Hechos 18 - Qheshwa Biblia DC

Pablo Corintopi

¹ Chay qhepata Pabloqa Atenasmanta llojsispa Corintoman rerqa.

² Chaypitaj tinku korqa Aquila nisqa judiowan; Ponto llajtayoj pay karqa. Mana unayrajchu karqa Priscila warminwan Italiamanta jamusqankoqa. Paykuna jamorqanku imaraykuchus Claudio kamachisqa tukuy judíos Roma llajtamanta llojsinankuta. Pablotaj paykunata watukamorqa.

³ Chaymantataj paykunawan qhepakorqa khuska llank'anankupaj, imaraykuchus Pabloqa, paykuna jina carpasta ruwayta yacharqa.

⁴ Sapa samakuna p'unchaypitaj Pabloqa, judiosman, griegosman ima evangeliota yachachej unanchachiyta munaspa.

⁵ Silas Timoteowan Macedoniamanta chayamojtinkutaj, chay p'unchaymantapacha Pabloqa, llank'ananta saqespa, Diospa palabranta judiosman willaspallaña purerqa, Jesusqa Cristopuni kasqanta.

⁶ Paykuna Diospaj sajrata rimaspa churanakojtinkutaj, Pabloqa p'achasninta thalarakuspa paykunaman nerqa: Yawarniykichej pataykichejpi kachun. Noqaqa mana juchayojchu kani. Kunanmantapachataj gentilespaman ripusaj.

⁷ Ajinata nispataj, Ticio Justo sutiyojpa wasinman riporqa. Payqa Diosta yupaychaj, wasintaj sinagoga qayllapi karqa.

⁸ Sinagogapi kamachej Crispo creerqa Señorpi, tukuy familianwan. Corintomanta kajkunapis, chayta uyarispa ashkhas creerqanku, bautizachikorqankutaj.

⁹ Uj tutataj Pabloman Señor rikhurerqa, nerqataj: Ama manchachikuychu, parlallaypuni, amataj ch'inyakuychu.

¹⁰ Noqamin qanwan kashani. Manataj pipis imanasonqachu. Kay llajtapeqa ashkhas kanku noqapi creejkuna.

¹¹ Ajinamanta Pabloqa, Corintopi qhepakorqa wata sojta killayojta, runakunaman Diospa palabranta yachachispa.

¹² Acaya jallp'api kamachej Galión kashajtintaj, judíos uj yuyaylla tantaykukuspa oqharikorqanku Pabloj contrampi, juzgadomantaj pusaykorqanku.

¹³ Chaypitaj nerqanku: Kayqa runakunaman yachachishan waj layamanta Diosta yupaychanata, mana leyman jinachu.

¹⁴ Pablo parlanampaj kashajtintaj, Galión judiosman nerqa: Judiokuna, sichus kay runa ima sajrata ruwanman karqa, chayrí ima jatun juchatapis chayqa, noqa cheqamanta uyariykichejman karqa.

¹⁵ Ch'ajwashankichej palabrallamanta, sutismanta, leyniykichejmanta ima, chaykunamantaqa qankunapuralla yachaychej. Mana noqaqa juez kayta munanichu chaykunamanta.

¹⁶ Ajinata nispataj, juzgadomanta paykunata qharqorqa.

¹⁷ Tukuyninkutaj jap'iykorqanku uj sinagogapi kamachejta, Sóstenes sutiyojta. Juzgadopitaj payta maqarqanku. Galiontaj mana rikoj tukorqa.

Pablo kutiripun Antioquiaman

¹⁸ Pabloqa unaytaraj Corintopi qhepakorqa. Chaymantataj hermanosta saqespa, botepi riporqa Siriaman, Priscilawan Aquilawan khuska. Cencrea llajtapitaj, manaraj boteman wicharishaspa Pabloqa chujchanta k'utuchikorqa, ruwasaj nisqanta junt'anampaj.

¹⁹ Efeso llajtaman chayaspataj, Priscilata Aquilatawan chaypi saqespa, Pabloqa, sinagogaman yaykuspa judiosman yachacherqa.

²⁰ Paykunataj Pablota nerqanku astawan karikunanta, paytaj mana munarqachu.

²¹ Ripushaspataj paykunaman nerqa: [Jamoj fiestapajqa Jerusalempi kanay tiyan.] Dios munajtenqa ujtawan kutimusaj qankunawan kanaypaj. Niytawantaj Efesoman riporqa.

²² Cesareaman chayaspataj, Jerusalenman wicharerqa, iglesiapi hermanosta watukoj. Chaymantataj Antioquiaman uraykorqa.

²³ Antioquiapi astawan qheparikuspataj, rillarqataj tukuy Galacianta, Frigianta ima. Llajtamanta llajta purispa tukuy creejkunata kallpacharqa.

Apolos parlan Efesopi

²⁴ Chaypachataj, Efesoman chayamorqa uj judío Apolos sutiyoj. Payqa Alejandriamanta karqa, sumajtataj parlaj. Escriturastapis allinta yachaj.

²⁵ Apolosqa Señorpa ñannimpi yachachisqa karqa, tukuy sonqotaj maychus kajta willaspa yachachej Jesusmanta. Chaywampis payqa, Juampa bautismollanta rejserqa.

²⁶ Paytaj mana manchachikuspa evangeliota willayta qallarerqa sinagogapi. Payta uyarispataj Priscilawan Aquilawan, Apolosta wasinkuman pusarqanku, paymantaj yachacherqanku, aswan sut'ita Diospa ñanninmanta.

²⁷ Apolosqa Acayaman riyta munashajtintaj, Efesopi hermanosqa payta kallpacharqanku; cartataj creejkunaman apacherqanku, Apolosta tukuy sonqo jap'inankupaj. Acayaman chayaspataj payqa, Diospa khuyakuyninrayku, creejkunata mayta yanaparqa.

²⁸ Tukuypa ñaupaqempi, sumaj atiywan parlaspa judiosta atiparqa, Escrituraspi rikuchispa Jesusqa Cristopuni kasqanta.