Isaías 16 - Qheshwa Biblia DC

Moab runas Judaman ayqekunku

¹ Sión orqoman, ch'in pampapi Selamantapacha, uj corderota apachiychej kay jallp'ata kamachejman.

² Moabpi tiyakojkunaqa Arnón mayu cantopi, mancharichisqas thapanmanta ayqekoj p'isqos jina kashanku.

³ Ninkutaj: Imaynatachus ruwanaykita niwayku ari, noqaykuta jark'akuwayku chaupi p'unchaypi llanthuykiwan pakaykuwayku ari ch'isin jina. Chay wijch'umusqa kajkunataqa pakaykuy ari, amataj ayqekojkunata jap'ichiychu ari.

⁴ Moabmanta ayqekojkunata wajyarikuy ari, chay ñak'arichejkunamanta qanqa pakay ari; imaraykuchus chay ñak'arichejqa tukukonqa. Chay jinatapuni tukuchejqa chinkanqa. Chay sarojpis kay jallp'a patapeqa chinkachisqa kanqa.

⁵ Chaypacha khuyakuywan kamachina tiyanata sayachenqa, chaypitaj Davidpa mirayninmanta uj rey tiyaykonqa. Payqa tukuy sonqowan cheqanchanqa, cheqan kajtataj sayachenqa, maychus kajtataj usqhayta ruwanqa.

⁶ Moab runaspa mayta wapuykachasqankuta uyariyku; mayta runaykachasqankuta, machu machu kasqankutapis. Chaywampis llullakusqasninkoqa mana cheqanchu kanqa.

⁷ Chayrayku Moabpi tiyakojkunaqa nacionninkumanta waqanku; may llakisqas waqanqanku Kir-hareset llajtapi runasmanta.

⁸ Hesbompi chajrasqa, Sibmapi kaj uva huertaswanqa ch'akipunku; waj nacionesta kamachejkuna sarurasqankurayku. Chay sach'aspa ramasnenqa Jaserkama chayarqa, ch'in pampanejtataj chinkarerqa, mar qochatapis pasarqa.

⁹ Chayrayku llakikuspa Jasermanta waqani, Sibmapi kaj uva huertasmantawan. Hesbonmanta, Elealemantawan waqayniyta jich'ani, imaraykuchus cosechasnin patapi maqanakupaj ch'ajwallaña uyarikun.

¹⁰ Llank'ana jallp'aspi kusiy takiy tukukaponqa, uva huertaspi manaña takiykuna kanqachu, manaña kusikonqankuchu, manaña vino ruwanapaj uvastapis ch'irwanqankuchu. Kusiywan ch'ajwanankoqa tukukun.

¹¹ Chayrayku tukuy sonqoywan Moabmanta arpa jina waqani, jinallataj Kir-haresetmantapis.

¹² Moabqa may jinatapis orqo pataman wicharispa sayk'unankama mañakuchun, yupaychana wasinmampis mañakoj yaykuchun, mana imatapis tarenqachu.

¹³ Kay palabrasta Señorqa Moabmanta nerqa unay tiempomantapachaña.

¹⁴ Kunantaj Señorqa kay jinata nin: Kinsa watamantawan uj llank'aj runaj sirvinan watasnin jina, Moabpa may uyarisqa atiynenqa, tukuy runasnintinwan urmanqanku, pisisllaña puchonqanku, nitaj imapis kanqañachu.