Hechos 14 - Qheshwa Biblia DC

Pablo Bernabewan Iconiopi

¹ Iconiopipis Pablo Bernabewan khuska yaykorqanku judiospa sinagoganman. Parlasqankuraykutaj ashkha judíos creerqanku, jinallataj griegospis.

² Mana creej judiostaj, gentilesta yachaykuchispa hermanospa contrampi oqharicherqanku.

³ Chaywampis apostolesqa unayta chaypi karqanku. Mana manchachikuspa Señormanta parlarqanku, paypi sonqonkuta churaspa. Señortaj parlasqankuta yanaparqa, señalesta, milagrostawan paykunanejta ruwachispa.

⁴ Llajta runastaj iskayman t'aqakorqanku. Ujkuna judiosman kutikorqanku, ujkunataj apostolesman.

⁵ Chaymantataj gentiles, judioswan kamachejkunasninku wan ima tantakorqanku. Tukuyninkutaj yachachinakorqanku, apostolesta juchachaspa rumiswan ch'anqanankupaj.

⁶ Pablotaj Bernabewan chayta yachaspa, Licaoniapi llajtasman ayqerqanku: Listraman, Derbeman, chay muyuynintinman ima.

⁷ Chaypitaj evangeliomanta willasharqanku.

Pablota Listrapi ch'anqanku

⁸ Listrapitaj uj runa tiyakorqa. Nacikusqanmantapacha chakisninmanta suchu karqa, manataj ni jayk'aj purirerqachu.

⁹ Chay runaqa, Pabloj parlasqanta uyarisharqa. Pablotaj suchu runata qhawarispa, yacharqa creesqantaña thañinampaj.

¹⁰ Sinch'ita qhaparispa suchuta nerqa: Sayariy, nispa. Suchutaj usqhayta jatarispa, puriyta qallarerqa.

¹¹ Pabloj ruwasqanta rikuspataj, runa qhapariyta qallarerqa, Licaonia parlaypi: Runaman rijch'akoj dioskuna, uraykamusqanku noqanchejman.

¹² Bernabeta suticharqanku Júpiter nispa; Pablotataj Mercurio nispa, astawan parlasqanrayku.

¹³ Jupiterpa templontaj, llajta yaykuyllapi kasharqa. Sacerdotentaj apamorqa llajta punkuman torosta, t'ika pillustawan. Runakunawan khuska, chay torosta wañuchispa, yupaychayta munarqanku Pablota Bernabetawan.

^14-15 Pablowan, Bernabewan uyarispa imatachus ruwayta munasqankuta, p'achasninkuta llik'irakuspa runaj chaupinman qhaparispa yaykorqanku, nerqankutaj: Wiraqochis, imaraykutaj kaykunata ruwashankichejri? Noqaykoqa runaslla kayku, qankuna jina. Chayrayku qankunaman willaj jamuyku, kay qhasi mana kajkunata saqespa, kausashaj Diosman kutirinaykichej paj. Diosqa janaj pachata, kay pachata, qochata ruwarqa, chaykunapi tukuy ima kajkunatapis.

¹⁶ Ñaupajtaqa, Dios saqerqa tukuy runasta ñanninkuta purinankuta.

¹⁷ Chaywampis Diosqa, allinta runaswan rejsichikorqa: Sumajta ruwaspa, parata apachimun, chajrasta tiempompi poqochin, mikhuna patapi uywasunkichej, sonqoykichejtataj kusiywan junt'achin.

¹⁸ Chayta nispataj paykunaqa ñak'ayta saqecherqanku, torosta wañuchispa paykunaman jaywanankuta dioskunaman jina.

¹⁹ Wakin judiostaj chayamorqanku Antioquiamanta, Iconiomantawan, paykunataj runasta yachaykuchispa ch'ajwata oqharicherqanku. Pablotataj rumiswan ch'anqaykuspa wañusqata jina, llajtamanta jawaman qhataterqanku.

²⁰ Creejkuna Pabloman qayllaykusqankuta wan, payqa jatarispa ujtawan llajtaman yaykorqa. Q'ayantintaj Bernabewan khuska Derbeman riporqa.

Siriapi kaj Antioquiaman kutiripunku

²¹ Paykunataj evangeliomanta willarqanku, Derbepitaj ashkhas creerqanku. Chaymantataj kutirerqanku Listraman, Iconioman, Antioquiaman ima.

²² Chay llajtaspitaj creejkunata sonqocharqanku, creesqankupi sinch'ita sayanankupaj, nerqankutaj: Noqanchejqa tukuy imasta ñak'arinanchejpuni tiyan, Diospa reinonman yaykunanchejpaj.

²³ Sapa iglesiapitaj ancianosta ajllarqanku. Ayunaspataj, mañakuspataj Señorwan saqerqanku, pipichus creerqanku chaywan.

²⁴ Pisidianejta rispataj Panfiliakama chayarqanku.

²⁵ Pergepi evangeliomanta willaspataj, Ataliaman uraykorqanku.

²⁶ Ataliamanta, evangeliota willaspaña botepi kutiriporqanku Antioquiaman, maypichus Diospa khuyakuyninman qosqas karqanku chayman, ruwanankupaj imatachus kunan tukusqankuña chayta.

²⁷ Antioquiaman chayaspataj, iglesiata tantaykuspa willarqanku, imaynatachus Dios tukuy imapi paykunata yanapasqanta, jinallatataj gentilespajpis punkuta kicharisqanta, Jesuspi creenankupaj.

²⁸ Chaypitaj paykunaqa unayta qhepakorqanku creejkunawan.