Hechos 10 - Qheshwa Biblia DC

Pedro Corneliowan

¹ Cesareapi uj runa karqa Cornelio sutiyoj. Payqa Italiano nisqa batallompi capitán karqa.

² Cornelioqa Diosta munakoj runa karqa, wasimpitaj tukuy familianwan khuska Diosta yupaychaj. Pay tukuy imapi yanapaj wajcha runasta, Diosmantataj mañakuspallapuni kaj.

³ Uj kuti, chaupi p'unchay pasayta, mosqoypi jina sut'ita rikorqa Diospa angelninta, maypichus kasharqa chayman yaykumojta. Parlapayaspataj: Cornelio, nerqa.

⁴ Corneliotaj angelta qhawarispa mancharikorqa, nerqataj: Wirakochi, imataj kay? Angeltaj kuticherqa: Mañakusqasniyki wajchasta yanapasqasniyki ima, Diospa ñaupaqenman chayanku. Kunantaj qanmanta yuyarikusunki.

⁵ Kunanqa Jopeman wakin runasta kachay, wajyamunankupaj Simonta, Pedro nisqata.

⁶ Payqa wajyarisqa kashan curtidor Simompa wasimpi, qocha qayllapi.

⁷ Kay parlapayaj ángel ripojtinkamataj, Cornelioqa wajyarqa iskay kamachisninta, uj sumaj yanapajnin Diosta yupaychaj soldadotawan.

⁸ Paykunaman tukuy imata willaspa, Jope llajtaman kacharqa.

⁹ Q'ayantintaj kachas ñanta rishajtinku, Jopeman qayllashajtinkuña, Pedro chaupi dianejta, wasi pataman wicharerqa Diosmanta mañakoj.

^10-11 Yarqhachikuspataj mikhuyta munarqa. Mikhunata wayk'unankukama, yuyayninta pataman oqharerqa; rikorqataj janaj pachata kicharisqata. Chaymantataj rikullarqataj uj t'impi jina llijllaman rijch'akoj, tawantin cantosninmanta watasqa jallp'aman uraykamushajta.

¹² Chay t'impipitaj karqa, kay jallp'api kaj tukuy laya animales: Tawa chakisniyoj, kataris, p'isqos ima.

¹³ Uj parlamojtataj uyarerqa: Sayariy, Pedro, wañuchiy, mikhuytaj.

¹⁴ Pedrotaj kuticherqa: Manapuni Wirakochi; ni jayk'aj mikhorqanichu imachus mana allin kajta, nitaj ch'ichi kajtapis.

¹⁵ Parlamojtaj uj kutitawan nimorqa: Imatachus Dios llimphuchasqantaqa, ama ch'ichi niychu.

¹⁶ Kaytaj karqa kinsa kutikama, chaymantataj t'impeqa janaj pachaman kutiporqa.

¹⁷ Pedrotaj t'ukuspa kasharqa chay rikusqanmanta. Imatachus kay niyta munan, nispa. Jinallaman Cornelioj kachamusqasnin tapukuspa Simompa wasin punkukama chayamorqanku.

¹⁸ Wajyaspataj tapukorqanku: Manachu kaypi Simón Pedro kashan?

¹⁹ Pedro chay rikusqampi yuyashajtillampuni, Santo Espíritu payman nerqa: Runas mask'ashasunku.

²⁰ Kunanqa sayarispa uraykuy, ama iskayrayaspataj paykunawan riy. Noqa paykunata kachamuni.

²¹ Pedrotaj uraykuspa chay runasman nerqa: Noqa kani pitachus mask'ashankichej chay. Imamantaj jamunkichejri?

²² Paykunataj kuticherqanku: Capitán Cornelio kachamuwayku. Payqa cheqan runa, Diospa manchaynimpitaj kakun. Judiostaj jatumpi jap'inku. Diospa angelnintaj Cornelioman nerqa wasinman wajyachisunanta, qampa parlasqaykita uyarinampaj.

²³ Pedrotaj kachasta wasi ukhuman pusaykorqa, chaypitaj chay tuta puñorqanku. Q'ayantintaj sayariytawan, paykunawan rerqa. Jopepi tiyakoj wakin hermanospis paykunawan rillarqankutaj.

²⁴ Qhepan p'unchaytaj Cesareaman chayarqanku. Corneliotaj chaypi suyasharqa familianwan, kausaqesninwan ima.

²⁵ Pedro wasinman yaykushajtintaj, Cornelio pusaykoj llojsimorqa. Pedroj ñaupaqenman qonqoriykukuspataj k'umuykorqa.

²⁶ Pedrotaj Corneliota aysarispa nerqa: Sayariy, noqapis qan jina runallataj kani.

²⁷ Pedroqa Corneliowan parlaspa wasinman yaykorqa, chaypitaj tariparqa ashkha runasta.

²⁸ Pedrotaj paykunaman nerqa: Qankuna yachankichej jina, judiosqa waj llajtayoj runaswan mana tantakuyta atinkuchu. Kunanrí, Dios yachachiwan ama pitapis ch'ichi, nitaj millay runa ninayta.

²⁹ Chayraykutaj wajyachimuwajtiyki chej, mana iskayrayaspa jamuni. Kunantaj yachayta munani imapajchus wajyachiwasqaykichejta.

³⁰ Corneliotaj nerqa: Tawa p'unchayña kashan, kay horata jina, kay wasipi ayunasharqani, chaupi p'unchayta jina. Diosmanta mañakushajtiy, chayllaman uj qhari ñaupaqeypi rikhurerqa lliphipej p'achayoj.

³¹ Paytaj niwarqa: Cornelio, Dios uyarimusunki mañakusqaykita, yuyarikullantaj wajchakunata yanapasqaykimantapis.

³² Jopeman kachay ari, Simón, Pedro nisqata pusachimuy. Payqa tiyakushan curtidor Simompa wasimpi, qocha qayllapi. Paytaj jamuspa qanwan parlanqa.

³³ Chay kikimpachataj qanman kachamorqani. Qantaj allinta ruwanki kayman jamuspa. Kunanqa tukuyniyku kaypi kakushayku, Dios imatachus kamachisusqanta noqaykuman willanawaykupaj.

Pedro parlan Cornelioj wasimpi

^34-35 Chaymantataj Pedro parlayta qallarerqa: Cheqamanta yachani, Diosqa mana runaj rijch'ayninta qhawaspachu runataqa ajllan, manachayqa, ima laya runa ukhupipis, pichá Diosta manchachikoj, cheqa kajtataj ruwaj runamin Diospajqa munasqa.

³⁶ Uyariychej, Dios Israelpa churisninman palabranta parlasqanta, apachimorqa Jesucristonejta sonqo tiyakuy kasqanta willaspa, paytaj tukuypa Señornin.

³⁷ Qankuna yachallankichejtaj tukuy Judeapi imachus kasqanta, Galileamantapacha qallarispa, Juan bautismomanta willasqanmanta qhepaman.

³⁸ Yachankichej, Nazaret llajtayoj Jesusman imaynatachus Dios qosqanta Santo Espirituta, atiytawan. Jesustaj tukuynejta purerqa allinta ruwaspa, thañichispataj sajraj atiynimpi tukuy ñak'arejkunata, Dios paywan kasqanrayku.

³⁹ Noqaykutaj chay tukuy imasta rikorqayku, judiospa llajtampi ruwasqanta, Jerusalén llajtapi ima. Paykunataj Jesusta cruzpi wañucherqanku.

⁴⁰ Diostaj kinsa p'unchayninman payta kausarichimorqa tukuy rikunankupaj.

⁴¹ Mana tukuy runamanchu rikhurerqa. Noqallaykuman rikhuriwarqayku. Ñaupajmantapachaña Diospa ajllasqasnin karqayku, testigos jina rikusqaykuta willanaykupaj. Noqaykoqa paywan mikhorqayku, ujyarqaykutaj wañuymanta kausarimusqanmantaña.

⁴² Paytaj kamachiwarqayku runakunaman willanaykuta, rejsichinaykuta ima; kay kikin Jesusta Dios churarqa, kausajkunata, wañusqastapis juzganampaj.

⁴³ Tukuy sut'inchajkunapis Jesusmanta willarqanku tukuy paypi creejkunaqa sutinnejta juchasninkumanta pampachasqa kanankupaj.

Mana judíos kajkunapis Santo Espirituta jap'inku

⁴⁴ Pedro parlashajtillanraj, Santo Espíritu tukuynin uyarejkunaman uraykamorqa.

⁴⁵ Creejkuna judiostaj, Jopemanta Pedrowan jamojkuna, t'ukushaj qhepakorqanku, mana judíos kajkunamampis Diosqa Santo Espirituta qosqanmanta.

⁴⁶ Paykunaqa waj parlaykunata parlajta uyarerqanku, Diostataj mayta yupaychaspa.

⁴⁷ Chaymantataj Pedro nerqa: Kay runasqa noqanchej jinallataj, Santo Espirituta jap'inku. Atinmanchu pipis jark'ayta ama bautizachikunankuta?

⁴⁸ Ajinata Pedro kamacherqa Jesucristoj sutimpi bautizachikunankuta. Creejkunataj Pedroman nerqanku uj pisi diasllatapis paykunawan qhepakunanta.