Isaías 17 - Qheshwa Biblia DC

Damascoj llajtaj contrampi willay

¹ Damasco llajtaj contrampi willay: Damascoqa manaña llajtachu kanqa, manachayqa raqaykunallaña kanqa.

² Aroer llajtasqa wiñaypaj saqerpayasqas kanqanku; chayqa uywa corralllaña kanqa. Chaypi uywasqa puñonqanku, nitaj pipis mancharichej kanqachu.

³ Efraimpa kallpanqa manaña kanqachu, jinallataj Damascoj kamachiynimpis. Siriamanta pukojkunaqa israelitas jinallataj ruwasqas kanqanku. Ajinata Tukuy Atiyniyoj Señorqa nin.

Israelpa jasut'iynin

⁴ Chay p'unchaypi Jacobpa jatun kaynin pisiyaponqa, jinallataj ukhumpis tulluyanqa.

⁵ Chayqa kanqa imaynatachus uj ruthoj trigota ruthun jina, chayri imaynatachus uj runa makinwan espigasta pallan ajina, chayri Refaim vallepi imaynatachus cosechakun jina.

⁶ Chaypi rastrojollaña qhepakonqa; chayri imaynatachus olivo sach'ata thalajtinchej puntampi uj iskaylla aceitunas qhepakun, ajinata, chayri tawa, phishqallaña ramasnimpi qhepakun ajina. Ajinata nin Israelpa Señor Diosnenqa.

⁷ Chay p'unchaypi runaqa ruwajninman kutirenqa. Kikin ñawisninwantaj Israelpa Santo Diosninta qhawanqa.

⁸ Manaña makinwan ruwasqa altaresta qhawanqachu, nitaj waj imasta ruwasqasninkutapis, nitaj k'ullu lantistapis, nitaj intiman rijch'akoj lantistapis.

⁹ Chay p'unchaypi allin jark'asqa llajtasniyki saqesqas kanqanku, amorreoskuna, heveoskuna llajtasninkuta israelitasta manchachikuspa saqerqanku, ajinata. Jinamanta ch'impachaman tukonqa.

¹⁰ Qanqa salwajniyki Diosta qonqaporqanki. Mana qanqa jark'asoj chhankamanta yuyarikorqankichu. Astawampis qanqa sumaj sach'asta plantarqanki, waj dioskunata yupaychanallaykipaj.

¹¹ Plantarqanki chay p'unchaypacha wiñacherqanki; q'ayantimpachataj t'ikacherqanki. Chaywampis, chay poqoynenqa llakiy p'unchaypi chinkaponqa, chay mana allin kaytaj mana jampina kanqa.

¹² Ashkha llajtaspa ch'ajwasqanku uyarikun, mar qochaj sonaynin jina, chayqa ashkha nacionespa ch'ajwayninku, ashkha yakuspa sonaynimpis kanman jina.

¹³ Chaywampis Dios k'amejtinkama, llojsispa karuman ayqerikaponqanku. Imaynatachus uj q'opata wayra orqos patata apaykachan ajinata, chayri muyoj wayra jallp'ata oqharin ajinata.

¹⁴ Ch'isiyaykuyta paykunaqa may atiyniyoj manchachikuna jina kanku, sut'iyamuytataj manaña kankuñachu. Ajinamin patanchejpi purejkunaqa chayanku, jinallataj suwawanchej chaykunapis.