanta chinkapuspa manaña imapis kanqachu.

⁸ Challwirispis maytapuni llakikonqanku, mayupi anzuelota choqajkunapis sinch'ita llakikonqanku. Challwa jap'ina ch'ipata mayuman choqajkunapis mayta waqanqanku.

⁹ Sumaj kaj linomanta ruwajkuna, algodonmanta awajkuna, mana imanakuyta atenqankuchu.

¹⁰ Awayusta ruwajkuna umphus qhepakonqanku, tukuy llank'ajkunapis musphanqanku.

¹¹ Cheqamanta Zoanmanta kamachejkunaqa ancha wampus kanku. Faraompa aswan sumaj yuyaychajkunasnimpis wampu yuyaychajkuna kanku. Ajina kashaspapis, imaynatataj Faraonman ninkichejri: Noqayku yachayniyojkunaj wawasnin kayku, ñaupa reyespa wawasnin, nispari?

¹² Faraón, maytaj kunan chay yachayniyojkunasniykiri, nispa. Kunanqa nisuchunku ari, willasuchunkutaj Tukuy Atiyniyoj Señor imatachus Egiptoj contrampi ruwanqa chayta.

¹³ Zoampi kamachejkunaqa wampus kanku, Menfispi kamachejkunaqa ch'aukiyakunku; llajtasta kamachejkunapis Egiptota pantayman pusanku.

¹⁴ Señorqa paykunaman musphay yuyayta churarqa. Chayrayku Egiptoqa tukuy ima ruwasqampi pantakorqa, uj machasqa runa lanzasqan patapi lat'aykachan ajinata.

¹⁵ Manaña pipis Egiptopajqa imatapis ruwayta atinchu, ni uma, ni chupa, ni rama, chayri totorapis.

¹⁶ Chaypacha egipciosqa warmis jina manchachikuywan, kharkatitiywantaj junt'a kanqanku, Tukuy Atiyniyoj Señor paykunaj contrampi oqharikojtin.

¹⁷ Egipto nacionqa, Judá nacionta maytapuni manchachikonqa; sutinta yuyarispalla mayta manchachikonqanku Tukuy Atiyniyoj Señor Egiptoj contrampi imatachus ruwananta yuyarispa.

¹⁸ Chaypacha Egiptopeqa phishqa llajtas kanqanku hebreo parlayta parlajkuna, Tukuy Atiyniyoj Señorpa sutimpi juranqankutaj. Ujnin kajtaj Inti llajta sutichasqa.

¹⁹ Chaypacha kikin Egipto nación chaupipi Señorpaj uj altar kanqa, chay jallp'aj mojonnimpitaj Señorpa sutimpi uj rumita sayachenqanku.

²⁰ Chayta uj señal kanqa Tukuy Atiyniyoj Señorpa sutinta Egipto jallp'api yuyarikunankupaj. Paykunaqa Señormanta qhaparikojtinku enemigosninku ñak'arichejtin, Payqa uj salvajta kachamonqa, paykunata jark'anampaj.

²¹ Chaypacha Señorqa egipcioswan rejsichikonqa, paykunataj Señortaqa rejsenqanku, yupaychanqanku ima, uywata wañuchispataj jaywanqanku, chantá rikuchikusta ima. Paykuna Señorta sirvisaj nenqanku, junt'anqankutaj.

²² Señorqa Egipciosta jasut'enqa, chanta thañichenqa. Paykunataj Señorman kutirikonqanku, chaymantataj Señorqa paykunata khuyakuspa thañichillanqataj.

²³ Chaypacha uj jatun ñan Egiptomanta Asiriaman renqa. Asiriamanta kajkunaqa Egiptoman renqanku, jinallataj Egiptomanta kajkunapis Asiriaman renqanku. Jinamanta iskayninku Señorta yupaychanqanku.

²⁴ Chaypacha Israelqa, egipcioswan, asirioswan khuska kay jallp'a patapi bendicionta jap'enqa.

²⁵ Chaypacha Tukuy Atiyniyoj Señorqa bendicenqa nispa: Noqa bendicisaj Egipto aylluyta, noqaj ruwasqay asiriosta, chayaqey Israeltapis.