Hechos 26 - Qheshwa Biblia DC

Pablo kutichikun rey Agripaman

^1-2 Agripataj nerqa: Atinki qan kikiyki uyarichikuyta. Pablotaj makinta oqharispa, kay jinata kutichikorqa: Rey Agripa, kunan allin kusisqa kani, ñaupaqeykipi kutichikuspa tukuy imasta judíos tumpawasqankumanta.

³ Astawanqa kusikuni qan allinta rejsisqaykirayku judiospa ususninta. Chayrayku mañakuyki ama sayk'uspa uyarinawaykita.

Pabloj ñaupaj kausaynin

⁴ Tukuy judíos yachanku imaynatachus juch'uy kasqaymantapacha kausasqayta llajta masisniywan, jinallatataj Jerusalempipis.

⁵ Paykunaqa rejsiwarqanku ñaupajmantapacha. Munaspaqa parlachunku imaynatachus cheqan religionniykuman jina fariseo kasqayta.

⁶ Kunanqa juchachasqa kani, ñaupa tatasninchejman, Dios imatachus qosqaykichej nisqampi suyasqayrayku.

⁷ Israelpa chunka iskayniyoj ayllusnimpis, Dios qosqaykichej nisqan junt'akunanta suyashallankutaj, tuta p'unchay Diosta yupaychaspa. Chayta suyasqayrayku, rey Agripa, noqatapis juchachashawanku judiosqa.

⁸ Imaraykutaj qankuna mana creenkichejchuri Diosqa wañusqasta kausarichimunanta?

Pablo nin creejkunata ñak'arichisqanta

⁹ Cheqamanta noqa yuyarqani nazareno Jesuspa contranta, tukuy ima sajrata ruwanay kasqanta.

¹⁰ Ajinata ruwarqani Jerusalempi. Kuraj sacerdotesmanta atiyta qochikuspataj, creejkunata carcelman wisq'acherqani. Paykunata wañuchishajtinkupis noqaqa kusikorqani.

¹¹ Ashkha kutista paykunata sinagogaspi jasut'ichispa, Jesuspa contranta parlachiyta munaj kani. Chay jinatapuni phiñakuspa paykunata qhatiykacharqani karu llajtasnintimpi.

Pablo willan Diosman kutirisqanta

¹² Chayrayku Damasco llajtaman risharqani, kuraj sacerdotesmanta ordenta orqhospa.

¹³ Ñanta rishajtiytaj, Reyníy, chaupi p'unchaynejta rikorqani cielomanta k'anchay muyuykuwajta, noqawan rejkunatawan. Chay k'anchayqa intimantapis astawan k'ancharerqa.

¹⁴ Tukuyniykutaj pampaman urmarqayku. Uj parlamuwajtataj uyarerqani, hebreo parlaypi: Saulo, Saulo, imaraykutaj qhatiykachashawanki? Mana walejchu aguijompa puntanta jayt'anaykeqa, nispa.

¹⁵ Noqataj nerqani: Pitaj kanki, wiraqochi? Paytaj kutichiwarqa: Noqa Jesús kani, pitachus qhatiykachashanki chay.

¹⁶ Kunantaj jatarikuspa sayaykuy, imaraykuchus chaypaj qanman rikhuriyki, kamachiy kanaykipaj. Kunan p'unchay imatachus rikusqaykita wajkunaman willamunaykipaj. Imastawanchus qhepaman rikuchisqayki chaykunatawan.

^17-18 Llajtaykej atiyninmanta jark'asqayki, ajinallatataj gentilespamantapis; pikunamanchus kunan kachasqayki, ñawisninkuta kicharinaykipaj, laqhamanta sut'iman llojsimunankupaj, Supaypa atiyninmantataj Diosman kutirinankupaj. Noqapi creesqankurayku juchasninku pampachasqa kanqa, Diospa ajllasqasninwan khuska chayaqenkuta jap'inankupaj.

Pablo kasun mosqoypi jina kamachisqata

¹⁹ Kayrayku, reyníy Agripa, janaj pachamanta Jesús rikhurimuwaspa kamachiwasqanta kasushani.

²⁰ Damascopiraj willayta qallarerqani, chaymantá Jerusalempi, qhepantataj tukuy Judeapi; chaymantarí gentiles ukhupi ima, paykuna sajra kausayta saqespa Diosman kutirikunankuta; sumaj ruwanasta ruwaspa rikuchinankupaj Diosman kutirisqankuta.

²¹ Chayrayku judiosqa presochawarqanku templopi kashajtiy, wañuchiwayta munaspa.

^22-23 Diospa yanapayninwan kunankama kashani willaspa wajchakunaman, ajinallatataj atiyniyojkunamampis; mana yapaspa, nitaj qhechuspa profetaspa nisqanta; nillataj Moisespata, imachus kasqanta willasqankuta; imaynatachus Cristo ñak'arinanta, paytaj wañusqasmanta ñaupajta kausarimunanta; salvación k'anchay willakunampaj Judiosman, ajinallatataj karu llajtasmampis.

Pablo evangeliomanta willan rey Agripaman

²⁴ Ajinata Pablo kutichikushajtintaj, Festo jatunmanta nerqa: T'ojpikushanki, Pablo! Ancha yachayniykiwan locoyasqa kashanki.

²⁵ Pablotaj kutichikorqa: Mana locoyashanichu, ancha respetasqa Festo. Tukuy parlasqayqa cheqapuni, yuyayniypitaj kani.

²⁶ Kay tukuy imasmanta rey Agripaqa yachan. Chayrayku paypa ñaupaqempi parlashani tukuy sonqo; imaraykuchus mana yuyanichu kay tukuy imas pakaypi ruwakusqanta.

²⁷ Rey Agripa, creenkichu profetaspa nisqankuta? Noqa yachani creesqaykita.

²⁸ Agripataj Pabloman nerqa: Yaqhapuni cristianoman tukuchiwanki.

²⁹ Pablotaj kuticherqa: Pisitawan, chayrí astawampuni Dios munachun, mana qanllachu, manachayrí tukuy uyariwajkuna ima, kunan p'unchay noqa jina creejkuna kanaykichejta, astawanqa mana cadenasllawan.

³⁰ Ajinata Pablo nisqantawantaj, sayarerqanku rey Agripa, kamachej Festo, Berenice, tukuy paykunawan kajkunapis.

³¹ Jawaman llojsispataj ninakorqanku: Kay runajtaqa mana ima juchampis kanchu wañuchinapaj jina, nitaj presochanapajpis.

³² Agripataj nerqa Festoman: Kacharipusunmanña karqa, manachus jatun kamachejwan juzgachikuyta munanman karqa chayqa.