Hechos 27 - Qheshwa Biblia DC

Pablota Romaman apachinku

¹ Maypachachus Italiaman barcopi rinayku yachakorqa, chaypacha Pablota, waj presostawan khuska Julio sutiyoj capitanman jap'icherqanku. Julioqa capitán karqa Augusto nisqa romano soldadospapi.

² Adramicio puertomanta barcoman wicharerqayku Asia puertosman rinaykupaj. Noqaykuwan rillarqataj Tesalonicapi Macedoniamanta Aristarco.

³ Q'ayantintaj Sidón llajtaman chayarqayku. Capitán Juliotaj k'acha runa kasqanrayku, Pablota saqerqa rejsisqasta watukojta, imallapipis yanaparinanku paj.

⁴ Chaymantataj riporqayku Chipre churu wasanta, imaraykuchus wayra anchatapuni ñaupaqeykumanta wayramusharqa.

⁵ Mar qochallantapuni rispa, Ciciliaj cantonta, Panfiliajtawan; chayarqayku Liciapi kaj Mira llajtaman.

⁶ Capitantaj chaypi tarerqa Alejandriamanta barcota, Italiaman llojsishajta. Chay barcomantaj wicharichiwarqayku.

⁷ Ancha allinmanta barcopi rispa, ashkha p'unchaykunapi Gnido llajtaman ñak'ayta qayllarqayku. Wayra contraykupi kajtintaj Salmompa chimpanta rerqayku, Creta churuta muyuykuspa.

⁸ Jallp'a qayllantapuni rispa, ñak'aymanta chayarqayku sumaj Puertos nisqaman. Lasea llajtataj chay qayllapi karqa.

^9-10 Mana usqhayta risqaykuraykutaj, anchata qheparikorqayku; barcopi rinapajtaj mana walejñachu karqa; ayuno tiempopis pasaporqaña. Chayta yachaspataj Pabloqa ñaupajmanta paykunaman unanchacherqa, nispa: Reparani kaymanta ñaupajman ñak'ariykuna jamunanta. Cargata chinkachisun, barcotapis; noqanchejpajpis mana walejchu kanqa.

¹¹ Capitantaj mana kasorqachu Pabloj nisqanta. Payqa kasorqa barcoj dueñonta, barco purichej runatawan.

¹² Mana allin puertochu karqa, chiri tiempopi kanapaj; chayrayku tukuyninku munarqanku chaymanta ripuyta, atispaqa Fenicekama. Chaypitaj munarqanku chiri killaspi kakuyta. Fenicetaj Cretapi karqa, inti yaykuy qhawarisqa.

Sinch'i wayra marpi

¹³ Uranejmanta wayra pisita wayramorqa; paykunaqa nerqanku allin wayralla kasqanta barcopi rinapaj. Chayrayku barcoj sayachinan anclasta, yakumanta aysamuytawankama purirerqanku Creta churu qayllanta.

¹⁴ Manaraj karuta rishajtiykutaj, Euroclidón nisqa sinch'i wayra, manchay atiywan wayramuspa barcota mana rejta saqerqachu.

¹⁵ Ñaupaqeykumanta wayra wayramuspa, kayman jaqayman barcota apaykachasharqa; mana imaynamanta barcota cheqanchayta atispataj wayrawan apachikorqayku.

¹⁶ Uj pisitataj wayramanta jark'ariwarqayku Cauda nisqa juch'uy churu, chay qayllanta rejtiyku. Chaypitaj ñak'ayllata balsata wicharichimorqayku, barco aysamusharqa chayta.

¹⁷ Balsata oqhariytawan, barcotañataj waskaswan mat'ita watarqanku. Chaymantá manchachikuspa, Sirte nisqa t'iyusman barco sat'iykukunanta yuyaspa, barcoj toldosninta uraykucherqanku, ajinamanta wayrallawanña apacherqanku.

¹⁸ Q'ayantintaj, wayra manapuni thañejtin, yakuman cargasta wijch'uykuyta qallarerqanku.

¹⁹ Minchhantintaj, makisniykuwan barcoj imasninta yakuman wijch'uykullarqaykutaj.

²⁰ Ashkha p'unchaykunataña karqayku mana intita rikuspa, nitaj qoyllurkunatapis; sinch'itataj paramusharqa, wayramusharqataj. Noqaykutaj yuyarqayku manaña kausayta.

²¹ Unaytaña mana mikhusqas kasqaykurayku taj, Pabloqa chaupinkupi sayaykuspa nerqa: Tatakuna kasullawankichejman karqa Cretapi qhepakunanchejta, mana kay jinata ñak'arishasunmanchu karqa, nitaj imasninchejtapis wijch'uykusunmanchu karqa.

²² Kunantaj sonqochakuychej. Mana mayqenninchejpis wañusunchu, barcollata chinkachisun.

²³ Tuta rikhuriwarqa Diospa angelnin. Chay Diospata kani, paytataj yupaychashani.

²⁴ Chay angelqa niwarqa: Ama manchachikuychu, Pablo. Jatun kamachejpa ñaupaqempi rikhurinayki tiyan. Diostaj qanrayku wañuymanta jark'anqa tukuyta, barcopi qanwan rejkunata.

²⁵ Chayrayku, wiraqochis, sonqochakuychej. Noqa creeni Diospa niwasqan junt'akunanta.

²⁶ Chaywampis allin kanman, wayra uj churuman wijch'urparinawanchej.

²⁷ Ajinata chunka tawayoj tutataña karqayku, wayrataj wayramuspa apaykachawarqayku Adriático nisqa mar qochapi. Uj ch'isi chaupi tutanejta, barcopi llank'ajkuna yuyarqanku jallp'a qayllapiña kasqaykuta.

²⁸ May jina ukhuchus yaku kasqanta yachanankupajtaj, waskata kachaykorqayku, yacharqaykutaj iskay chunka brazadas kasqanta. Astawan ñaupajman chayaspa, kikillantataj waskata kachaykuspa, yacharqayku chunka phishqayoj brazadas kasqanta.

²⁹ Barco qaqaman tinkunanta manchachikuspa, barcoj qhepanmanta kachaykorqayku tawa anclasta. Suyarqaykutaj usqhayta sut'iyamunanta.

³⁰ Chaykamataj barcopi llank'ajkunaqa ayqeyta munasharqanku; chaypajtaj barcoj ñaupaqenmanta balsata uraykucherqanku, anclasta kachaykoj jinalla.

³¹ Pablotaj nerqa capitanman, soldadosman ima: Kay barcota purichejkunachus barcopi mana qhepakonqanku chayqa, mana qankunapis salvakuyta atinkichejchu.

³² Soldadostaj balsaj waskasninta khuchurparispa yakuman wijch'uykorqanku.

³³ Sut'iyamushajtintaj Pablo tukuyninkuta kamacherqa mikhunankuta, nispa: Ñapis chunka tawayoj diastaña mana mikhuspa kankichej, nitaj puñuspa.

³⁴ Ama jinachu kaychej. Imallatapis mikhurikuychej kausayta munaspaqa, mana uj chujchallapis umaykichejmanta chinkanqachu.

³⁵ Chayta niytawantaj Pabloqa t'antata oqharispa, tukuypa rikunanta Diosman graciasta qorqa, partispataj mikhuyta qallarerqa.

³⁶ Tukuyninku sonqochakuspa, mikhullarqankutaj.

³⁷ Tukuyniykupitaj karqayku iskay pachaj qanchis chunka sojtayoj runas.

³⁸ Sajsakuspataj barcota chhallayachinankupaj, trigota wijch'uykorqayku yakuman.

Barco t'iyuman chinkaykapun

³⁹ Sut'iyamojtin taj mana yachakorqankuchu maypichus kasqankuta. Qhawaykachashaspataj uj t'iyu pampata rikorqanku, munarqankutaj atikojtenqa chaykama barcota chayachiyta.

⁴⁰ Anclaj cadenasninta k'uturparispa, yakupi saqerparerqanku; chaymantataj ñaupajman richej remosta phaskararqanku; wayrataj wayramuspa, barcota playaman qayllacherqa.

⁴¹ Barcorí ujllata yaykuykorqa iskay qochas yaku tinkuyman, yakutaj barcoj ñaupajninta t'iyuman sat'iykorqa mana kuyuriyniyojta; qhepanmantataj yaku wajtakamuspa t'unaykusharqa barcota.

⁴² Soldadostaj munarqanku tukuynin presosta wañurachiyta, ama mayqenninku wayt'aspa llojsiytawan ayqerikapunankupaj.

⁴³ Soldadospa capitannintaj, Pablo mana wañunanta munaspa, jark'akorqa; kamacherqataj tukuy wayt'ayta yachajkuna, wayt'aspa ñaupajta jallp'aman llojsinankuta.

⁴⁴ Mana wayt'ayta yachajkunatataj nerqa, chay ñaupajta rejkunata qhatinankuta, tablasman mak'alliykuspa; chayrí barcomanta ima p'akisqallapipis. Chay jinamanta, tukuyninku mana imanasqas ch'aki jallp'aman chayarqanku.