Isaías 18 - Qheshwa Biblia DC

Uj willay jamun Etiopíaj contrampi

¹ Ay, tiyulas sonanku, chaypi kaj nación, Etiopía mayu wasapi kaj jallp'a!

² Mar qochanta kachasta kachaj, yaku patanta totoramanta ruwasqa barcospi! Usqhayta correj kachas riychej, jatun karay yana runaspa llajtanman. Tukuy tiempo manchachikuna nacionman, atiyninwan atipaj llajtaman. Chay jallp'aqa ashkha mayusniyoj.

³ Tukuy kay mundontimpi tiyakoj runas, kay jallp'a patapi kajkuna, orqopi puntaspi bandera sayajta qhawariychej, pututu waqamojtimpis uyariychej.

⁴ Señorqa kay jinata niwan: Ch'inlla kakusaj, tiyakunaymanta qhawamullasaj, imaynatachus inti k'ancharimojtin k'ajarin ajinata, imaynatachus cosecha tiempopi q'oñimojtin, chhulla phuyu phuyuykun ajinata.

⁵ Uva sach'a t'ikayta pasajtin, uvas llulluyta qallarishajtin, manaraj cosecha tiempota chaypacha ramasninta k'uturanqanku. Mana allin kaj ramasnintataj p'akispa wijch'onqa.

⁶ Ajinamanta tukuy chaykuna p'isqospaj, sajra animalespajwan qhepakonqa. Chaypi p'isqosqa q'oñi tiempopi kanqanku. Kay jallp'a patapi sajra animalespis chaypi chiri tiempota pasanqanku.

⁷ Chaypacha, Tukuy Atiyniyoj Señorman, chay runas rikuchikuta apamonqanku; paykunaqa kanku jatun karay yana runas, qallariymantapacha tukuypa manchachikunan ayllu, tukuyta atipaj, kallpasniyojtaj; paykunaj jallp'asninkoqa mayuraralla. Chay rikuchikuta Sión orqoman apamonqanku, Tukuy Atiyniyoj Señorpa sutinta yupaychanku chayman.