Isaías 12 - Qheshwa Biblia DC

Graciasta qonamanta takiy

¹ Chay p'unchaypi ninki: Graciasta qoyki, Señor, qanqa noqapaj maytapuni phiñakorqanki, chaywampis chay jina k'ajaj phiñakuyniykeqa manaña kanchu, astawampis sonqochawanki.

² Diosmin salvawajneyqa; payman noqaqa atienekuni, manañataj manchachikusajchu. Señormin pakakunayqa kallpaytaj. Paylla noqataqa salvawan.

³ Qankunapis kusiywan salvación juturimanta yakuta ujyankichej.

⁴ Chaypacha ninkichej: Señorman graciasta qoychej, sutinta jatunchaychej, imatachus ruwasqasninta runasman willamuychej, yuyarichiychej sutenqa may jatun kasqanta.

⁵ Señorman takiychej, imaraykuchus payqa sumaj imasta ruwan; chaytataj tukuy mundontimpi runas yachachunku.

⁶ Siompi tiyakojkuna kusiywan takiychej, imaraykuchus Israelpa Santo Diosnenqa qankunaj chaupiykichejpi kashan, tukuy jatun kayninwan.