Isaías 10 - Qheshwa Biblia DC

¹ Ay, qankunamanta imanallankichejchus mana cheqan leykunata orqhojkunaqa, ñak'arichinapaj leyesta orqhojkunaqa!

² Chaywan wajchasta justiciamanta t'aqankichej, llakisqaspa imachus paykunapaj kajta qhechunaykichejpaj. Viudasmantapis qhechunaykichejpaj. Wajcha wawasmantapis.

³ Imanankichejtaj cuentata qona p'unchaypiri? Piwantaj yanapachikunkichej karumanta jasut'i jamusojtiykichejri? Maymantaj chay jina qhapaj kayniykichejta churankichejri?

⁴ Qankunaqa presos jap'isqallaña kanaykichej, chayri wañusqaswan urmanallaykichejña. Chay tukuywampis Señorpa k'ajaj phiñakuynenqa manarajpuni thasnukunchu. Payqa makin oqharisqallarajpuni kashan.

Asiria runaswan Diosqa jasut'ichin

⁵ Asiria, qanqa phiñakuyniypi wajtanay k'aspi kanki, phiñakuspa oqharinay k'aspi kanki.

⁶ Asiriosta juchasapa runasman kachasaj, k'ajajta phiñachiwaj llajtaman pusasaj, imankuchus kajta, kapuyninkutapis qhechumunampaj, callespi t'uruta jina sarunampaj.

⁷ Astawampis Asiriamanta reyqa mana jinatachu yuyan, nitaj sonqompipis ajinatachus tanteashan. Manachayqa paypa yuyaynimpeqa, ashkha nacionesta chinkachiylla kashan.

⁸ Payqa ajinata nin: Manachu tukuynin runasneyqa reyes kanku?

⁹ Noqapajqa Calno llajtaqa Carquemis jinalla, Hamat llajtapis Arfad jinalla. Chanta Samariapis Damasco jinalla.

¹⁰ Ashkha lantisniyoj llajtasta tarini. Chay llajtasqa Jerusalenmanta, Samariamantapis aswan ashkha lantisniyoj kanku.

¹¹ Imaynatachus Samariata, lantisnintawan ruwarqani, ajinallataj Jerusalenta lantisnintawan ruwasaj.

¹² Señorqa Sión orqopi, Jerusalempiwan ruwaspaña, Asiria reytañataj jasut'enqa, anchata wapuykachasqanta, may kasqanta yuyakusqanmantataj.

¹³ Asiria rey nisqanrayku kaytaqa kallpaywan ruwani yachayniywan ruwani yuyayniyoj kasqayrayku; nacionespa jallp'asninkuta qhechuni, tukuy kapuyninkuta qhechumuni, reyesninkutapis may wapu kayniywan atiparparini.

¹⁴ Tukuy llajtaspa kapuyninkuta thapata jina jap'erqani, imaynatachus saqerasqa thapasmanta runtusta pallanku ajinata, chay tukuynin jallp'asta jap'ikapuni, mana pipis karqachu lijranta kuyuchej, nitaj siminta kicharej, nitaj chhur nejllapis.

¹⁵ Hachaqa k'utoj runamanta may sumaj kasqanta yuyakunmanchu? Sierrapis khuchoj runamanta may kasqanta yuyakunmanchu? Chayqa kanman uj k'aspi chayri tojnupis runata apaykachanman jina.

¹⁶ Chayrayku Tukuy Atiyniyoj Señorqa, kallpayoj runasninman llauchhuyayta apachimonqa, qhapaj kayninkutataj ninawan jap'iykuchenqa llant'ata jina.

¹⁷ Israelpa k'anchaynin Santo Diosnenqa, nina laurayman tukonqa; uj p'unchayllapi qhorasninta khishkasnintawan q'olarparenqa.

¹⁸ Chay tukuy k'acha montesninta, chay sumaj huertasnintawan, tukuyninta ruphaykonqa, uj onqosqa mana kallpayoj runata jina saqerparenqa.

¹⁹ Montesnimpi sach'asnenqa uj iskaylla qhepakonqa, uj wawaj yupanan jinalla.

²⁰ Chaypachaqa Israelpi pisis qhepakojkunaqa, Jacobpa mirayninmanta qhepakoj israelitasqa, manaña paykunata ñak'arichejkunapi atienekonqankuchu, manachayqa Israelitasqa santo kaj cheqa Señorpi sumajta sayanqanku.

²¹ Jacobpa mirayninmanta kaj israelitasmanta puchojkunaqa, manchay atiyniyoj Diosman kutirenqanku.

²² Mirayniykeqa Israel, mar qochaj t'iyun jinapis kanman chayqa, chaywampis chaymanta maychá puchonqa chayqa, kutimonqapuni. Tukuchinapaj nisqa kajqa tukukonqapuni, ajinamanta cheqanchayqa, sut'ipi kanqa.

²³ Tukuy Atiyniyoj Señorqa, imatachus kay pachapi ruwasaj nisqanta junt'anqapuni.

²⁴ Chayrayku Tukuy Atiyniyoj Señorqa ajinata nin: Siompi tiyakoj ayllúy, Asiria runasmantaqa ama manchachikuychu; k'aspiwan wajtasunanmantaqa. Paykunaqa qampa contraykipi tojnunkuta oqharenqanku, imaynatachus egipcios ruwarqanku ajinata.

²⁵ Kay pisi p'unchaykunamantawan phiñakuynin tukukonqaña, k'ajaj phiñakuyniy paykunata tukuchenqa.

²⁶ Tukuy Atiyniyoj Señorqa paykunata sumajta jasut'enqa, imaynatachus Oreb chhankapi madianitasta wañuracherqa ajinata, imaynatachus egipciospa contranta mar qochapi tojnunta oqharerqa ajinata.

²⁷ Chaypacha wasaykiman q'epirichisusqankoqa qhechusqa kanqa, jinallataj much'uykiman yugota churasusqankupis, ismonqataj chay yugoqa aceitewan jawisqa kasqaykirayku.

Asiriospa maqanakuyninku

²⁸ Chay jinata ñak'arichej runaqa Rimonnejta Ajatkama jamuspa Migronman chayan, soldadosnintataj Micmaspi saqen.

²⁹ Wayq'onta rispa, Gebapi jarakunku; Ramá llajtaqa maytapuni kharkatitin; Saulpa llajtan Gabaapi tiyakojkuna llojsispa ayqenku.

³⁰ Bat-Galin runas, jatunmanta qhapariychej; Laisa llajtayojkuna, uyariychej! Anatot llajtayojkunapis, kutichiychej!

³¹ Madmena runasqa mayta ayqenqanku, Gebimpi tiyajkunapis pakakunata mask'aspa ayqenqanku.

³² Chay maqajqa Nobpi samarikonqa chaymanta maqamunampaj makinta oqharenqa, Sión orqoj contranta, Jerusalempa lomanta.

³³ Qhawaychej, Tukuy Atiyniyoj Señorqa, manchay kallpanwan sach'asta mast'arparenqa. Aswan jatuchaj kaj sach'asqa k'utusqas kanqanku, aswan jatuchajpuni kajkunatajrí, pampaman urmachisqas kanqanku.

³⁴ Hachawan k'utusqas kanqanku chay sinch'i sach'arara montes, Líbano orqotaj manchayta sonaspa urmanqa.