Hechos 4 - Qheshwa Biblia DC

Pedrowan Juanwan kamachejkunaj ñaupaqempi

¹ Pedrowan Juanwan runasman parlashajtinku chayamorqanku sacerdotes, templota qhawajkunaj kamachisninwan, saduceoswan ima.

² Paykunaqa phiñakusharqanku, tukuy wañusqas Jesusnejta kausarimunankuta runasman yachachisqankumanta.

³ Chayrayku apostolesta jap'ispa wisq'aykucherqanku q'ayantinkama, ñapis ch'isiña kasqanrayku.

⁴ Paykunaj parlasqankuta uyarejkunamanta ashkhas creerqanku. Qharisllaraj phishqa waranqa jina karqanku.

⁵ Q'ayantintaj Jerusalempi tantakorqanku, Israelmanta kamachejkuna, kurajkuna, leymanta yachachejkuna ima.

⁶ Chayman tantakamullarqankutaj jatun sacerdote Anaswan, Caifaswan, Juanwan, Alejandrowan, tukuy jatun sacerdotespa ayllusninkuwan ima.

⁷ Chaymantataj Pedrota Juantawan pusachimuspa, ñaupaqenkupi sayaykuchispataj tapuyta qallarerqanku: Ima atiywantaj, chayrí pejpa sutimpitaj kay tukuy imasta ruwankichejri?, nispa.

⁸ Pedrotaj Espíritu Santowan junt'a kaspa nerqa: Israelpi kamachejkuna, kurajkuna ima.

⁹ Kunan p'unchay qankuna tapushawayku, uj suchu runapaj allin kajta ruwasqaykumanta, yachaytataj munaspa pinejtachus thañisqanta.

¹⁰ Tukuyniykichej, tukuy israelitaspis allinta yachaychej, kay runaqa qankunaj ñaupaqeykichejpi thañisqa sayashan, nazareno Jesucristoj sutinrayku. Kay Jesustaqa qankuna cruzpi chakatarqankichej, Diostaj payta wañusqamanta kausarichimorqa.

¹¹ Paymá chay Jesusqa, pimantachus escribisqapi nishan: Qankunaj wasi ruwajkunaj qhesachasqaykichej rumeqa, aswan sumaj wasi esquina rumiman tukupun.

¹² Salvacionqa Jesucristollapi tarikun. Kay pachapi mana waj suti runasman qosqa kanchu, mayqempichus salvasqas kananchejpaj.

¹³ Paykunaqa mayta t'ukuspa, qhawarqanku Pedrota Juantawan mana manchachikuspa parlajta, astawanqa yachaspa mana yachakuyniyoj runaslla kasqankuta. Rejserqankutaj kay runasqa Jesuswan khuska purisqankuta.

¹⁴ Chay thañisqa suchu runata apostoleswan khuska sayashajta rikuspa, kurajkunaqa mana contrampi ima niyta aterqankuchu.

¹⁵ Chaymantataj Pedrota Juantawan jawaman llojsichispa, paykuna ukhu tantakuspa parlarqanku.

¹⁶ Nerqankutaj: Imanasuntaj kay runaswanri? Jerusalempi tukuy tiyakojkuna yachanku kay milagrota ruwasqankuta. Chaytaqa mana pakayta atisunmanchu.

¹⁷ Amaraj kay tukuy imas llajtanchejpi astawan yachakunampaj, paykunata k'amispa mancharichina, ama kunanmanta qhepaman ni piman astawan kay Jesuspa sutimpi parlanankuta.

¹⁸ Chaymantataj, apostolesta wajyaspa kamacherqanku amapuni pimampis astawan parlanankuta, nitaj yachachinankuta Jesuspa sutimpi.

¹⁹ Pedrowan Juanwantaj, paykunaman kuticherqanku: Qankuna unanchaychej Diospa ñaupaqempi imachus cheqan kasqanta. Allinchu kanman qankunataraj ñaupajta kasunayku, chayrí Diostachu?

²⁰ Mana ch'in kayta atiykumanchu. Willanaykupuni tiyan imatachus yachasqaykuta, rikusqaykuta, uyarisqaykuta ima.

²¹ Ajinamanta kuraj kamachejkunaqa, maytapuni manchachispa Pedrota Juantawan kachariporqanku. Jasut'iytapis mana aterqankuchu runarayku, imaraykuchus tukuy runas Diosta yupaychasharqanku milagrota rikusqankumanta.

²² Chay suchu runaqa, mayqempichus milagro ruwakorqa chayqa, tawa chunka kuraj watasniyoj jinaña karqa.

Creejkuna Diosmanta kallpata mañakunku

²³ Kacharisqankutawantaj Pedrowan Juanwan paykunamanta kajkunaman rerqanku. Paykunamantaj willarqanku imaynatachus kuraj sacerdotes, kurajkunawan, tukuy imasta paykunaman nisqankuta.

²⁴ Paykunataj chayta uyarispa, tukuyninku uj sonqolla Diosman qhaparerqanku, nispa: Señor, qan ruwarqanki janaj pachata, kay pachatawan, jatun qochatapis, tukuy imas paykunapi kajkunatawan.

²⁵ Qanqa Santo Espiritunejta parlarqanki, tataykoj kamachiyki Davidpa siminnejta, kay jinata nerqanki: Imaraykutaj tukuy nacionesmanta runakuna ch'ajwanku? Imajtintaj tukuy aylluspis qhasi mana kajllata yuyankuri?

²⁶ Kay pachapi reyes oqharikorqanku, kamachejkunapis oqharikuspa ujllapi tantakorqanku Señorpa contrampi, Cristompa contrampi ima.

^27-28 Cheqamanta Herodesqa Poncio Pilatowan kay llajtapi tantakorqanku, gentileswan, israelitaswan ima; ajllasqa kamachiyki Jesuspa contrampi oqharikunankupaj, pitachus qan jawerqanki; ruwanankupajtaj imaynatachus qan qallariymantapachaña wakicherqanki atiyniykiwan, munayniykiman jinataj kanampaj.

^29-30 Kunanqa Señor, qhawariy imaynatachus phiñakuspa, manchachiwasqaykuta. Kunanqa kamachisniykita kallpachay ari, ama manchachikuspa palabraykita willanankupaj, makiykitataj aysarejtiyki onqosqas thañikunankupaj. Milagros jatun t'ukuna rikuchinas ima ruwakuchunku, ajllasqa kamachiykej Jesuspa sutinnejta.

³¹ Diosmanta mañakuyta tukusqankutawantaj, maypichus kasharqanku chay cheqa kuyurerqa. Tukuyninkutaj Santo Espirituwan junt'asqas karqanku, Diospa palabrantataj mana manchachikuspa willayta qallarerqanku.

Tukuy ima tukuyninkojta karqa

³² Chay chhika creejkuna uj yuyaylla, uj sonqolla karqanku. Mana pipis nejchu kapuynin paypata kasqanta. Manachayqa tukuy imas tukuyninkojta karqa.

³³ Apostolesqa imatachus yachasqankuta manchay atiywan willasharqanku, Señor Jesuspa kausarimpusqanmanta. Diostaj ashkhata yanapaj tukuyninkuta.

³⁴ Paykuna ukhupitaj mana pipis pisichikojchu. Jallp'asniyojkunaqa wasisniyojkuna ima, chay kapuyninkuta vendemuspa qolqeta apamoj kanku.

³⁵ Chay qolqetataj apostolesman jaywaj kanku. Chaymantataj rak'iraj kanku sapa ujman, maychus pisichikusqankuman jina.

³⁶ Paykuna ukhupitaj José sutiyoj runa, Chipre churumanta karqa Leví ayllumanta. Apostolestaj payta suticharqanku Bernabé nispa; chayqa niyta munan sonqochaj.

³⁷ Bernabepis jallp'anta vendemorqa, chay qolqeta apamuspataj apostolesman jaywarqa.