Biblia Todo Logo
Bìoball air-loidhne

- Sanasan -

Hechos 25 - Qheshwa Biblia DC


Pablo parlan Festowan

1 Festotaj chay provinciaman chayamuspa, kinsa p'unchayninman Cesareamanta Jerusalenman wicharerqa.

2 Chaymantaj jamorqanku kuraj sacerdotes, judiosmanta aswan atiyniyojkunawan, Pablota ch'ataykunankupaj.

3 Festomantataj mañakorqanku Jerusalenman Pablota pusachinanta; imaraykuchus paykunaqa ñapis yachachinakorqankuña ñampi wañuchinankupaj.

4 Festotaj paykunaman nerqa: Pabloqa Cesareapi presochasqa kashan. Noqapis usqhayllata pisi p'unchaymantawan kutiripusaj.

5 Qankunata kamachejkuna noqawan khuska Cesareaman uraykuchunku, jaqaypitaj chay runa juchayoj kajtenqa ch'ataykuychej.

6 Festotaj Jerusalempi qhepakorqa pusajtachus, chayrí chunka diatachus; chaymantataj Cesareaman uraykorqa. Q'ayantimpachataj, juzgadopi tiyaykukuspa kamacherqa Pablota ñaupaqenman pusamunankuta.

7 Pablo yaykumojtintaj, judíos Jerusalenmanta jamojkuna Pablota muyuykorqanku. Ch'ataykuytataj qallarerqanku tumpaspa jatuchaj juchasmanta, manataj Pablota uyanchayta aterqankuchu.

8 Pablotaj kutichikuspa nerqa: Mana noqaqa ima juchatapis ruwanichu judiospa leynimpa contrampa, nitaj templojpipis, nillataj Cesarpa contrantapis.

9 Festotaj judiosman allinta rijch'ayta munaspa, Pablota taporqa: Munawajchu Jerusalenman riyta, chaypitaj kay imasmanta noqa juzgasunayta?

10 Pablotaj kuticherqa: Cesarpa juzgadompi kashani, chaypi juzganawanku tiyan. Mana ima sajratapis judiospajqa ruwanichu. Qan allinta chaytaqa yachanki.

11 Chayrayku, ima juchatachus wañunaypaj jina ruwayman karqa chayqa, mana manchachikunichu wañuyta. Tumpawasqanku mana jina kajtenqa, ni pi atinmanchu jap'ichiwayta. Chaypajwanqa, jatun kamachej uyariwachun.

12 Festotaj kamachejkunaman parlaspa, Pabloman kuticherqa: Jatun kamachej uyarinasunta munanki chayqa, jatun kamachej uyarisuchun.


Pablo rey Agripaj ñaupaqempi

13 Pisi p'unchaykunamanta, Cesareaman rey Agripa Berenicewan jamorqanku Festota watukoj.

14 Unaytaña chaypi kasqankumantaj, Festo willarqa rey Agripaman Pablomanta: Kaypi uj preso kashan Felixpa saqesqan.

15 Jerusalempi kashajtintaj, judiosmanta kuraj sacerdotes, kurajkunawan jamuspa, payta ch'ataykorqanku, mañawarqaykutaj wañunampaj juchachanayta.

16 Noqataj paykunaman nerqani romanosqa mana pitapis juchachallankuchu wañunampaj manaraj uyanchashaspa, nitaj uyarispa kutichikusqanta.

17 Kayman jamojtinkutaj, q'ayantimpacha juzgadopi tiyaykukorqani, Pablotataj pusachimorqani.

18 Ch'atajkuna tantakojtinkutaj, noqaqa yuyarqani ima sajramantachá uyanchanankuta, manataj jinachu karqa.

19 Paykunaqa Pablota ch'ataykorqanku diosninkuta yupaychanamanta; chaymantaqa uj Jesús wañusqa runamanta, pitachus Pablo nin kausashasqanta.

20 Kay imasmanta mana yachaspa imaynatachus ruwanayta, Pablota taporqani: Munankichu Jerusalenman riyta, chaypitaj kay imasmanta uyarichikuyta?, nispa.

21 Pablotaj munarqa jatun kamachejwan uyarichikuyta. Chayrayku kamacherqani preso kananta, jatun kamachejman pusachinaykama.

22 Agripataj nerqa Festoman: Kay runataqa, noqapis uyariyta munayman. Festotaj nerqa: Q'aya payta uyarinki.

23 Q'ayantintaj Agripawan, Berenicewan sumaj p'achallisqas yaykorqanku juzgadoman. Paykunawan khuskataj yaykorqanku comandantes, llajtapi kurajkuna ima. Festotaj kamacherqa Pablota pusaykamunankuta.

24 Chaymantataj Festo nerqa: Rey Agripa, qankunapis wiraqochis noqaykuwan kajkuna: Kaymin chay runaqa, pimantachus tukuy judíos Jerusalempi, jinallatataj kaypipis mañakuwanku wañunantapuni munaspa.

25 Noqataj, mana ima juchata paypi tarinichu wañunampaj jina. Paypuni mañakun jatun kamachej uyarinanta, chayrayku payman pusachisaj.

26 Manataj yachaspa imatachus cartapi kamachejniyman apachinayta, kunan wajyachini ñaupaqeykichejman, astawanqa qan rejsinaykipaj, rey Agripa. Ichapis astawan payta tapuspa, yachayta atiyman imatachus cartapi ninaypaj.

27 Noqapaj mana walejchu kanman presota pusacheyqa, mana allinta willaspa imamantachus tumpasqa kasqanta.

Qheshwa Biblia DC © Sociedades Bíblicas Unidas, 1986.

United Bible Societies
Lean sinn:



Sanasan