Hechos 28 - Qheshwa Biblia DC

Malta nisqa churupi

¹ Jallp'aman chayaspataj, yacharqayku Malta churupi kasqaykuta.

² Chay jallp'api tiyakojkunataj sumaj sonqowan yanapawarqayku. Paykunaqa ninata jap'icherqanku q'oñikunaykupaj, imaraykuchus paramusharqa, chirimusharqataj.

³ Pablotaj, uj marq'a llant'ata oqharispa ninaman kanaykusharqa. Chayllamantaj, uj katareqa ninamanta ayqemuspa Pabloj makinman warkhuykukorqa.

⁴ Chaypi tiyakojkunataj, Pabloj makimpi katari warkhurayajta rikuspa, paykunapura ninakorqanku: Kay runaqa cheqatapunichá runa wañuchi kanman. Qochamanta salvakojtimpis, Diospa cheqanchaynenqa mana kausajta saqenchu.

⁵ Pablotaj, makinmanta katarita ninaman thalaykorqa, mana imanasqataj karqa.

⁶ Paykunataj Pablota qhawaspa suyasharqanku punkiykunanta, chayrí ujllata wañusqa wijch'ukunanta. Unayta suyaspa, manataj ni imanasqata rikuspa, waj jinatañataj yuyasharqanku: Kay runaqa diospuni, nispa.

⁷ Maypichus kasharqayku chay qayllapi jallp'ataj, churupi kamachej Publio sutiyojpata karqa. Payqa wasinman wajyariwarqayku, kinsa p'unchay junt'atataj sumajta mikhuchiwarqayku.

⁸ Chaypachataj Publioj tatan camapi onqosqa kasharqa q'oñi onqoywan, wijsa q'ewiywan ima. Pablotaj payta watukoj yaykorqa; Diosmanta mañakuspataj, onqosqaman makisninta churaykuspa thañicherqa.

⁹ Chayta ruwajtintaj, chay churupi waj onqosqaspis payman jamuspa thañikaporqanku.

¹⁰ Chay runastaj manchay jatumpi jap'iwarqayku. Barcopi ripushajtiykupis, ñampaj tukuy imata churapuwarqayku.

Pablo chayan Romaman

¹¹ Kinsa killata churupi kasqaykumantataj, Alejandría barcopi riporqayku. Chay barcoqa Malta churullapitaj sayarqa chay chiri killaspi, sutintaj Castorwan Poluxwan karqa.

¹² Siracusaman chayaspataj, chaypi kinsa diata karqayku.

¹³ Chaymanta mar qochaj cantollantapuni rispa Regio llajtaman chayarqayku. Q'ayantintaj uramanta wayramusqanrayku iskay diapi Puteoliman chayarqayku.

¹⁴ Chaypitaj tarerqayku hermanosta. Paykunataj mañawarqayku qanchis diata paykunawan kanaykuta. Chay qhepatataj Romaman rerqayku.

¹⁵ Romapi hermanostaj chayanaykumanta yachaspa, ñanman taripaj llojsimorqanku Apio Forokama, wakintaj kinsa Tabernas nisqaman. Pablotaj hermanosta rikuspa Diosman graciasta qorqa, kusiywantaj astawan kallpachakorqa.

¹⁶ Romaman chayasqaykutawantaj, [capitanqa presosta entregarqa soldadosta kamachejman]. Pablotataj, waj wasipi sapanta saqerqanku, waqaychaj soldadowan.

Pablo willan judiosman

¹⁷ Kinsa p'unchayninman, Pablo wajyacherqa atiyniyoj judiosta. Tantakamojtinkutaj Pabloqa paykunaman nerqa: Wauqekuna, noqaqa mana ima juchata ruwanichu llajta masisniypaj; nitaj ñaupa tatakunaj ususnintapis p'akerqanichu. Mana imallamanta Jerusalempi presochawarqanku, romanosmantaj entregawarqanku.

¹⁸ Romanostaj rimarichiwayta munaspa tapuwarqanku; noqapi mana ima juchata wañuchinawankupaj jina tarispataj, kacharipuwayta munarqanku.

¹⁹ Judiostaj, mana kacharinawankuta munarqankuchu. Chayrayku noqa munarqani jatun kamachej uyarinawanta. Mana noqaqa llajta masisniyta ch'atanaypajchu kashani kaypi.

²⁰ Chayrayku wajyacherqaykichej, qankunata rikuyta munaspa, kay imasmanta parlanaypaj. Israel aylloj suyayninrayku, kay cadenaswan watasqa kashani.

²¹ Paykunataj Pabloman nerqanku: Judeamanta mana ni ima cartata qanmanta willachispa apachimuwaykuchu, nitaj mayqen wauqepis jamunchu ima sajrata qanmanta willaj.

²² Chaywampis, qampa simiykimanta uyariyta munayku imatachus yuyasqaykita, imaraykuchus tukuynejpi parlasqaykita uyariyku, chay mosoj t'aqaj contranta tukuynejpi oqharikusqankuta.

²³ Chaymanta parlanankupajtaj uj p'unchayta ajllarqanku. Aswan ashkhataj jamorqanku Pabloj chayakusqan wasiman. Paqarinmantapacha ch'isiyanankama, Pabloqa paykunaman yachacherqa Diospa reinonmanta. Atisqantataj Jesusmanta yachacherqa imaynatachus Moisespa leynimpi profetaspa escribisqampi ima Jesusmanta willasqankuta.

²⁴ Wakinkunaqa Pabloj parlasqanta sumajta jap'eqarqanku, wajkunataj mana creerqankuchu.

²⁵ Paykunapura mana uj yuyaylla kaspa riporqanku, Pablotaj paykunaman nerqa: Allintapuni Santo Espiritoqa ñaupa tatasninchejman nerqa Isaías profetanejta:

²⁶ Kay runakunaman rispa willamuy: Qankunaqa uyarillankichej, manataj imachus kasqanta entiendenkichejchu. Qhawashaspapis mana yachankichejchu imatachus qhawasqaykichejta.

²⁷ Kay runasqa rumi sonqos kanku, ñak'ayllata uyarinku, ñawisninkutataj wisq'anku. Sitajchus ñawisninkuwan, ningrisninkuwantaj uyarinkuman, sonqonkuwantaj noqaman kutirimuwankuman chayqa, noqa paykunata thañichiyman, nin Dios Tataqa.

²⁸ Pabloqa nillarqataj: Kunan qankuna yachaychej. Diospa salvacionnenqa gentilesman willakonqa, paykunataj uyarenqanku. [

²⁹ Pablo chayta nisqantawantaj, judiosqa riporqanku, paykunapura mayta churanakuspa.]

³⁰ Iskay watata Pabloqa Romapi karqa. Wasi jap'ikusqampi tiyakorqa; payta watukojkunatataj chayman wajyaj.

³¹ Paytaj mana manchachikuspa, Diospa reinonmanta yachacherqa, Señor Jesucristomantawan, nitaj pipis paytaqa jark'arqachu.