Isaías 13 - Qheshwa Biblia DC

Babiloniaj contrampi willay

¹ Amospa wawan Isaiasqa mosqoypi jina uj sut'inchayta rikorqa Babilonia imaynachus kananmanta.

² Uj q'ara orqo puntapi maqanakuna señalta uyarichiychej, chaypi jatunmanta maqanakupaj qhapariychej, makisniykichejta oqhariychej, kurajkunaj punkusninkuta yaykunankupaj.

³ Noqa kamachiniña ajllakusqasniyta, chantaqa wajyallanitaj wapu kamachisniyta phiñakuyniyta junt'anankupaj, atipasqaymanta kusikojkunata.

⁴ Orqospeqa ch'ajway uyarikun, ashkha runaspis ch'ajwashankuman jina. Chaypi uyarikun ashkha runaspa ch'ajwasqanku, ashkha nacionespa tantakuspa ch'ajwasqanku. Tukuy Atiyniyoj Señor soldadosninta maqanakupaj yupan.

⁵ Chaykunaqa karu llajtasmanta jamunku, kay pachaj tukukuyninmantapacha. Chaykunaqa Señorpa kachamusqasnin kanku, Señorpa k'ajaj phiñakuyninwan tukuynin jallp'ata tukuchinankupaj.

⁶ Qhapariychej, imaraykuchus Señorpa p'unchaynenqa qayllaña. Payqa tukuy atiyninwan chinkachenqa.

⁷ Chayrayku tukuy runaj makin llauchhuyanqa, jinallataj tukuy runaj sonqompis q'aymayanqa.

⁸ Kharkatiylla junt'aykonqa, llakiywan waqayllawan paykunataqa jap'enqa. Nanaylla, onqoy warmita jina jap'enqa. Sapa uj qhawarinakuspa mancharenqanku, imaraykuchus uyasninku nina jina k'ajarin.

⁹ Señorpa p'unchaynenqa manchaytapuni jamushan, manchay llakiy p'unchay, k'ajaj phiñakuywan k'ajarishaj, jallp'ata ch'impachata saqenampaj, juchasapastapis chinkachinampaj.

¹⁰ Chayrayku janaj pachapi kaj qoyllurkuna, imaschus k'anchajkuna ima manaña k'anchanqankuchu. Inti llojsimuytawan laqhayaykonqa, killapis manaña k'anchanqachu.

¹¹ Señorqa nin: Kay pachata juchanmanta jasut'isaj, sajra runasta millay juchasninkumanta. Sajra runaspa machu machuykachayninkuta ch'inyachisaj; May kasqankuta yuyakojkunata k'umuykachachisaj.

¹² Runastaqa qorimantapis astawan pisi tarikojta ruwasaj, Ofirpi qorimantapis astawanraj.

¹³ Chanta cielota kharkatichisaj. Jallp'apis kaynejman jaqaynejman kuyurenqa, chay p'unchaypi phiñakuyniy phatasqanrayku.

¹⁴ Runaqa mancharichisqa qhatiykachasqa taruka jina kanqa, mana michejniyoj ovejas jinataj. Sapa uj llajtankumankama ayqenqanku, jallp'ankumankamataj riponqanku.

¹⁵ Pillapis jap'ichikojqa t'ojsisqa kanqa, pichus taripachikojpis, espadawan wañuchisqa kanqa.

¹⁶ Wawasninkoqa qhawashajtinku pampaman ch'anqasqas kanqanku; wasisninkumanta imasninkuchus kajta suwaranqanku, warmisninkutapis qhenchacharanqanku.

¹⁷ Medosmanta kajkunata Babiloniaj contranta rijch'arichini, paykunaqa qolqemanta mana dakunkuchu, nitaj qoritapis munapayankuchu.

¹⁸ Waynasta flechaspa wañurachenqanku, nacesqa wawastapis mana khuyakuspa wañurachenqanku, jatuchaj wawastapis wañurachillanqankutaj.

¹⁹ Babiloniaqa nacionespa munakusqanku, caldeospa mentasqanku llajta. Chay llajtaqa tukukonqa Diospa tukuchisqan Sodoma, Gomorra llajtas jina.

²⁰ Manaña chaypi jayk'ajpis runa tiyakonqachu, nitaj llajtachakonqachu. Arabespis manañapuni jayk'ajpis chaypi jarakonqankuchu, nitaj michejkunapis chaypi uywasninkuta michenqankuchu.

²¹ Chaypeqa phiña sajra animalesllaña tiyanqanku; chay wasisninkupeqa ch'useqasllaña junt'a kanqanku. Chanta suris tiyanqanku, cabras imataj chaypi phinkiykachanqanku.

²² Palaciosninkupeqa atojkunalla waqanqanku, sumachaj wasisninkupitaj k'ita alqoslla tiyanqanku. Babiloniaj ñak'ariy p'unchayqa qayllamushanña, chay p'unchayqa jamonqapuni.