Isaías 11 - Qheshwa Biblia DC

Cheqan reypa jamuynin

¹ Uj k'ullumanta ch'illchimonqa, chay k'ulloqa Isaí; saphisninmantataj ch'illchimoj wiñallanqataj.

² Chaypa patampi Señorpa Espíritun samarikonqa, chaytaj qonqa yachayta, yuyayta, yuyaychayta, atiyta, tukuy imata rejsiyta, Señorta manchachikuyta ima.

³ Payqa Señorta manchachikuyta astawan qonqa. Payqa mana rikusqanman jinallachu cheqanchanqa, nitaj uyarisqanman jinallachu allinta ruwanqa.

⁴ Manachayqa, cheqanta ruwaspa wajchasta cheqanchanqa, kay jallp'api llamp'u sonqoyojkunapaj cheqanta ruwanqa. Sajra runataqa palabrallanwan nanachenqa; siminmanta samaynillanwan juchasapataqa wañuchenqa.

⁵ Justiciawan ñañu wasanta chumpiykukonqa, cheqan sonqo kayninwan chumpiykukonqa.

⁶ Chaypacha atojwan ovejawan ujllapi kanqanku. Leonwan corderowampis ujllapi puñonqanku. Waka uñawan leonwampis khuska mikhonqanku. Chaykunatataj uj wawalla michenqa.

⁷ Wakawan jukumariwanqa khuska mikhonqanku, uñasninkupis khuska winkonqanku; leompis waka jina pastota mikhonqa.

⁸ Ñuñoj wawaqa cascabel katarej jusk'un patapi phujllakonqa, ñuñumanta p'itisqa wawapis katarej puñunanman makinta sat'illanqa.

⁹ Chay Santo orqoypeqa mana ima sajratapis ruwanqankuchu, imaraykuchus tukuy jallp'aqa Señorta rejsenqa, imaynatachus marman yaku junt'aykun ajinata.

¹⁰ Chaypacha Isaejpa saphinmanta ch'illchejqa, tukuy nacionespaj uj señal kanqa. Chay runastaj payta mask'anqanku; tiyakunantaj lliphipirenqa.

Apasqa kajkunaj kutimpuyninku

¹¹ Chaypacha Señorqa ujtawan atiyninta rikuchillanqataj, maykunapichus ayllusninmanta kajkuna puchorqanku chaykunata kutichimunampaj: Asiriamanta, Egiptomanta, Patrosmanta, Etiopiamanta, Elanmanta, Sinarmanta, Hamatmanta, Mar qocha cantosmantawan.

¹² Señorqa nacionespaj uj señalta oqharenqa, wijch'usqa israelitastataj ujllaman tantaykonqa. Judamanta ch'eqerasqas kajkunatataj tukuy mundontinmanta tantamonqa.

¹³ Efraín aylloj chejnikuynenqa tukukonqa, Judá aylloj enemigosnimpis chinkachisqas kanqanku. Efraín aylloqa manaña Judá aylluta chejnenqachu, nitaj Judá ayllupis Efraín aylluta llakichenqachu.

¹⁴ Iskaynintaj inti yaykuynejman kachaykukonqanku, filisteosmantaj wasankumanta urmaykonqanku, jinallataj inti llojsimuynejpi tiyakojkunajmanta tukuy imankuta qhechumonqanku. Edom nación, Moab nacionwampis paykunata sirvenqanku, jinallataj Amón naciompi kajkunapis paykunata kasonqanku.

¹⁵ Señorqa puka mar qochata ch'akichenqa, manchay atiyninwan makinta oqharenqa Eufrates mayunejman, uj sinch'i wayrata wayrachimuspataj chay mayuta qanchis mayusman t'aqarparenqa, chay jinamanta ujut'asnillankuwanña chimpanankupaj.

¹⁶ Asiriamanta Señorpa puchoj runasnin kutimunampajqa, allin ñan wakichisqa kanqa, imaynachus israelitas Egiptomanta llojsimunankupaj karqa, ajina.