Hechos 5 - Qheshwa Biblia DC

Ananías Safirawan

¹ Uj runa kallarqataj Ananías sutiyoj, warmintaj Safira. Paykuna jallp'ankuta venderqanku.

² Ananiastaj, warmin yachashajtin, wakin qolqeta pakaykuspa, wakillanta apostolesman aparqa.

³ Pedrotaj payta nerqa: Ananías, imaraykutaj supay sonqoykiman junt'aykorqa Santo Espirituman llullakunaykipaj, jallp'aykita vendesqayki qolqemanta wakinta pakaykunaykipaj?

⁴ Manaraj vendeshajtiyki jallp'aqa qampata karqa, vendejtiykipis manachu qampallatataj chay qolqe karqa? Imaraykutaj sonqoykipi yuyarqanki chay jinatapuni ruwanaykipaj? Mana runasmanchu llullakunki, astawanqa Diosman.

⁵ Ananiastaj kay palabrasta uyariytawan urmarqa, wañorqataj. Chayta yachajkunataj maytapuni mancharikorqanku.

⁶ Wayna runastaj, qayllaykuytawan Ananiaspa ayanta mayt'uykuspa jawaman orqhorqanku p'ampamunankupaj.

⁷ Kinsa horas jinamantaj, Ananiaspa warmin yaykumorqa, mana ni imata yachaspa imachus ruwakusqanmanta.

⁸ Pedrotaj Safirata taporqa: Niway, kay chhika qolqepichu jallp'ata venderqankichej? Paytaj nerqa: Arí, chay chhikapi vendekorqa.

⁹ Pedrotaj nerqa warmiman: Imaraykutaj qosaykiwan yachachinakorqankichej, Señorpa Espiritunman llullakunaykichej pajri? Kunitan kay punkuman chayamushanku qosaykita p'ampamojkuna, kikillantataj qantapis apasonqanku.

¹⁰ Chay kikimpitaj Safiraqa, Pedroj ñaupaqempi wañusqa urmarqa. Waynakunataj yaykumuspa, wañusqataña tariparqanku. Ajinamanta paytapis apallarqankutaj, qosampa qayllanmantaj p'ampaykorqanku.

¹¹ Iglesiamanta tukuy creejkunataj, tukuy kay imasta uyarejkunawan maytapuni mancharikorqanku.

Ashkha señales, milagros ima

¹² Apostolesnejta runakuna ukhupi ashkha señales, milagros ima ruwakorqa. Tukuy creejkunataj uj sonqolla tantakoj kanku Salomón punku nisqapi.

¹³ Waj runasmantaqa mana pipis creejkunawan tantakuyta munajchu kanku, chaywampis llajtamanta kajkuna mayta alabaj kanku.

¹⁴ Señorpi creejkunamantaj, astawan yapakamusharqanku, qharis ajinallataj warmispis.

¹⁵ Onqosqasninkutapis orqhorqanku callesman, chaypitaj suyachej kanku sirisqasta phulluspi, puñunaspi ima, Pedro chaynejta jamushajtin pillamampis Pedroj llanthun chayanampaj.

¹⁶ Jerusalenmantaj jamorqanku chay qayllapi juch'uy llajtasmanta, onqosqasninkuta apamuspa, millay supaykunaj ñak'arichisqan runastawan. Tukuyninkutaj thañisqas karqanku.

Apostolespaj ch'ajwa oqharikun

¹⁷ Chaymantataj jatun sacerdote, paywan kajkuna ima, saduceos t'aqamanta apostoleswan jap'inakuspa, maytapuni phiñakorqanku.

¹⁸ Apostolesta jap'iytawan, llajtapi carcelman wisq'aykucherqanku.

^19-20 Chay tutataj Señorpa ujnin angelnin cárcel punkuta kicharpayarqa, apostolesta jawaman orqhospataj, paykunaman nerqa: Riychej temploman, chaypitaj runasman willaychej tukuy kay kausay palabrasmanta.

²¹ Kayta uyarispataj apostolesqa sut'iyayta temploman yaykorqanku, yachacherqankutaj. Chaykamataj kuraj sacerdoteqa paywan kajkunawan ima chayman jamuspa, tantacherqa, jatun juntapi israelitasmanta kajkunata, tukuy kurajkunatawan. Carcelmantaj soldadosta kacharqanku apostolesta pusarimunankupaj.

²² Soldadostaj carcelman chayaspa mana tarerqankuchu apostolesta, kutirimuspataj maychus kasqanta willarqanku.

²³ Neqankutaj: Carcelman chayaspa, punkusta sumaj wisq'asqasta tarerqayku, qhawajkunapis punkuspa ñaupaqempi kasharqanku, punkuta kicharispataj mana pitapis chay ukhupi tarerqaykuchu.

²⁴ Kayta uyarispataj templota qhawajkunaj kamachejnin, kuraj sacerdotes ima iskayrayarqanku, mana yachayta atispa apóstoles chinkasqankumanta.

²⁵ Chayllamantaj uj runa jamorqa, paykunamantaj nerqa: Kunan chay carcelman wisq'achisqaykichej runasqa templopi runasman yachachishanku.

²⁶ Chay kamachejtaj soldadosninwan rispa, apostolesta allillawan pusarimorqanku, runata manchachikorqanku rumiswan ch'anqaykuchikunankumanta.

^27-28 Apostolesta juntaman pusaykamojtinkutaj, jatun sacerdote paykunata tapuyta qallarerqa: Manachu sinch'ita kamacherqayku amapuni chay jesuspa sutimpi yachachinaykichejta? Kunantaj yachachiyniykichejwan tukuy Jerusalén llajtamanña junt'aykuchinkichej. Qankunaqa astawanraj tumpawayku, chay runaj wañuyninmanta.

²⁹ Pedrowan apostoleswan kuticherqanku: Diostapuni ñaupajta kasunayku tiyan, runasta kasunaykumantaqa.

³⁰ Ñaupa tatasninchejpa Diosnenqa, Jesusta wañusqamanta kausarichimorqa. Payta qankunaqa cruzpi warkhuspa wañucherqankichej.

³¹ Diostaj atiyninwan Jesusta jatunman churarqa, kamachinampaj, salvanampajtaj. Diosqa munarqa Israel runakuna juchasninkuta saqespa Diosman kutirinankuta, juchasninku pampachasqa kanampaj.

³² Noqaykutaj tukuy imasta rikuyku, ajinallatataj Diosqa Santo Espirituta qorqa pikunachus payta kasojkunaman.

³³ Chayta uyarispa phiñarikuytawan, apostolesta wañuchiyta munarqanku.

³⁴ Juntapi uj fariseo leymanta yachachej, Gamaliel sutiyoj, tukuy runaspa allimpaj qhawasqan; nerqa askamalla apostolesta jawaman orqhonankuta.

³⁵ Juntapi kajkunamantaj nerqa: Israelitas, sumajta unanchaychej imatachus kay runaswan ruwanaykichejmanta.

³⁶ Yuyariychej imaynatachus kay ñaupaj p'unchaykunapi, uj Teudas nisqa rikhurimusqanta. Payqa yuyakorqa may atiyniyoj kasqanta. Chayraykutaj payta kasuspa tawa pachaj jina runas qhaterqanku. Teudasta wañuchejtinkutaj tukuy payta qhatejkuna ch'eqerarqanku, tukuy imastaj chinkaporqa.

³⁷ Chay qhepaman, Galileamanta Judasñataj rikhurimorqa runa yupana tiempopi. Paytapis ashkha runa qhatillarqataj. Payta wañuchisqankuta wantaj qhatejkunasnimpis kikillantataj ch'eqerarqanku.

³⁸ Kunantaj kayta niykichej, ama ni imanaspalla kay runasta kacharipuychej. Kay yachachisqanku, ruwasqasninku ima, runaspallata kanqa chayqa, chinkaponqa.

³⁹ Diosmantachus kanqa chayri, mana atiwajchejchu chinkachiyta. Pajtataj Diospa contrampi sayashaj rikhuriwajchej.

⁴⁰ Tukuyninkutaj Gamalielta kasorqanku. Apostolesta wajyaspataj jasut'icherqanku. Kamacherqankutaj ama Jesuspa sutimpi parlanankuta. Chaymantataj kachariporqanku.

⁴¹ Apostolestaj juntamanta llojsispa, may kusisqas riporqanku, paykunata Jesuspa sutinrayku ñak'arichisqankumanta.

⁴² Sapa p'unchaytaj mana sayk'uspa, templopi jinallataj wasimanta wasi purej kanku, Cristo Jesusmanta yachachispa.