Hechos 19 - Qheshwa Biblia DC

Pablo rin Efesoman

¹ Apolos Corintopi kashajtintaj, Pabloqa puna jallp'asnejta rerqa, Efeso llajtaman chayanankama. Chaypitaj wakin yachachisqaswan tinkorqa.

² Paykunatataj taporqa: Santo Espirituta jap'erqankichejchu creeshaspaqa? Paykunataj kuticherqanku: Mana uyarillaykupischu Santo Espíritu kasqanta.

³ Pablo tapullarqataj: Chantá ima bautismowantaj bautizachikorqanki chej? Paykunataj kuticherqanku: Juampa bautismonwan, nispa.

⁴ Chaymantataj Pablo nerqa: Juanqa bautizarqa juchamanta kutirikuy bautismowan. Chay runasmantaj yachacherqa paypa qhepanta jamoj Jesuspi creenankuta.

⁵ Chayta uyarispataj bautizachikorqanku Señor Jesuspa sutimpi.

⁶ Pablo makisninta paykunaman churaykojtintaj Santo Espíritu paykunaman uraykamorqa, parlaykunapitaj parlarqanku. Diospa palabrantataj sut'incharqanku.

⁷ Tukuyninkupitaj chunka iskayniyoj qharis karqanku.

⁸ Pablotaj sinagogasman yaykuspa, mana manchachikuspa kinsa killa junt'ata yachacherqa, churanakuspa, Diospa reinonmanta unanchachiyta munaspa.

⁹ Wakinkuna sonqosninkuta rumiyacherqanku, mana creeyta munaspataj tukuypa ñaupaqempi Mosoj Ñampa contranta rimarqanku. Chayrayku Pabloqa paykunamanta t'aqakuspa, Tirano nisqaj escuelanman yachachisqasta pusarqa. Chaypitaj sapa p'unchay yachachej.

¹⁰ Ajinata ruwaspa karqa iskay watata, chayraykutaj Asiapi tukuy tiyakojkuna judíos, ajinallatataj griegospis Señor Jesuspa palabranta uyarerqanku.

¹¹ Pablonejta Diosqa, mana jayk'aj rikusqa jatuchaj milagrosta ruwasharqa.

¹² Chay jinapuni karqa, ima pañuelotapis, chayrí ima p'achallatapis Pabloj cuerponman chayachispa aparqanku; onqosqasman churamojtinkutaj thañikaporqanku, supaykunapis onqasqasmanta llojserqanku.

¹³ Wakin puriskiri aysiri judiostaj, Señor Jesuspa sutinta uyarispa, sajra espiritusta wijch'uyta munallarqankutaj, kay jinata nispa: Chay Jesuspa sutimpi pimantachus Pablo parlan, kamachiykichej llojsinaykichejta, nispa.

¹⁴ Chayta ruwasharqanku, Esceva judío kuraj sacerdotej qanchis wawasnin.

¹⁵ Sajra espiritutaj paykunaman kuticherqa: Jesustaqa rejsini, pichus Pablo kasqantapis yachallanitaj. Qankunarí, pikunataj kankichej?, nispa.

¹⁶ Sajra espirituyoj qharitaj, paykunaman phinkiykuspa maqararqa paykunata atipanankama. Chay runastaj q'ala q'alalla, sinch'i maqasqas ayqerqanku chay wasimanta.

¹⁷ Efeso llajtapi tukuy judiostaj, griegospis, chayta yachaspa manchachikorqanku, Señor Jesuspa sutintataj jatuncharqanku.

¹⁸ Creejkunamantapis ashkhas jamuspa, tukuypa uyarinanta willakorqanku paykunapis ñaupajta sajra ruwasqankumanta.

¹⁹ Ashkha yatiristaj librosninkuta tantaykuspa apamorqanku, tukuypa rikunantataj ruphaykucherqanku. Chay ruphachisqankutaj phishqa chunka waranqa qolqeman ruwakorqa.

²⁰ Ajinatapuni atiywan Diospa palabran tukuynejman chayasharqa, sinch'ichakusharqataj.

²¹ Chay tukuy imas qhepata, Pabloqa munarqa pasayta Macedonianta, Acayantataj, Jerusalenman chayanankama, chaypi kaspañataj Roma llajtatapis rikumunaypuni tiyan, nispa.

²² Macedoniamantaj kacharqa iskay yanapajkunasninta, Timoteota, Erastotawan. Chaykamataj Pabloqa uj pisitawan Asiapi qheparikorqa.

Efesopi ch'ajwa

²³ Chay p'unchaykunapi Efesopi jatun ch'ajwa oqharikorqa Mosoj Ñanrayku.

²⁴ Demetrio sutiyoj runa platero karqa, qolqepi ruwaj Dianaj juch'uy templitosninta. Paywan llank'ajkunatataj ashkha qolqeta ganachej.

²⁵ Tukuy paywan kajkunata tantachimuspa nerqa: Wiraqochis, qankuna allinta yachankichej kay oficionchejwan qhapajyakusqanchejta.

²⁶ Qankunaqa rikushankichej, uyarishankichejtaj, imaynatachus Pablo tukuyman junt'achisqanta: Mana dioskunachu kanku runaj makinwan ruwasqasqa, nispa. Chay nisqanwantaj, ashkha runaj sonqonta tijrachishan mana kay Efeso llajtallapichu, astawanqa tukuy Asiantimpi.

²⁷ Chayqa mana walejchu noqanchejpajqa, imaraykuchus qolqe jap'inanchej tukukaponqa. Astawanqa mana chayllachu, Dianaj templon qhesachasqa kanqa, jatun atiynintaj chinkarenqa. Yachankichej jina, Dianataqa tukuy Asiapi, kay tukuy mundontimpi runas yupaychanku.

²⁸ Demetrioj parlasqanta uyarispataj, runas phiñarikorqanku, qhapariytataj qallarerqanku: Efesiosmanta Artemisaqa jatun!, nispa.

²⁹ Tukuy llajtantintaj oqharikuspa Gayota, Aristarcotawan teatromanta qhatatispa orqhorqanku. Paykunaqa Macedoniamanta karqanku, Pablota yanapajkuna.

³⁰ Pabloqa munarqa runaspa chaupinman yaykuyta, creejkunataj jark'akorqanku.

³¹ Wakin Asiapi kamachejkunamanta Pabloj kausaqesnimpis, Pabloman nicherqanku amapuni teatroman rinanta.

³² Tukuy tantakojkuna manchayta ch'ajwasharqanku. Wakin uj jinata qhaparisharqanku, wajkunataj waj jinata; ashkhastaj mana yachallarqankupischu imapajchus tantakamusqankuta.

³³ Runa chaupimanta Alejandrota orqhomuspataj, tanqaspa ñaupajman aparqanku. Paytaj makinwan ch'inyachispa munasharqa kutichikuyta.

³⁴ Runastaj rejsiytawan Alejandroqa judío kasqanta, iskay horata jina uj kunkalla qhaparerqanku: Efesiasmanta Artemisaqa jatun!, nispa.

³⁵ Uj qelqeritaj runasta ch'inyachispa, nerqa: Efeso llajtayojkuna, pitaj mana yachanchu Efeso llajtanchej jatun Artemisaj templonta waqaychasqanta? Jinallatataj janaj pachamanta jamoj lantintapis?

³⁶ Chayrayku jinapuni kajtenqa, ch'inlla kakuychej, amataj imatapis mana allinta unanchaspaqa ruwaychejchu.

³⁷ Yanqhallata kay qharista pusamunkichej, mana paykunaqa suwankuchu templomanta, nitaj diosninchej Artemisapajpis rimankuchu.

³⁸ Demetriochus llank'ajkunasninwan, pitapis ch'atayta munanku chayqa, jueces tiyan sapa ujninku uyarichikunankupaj.

³⁹ Waj imasmantapuni ch'atayta munaspaqa, chaykunamanta juntapi allin uyarisqa kankichej.

⁴⁰ Chay ch'ajwaqaykichejwanqa mana allimpichu rikhurinkichej, yuyanqanku oqharikusqanchejta, manataj atisunmanchu kutichikuyta chaywan tumpasqa kaspaqa.

⁴¹ Ajinata parlayta tukuspataj, runasta kachaporqa.