Hechos 15 - Qheshwa Biblia DC

Jerusalempi iglesia tantakun

¹ Chaypacha Judeamanta jamojkuna, Antioquiapi hermanosman yachachiyta qallarerqanku: Sichus Moisespa leyninman jina, mana circuncidakunkichejchu chayqa, mana salvasqas kayta atinkichejchu.

² Kay jawataj paykunaqa Pablowan Bernabewan sinch'ita churanakorqanku. Chayrayku ajllarqanku Pablota, Bernabeta, wakin paykunamanta hermanostawan, Jerusalenman rinankupaj; chaypitaj kay imasmanta allinta parlamunankupaj apostoleswan, ancianoswan ima.

³ Antioquía iglesiataj paykunata kacharpayarqa. Paykunataj rerqanku Fenicianejta, Samarianejta ima, creejkunaman willaspa, imaynatachus gentilespis Diosman kutirikusqankuta. Tukuy hermanostaj maytapuni kusikorqanku chayta uyarispa.

⁴ Paykuna Jerusalenman chayajtinkutaj, iglesiapi kajkuna apóstoles, ancianos ima may kusiywan jap'erqanku. Paykunamantaj willarqanku imaynatachus Dios tukuy imata ruwasqanta paykunawan.

⁵ Fariseosmanta wakin creejkunataj, sayarispa nerqanku: Gentilesmanta creejkunaqa, circuncidasqas kananku tiyan, Moisespa leyninman jina.

⁶ Apostolestaj ancianoswan tantakuspa parlarqanku kay imasmanta yachanankupaj.

⁷ Anchataña churanakojtinkutaj, Pedro sayaykuspa nerqa: Hermanos, yachankichej jina, imaynatachus unay qankuna ukhumanta Dios ajllawasqanta gentilesman evangeliota apanaypaj, paykunapis uyarispa Jesuspi creenankupaj.

⁸ Diostaj runaspa sonqonta rejsej jina, rikucherqa gentilestapis munakusqanta, Santo Espirituta qospa, imaynatachus noqanchejman qowarqanchej ajinata.

⁹ Diosqa gentilesta munakun, noqanchejta jinallataj. Paykunaj sonqosninkutapis juchamanta llimphuchan creesqankurayku.

¹⁰ Kunanrí, imaraykutaj Diosmanta iskayrayankichejri, creejkunaman llasa q'epita jina kamachiykunata qospa, mayqenkunatachus mana ñaupa tatasninchej, nitaj noqanchejpis junt'ayta aterqanchej chayta.

¹¹ Astawanqa creenchej Señor Jesuspa khuyakuyninnejta salvasqas kasqanchejta. Ajinallataj paykunawampis kanan tiyan.

¹² Chaymantataj tukuyninku ch'inyarqanku, uyarerqankutaj Pablowan Bernabewan willasqankuta, imaynatachus Dios paykunanejta ruwasqanta señalesta milagrosta ima, gentiles ukhupi.

^13-14 Paykuna parlayta tukojtinkutaj, Santiago nerqa: Hermanos, uyariwaychej: Ñapis Simón Pedro willawanchejña imaynatachus kay ñaupaj kutipi Dios gentilesta watukusqanta, paykuna ukhumantataj runakunata ajllasqanta, paypaj ayllun kanampaj.

^15-17 Profetaspa parlasqanku Pedroj nisqanwan kikinchakun, escibisqaman jina: Chaymantataj kutimusaj, Davidpa thuñisqa wasinta watejmanta sayarichisaj, kikin thuñisqa raqaykunamanta, ujtawan wasichasaj; ajinamanta wajkunapis Señorta mask'anankupaj, tukuy gentilespis, pikunachus sutiyta yupaychanqanku.

¹⁸ Ajinata nin Señorqa. Tukuy ruwasqasninta unaymantapachaña rejsicherqa.

¹⁹ Chayrayku Santiagoqa nerqa: Gentilestaqa ama pantachinachu, Diosman kutirikushajtinkoqa.

²⁰ Manachayqa escribina kachun: Ama qhasi dioskunaman jaywasqasta mikhunankuta, ama qhenchachakunankuta; ama jeq'eqasqa animalesta mikhunankuta, nitaj yawartapis.

²¹ Unaymantapacha, sapa llajtapi Moisespa leyninmanta willajkuna kanku, sapa samakuna p'unchaypitaj leenku sinagogaspi ima.

Cartata apachinku gentilesman

²² Chaymantataj apóstoles ancianoswan, tukuy iglesiantin ajllarqanku wakin qharista, Pablowan Bernabewan khuska, Antioquiaman rinankupaj. Ajllarqankutaj Judas Barsabás nisqata, Silastawan. Kay iskayqa sumaj qhawasqas karqanku chay hermanos ukhupi.

²³ Paykunawantaj apacherqanku kay cartata: Noqayku apóstoles, ancianoswan, hermanosniykichej ima, napaykamuykichej hermanos gentilesmanta, jamojkuna, pikunachus tiyakunkichej Antioquiapi, Siriapi, Ciliciapi ima.

²⁴ Uyariyku, wakin noqayku ukhumanta chayman jamuspa, yachachisqankuwan umaykichejta muyuchispa yuyayniykichejta tijrasqankuta. [Paykunaqa nisorqachej circuncidasqas kanaykichejta, Moisespa leynintataj junt'anaykichejta.]

²⁵ Chayrayku tukuyniyku uj yuyaylla tantakorqayku, noqayku ukhumanta ajllasqa hermanosta chayman kachamunaykupaj. Paykunaqa jamonqanku may munasqas Bernabewan Pablowan ima.

²⁶ Paykunaqa Señorninchej Jesucristoj sutinrayku kausayninkuta churanku.

²⁷ Ajinamanta Judasta Silastawan kachamushayku, paykunataj simipi chay kikillantataj willasonqachej.

^28-29 Santo Espirituman, noqaykumampis, allin rijch'awayku: Mana astawan llasa q'epita qankunaman churayta munaykuchu. Kay cartapi churamusqallaykuta junt'aychej: Ama mikhuychejchu lantikunaj ñaupaqenman churasqa aychasta, nitaj yawarta, nillataj jeq'eqasqa animalestapis; amataj qhenchachakuychejchu. Chaykunamanta karunchakuspaqa allinta ruwaychej. Walejllata kakuychej.

³⁰ Kachastaj Antioquiaman chayaytawan, tukuy creejkunata tantaspa, paykunaman chay cartata jaywarqanku.

³¹ Hermanostaj chay cartata leespa mayta kusikorqanku, chay sonqochaj cartamanta.

³² Judaswan, Silaswantaj profetasllataj karqanku. Hermanostataj sonqocharqanku, astawan sinch'ita sayanankupaj.

³³ Pisi p'unchaykunata chaypi kasqankumantataj, hermanos kachaporqanku sonqo tiyasqata, maymantachus jamorqanku chayman. [

³⁴ Silastaj chaypi qhepakorqa.]

³⁵ Pablowan Bernabewantaj Antioquiapi qhepakorqanku, ashkha hermanoswan Señorpa palabranta yachachispa, evangeliomantataj willaspa.

Pabloj iskay kaj puririynin

³⁶ Pisi p'unchaykunamantataj, Pabloqa Bernabeman nerqa: Kunan kutirina hermanosta watukoj tukuy llajtaspi maypichus Señorpa palabranta willarqanchej. Ajinapi yachasunchej imaynachus kasqankuta.

³⁷ Bernabetaj pusayta munarqa Marcos, Juan nisqata.

³⁸ Pablomantaj mana allinchu rijch'arqa Marcosta pusayqa, imaraykuchus ñaupaj puriyninkupi, Panfilia llajtapi paykunata saqerpayasqa; manataj paykunawan riyta munasqachu evangeliota willamoj.

³⁹ Paykunapura churanakuspataj, t'aqanakaporqanku. Bernabeqa Marcoswan qochanejta botepi riporqa Chipreman.

⁴⁰ Pablotaj Silasta ajllakuspa paywan rerqa. Hermanostaj Señorpa munakuynimpi paykunata kacharpayarqanku.

⁴¹ Sirianta, Ciliciantawan rispataj, iglesiasta kallpacharqa.