Hechos 1 - Qheshwa Biblia DC

Santo Espíritoj jamunan yachakun

^1-2 Teofilóy, ñaupaj escribisqaypi churarqaniña imaynatachus Jesús qallariymantapacha tukuy imata ruwasqanta, yachachisqantawan, janaj pachaman ripunan chay p'unchaykama. Jesús manaraj janaj pachaman rishaspa, Santo Espíritoj atiynimpi kamachiykunata qorqa ajllasqa apostolesninman.

³ Wañusqamanta kausarimuspataj, kikin Jesús apostolesninman rikuchikorqa. Ashkha kutita paykunaman rikhurerqa, tukuy laya ruwaykunata ruwaspa, cheqamanta yachanankupaj Jesús kausashasqanta. Tawa chunka p'unchaykunapi taj, paykunaman rikuchikuspa, Dios tataj reinonmanta parlarqa.

^4-5 Apostolesninwan tantasqa kashaspataj, paykunaman Jesús kamacherqa: Jerusalén llajtamanta ama ripunkichejchu, manachayqa suyaychej Dios Tataj nisqan junt'akunanta; mayqentachus noqamanta uyarerqankichej, kay jinata: Juanqa yakuwan bautizarqa. Kaymanta pisi p'unchaykunamantajrí, qankuna Santo Espirituwan bautizasqa kankichej, nispa.

Jesús ripun janaj pachaman

⁶ Maypachachus tukuyninku tantasqa kashaspataj, apostolesqa Jesusta taporqanku: Señor, kunampachachu Israel aylluman jatun kamachiyninta ujtawan kutichipunki?, nispa.

⁷ Jesustaj kutichispa nerqa: Qankunaqa mana yuyanaykichejchu tiyan mayk'ajchus, chayrí ima horatachus Dios Tata jatun atiynimpi chay imasta ruwanan kasqantaqa.

⁸ Manachayqa Santo Espíritu qankunaman jamojtin, atiyta jap'inkichej. Rispataj, noqamanta imatachus yachasqaykichejta willankichej Jerusalempi, tukuy Judea jallp'api, Samariapi, tukuy kay pachaj cantosnintimpi ima.

⁹ Chaykunata nisqantawantaj, apostolesnin qhawashajtinku, Jesús riporqa janaj pachaman. Uj phuyutaj jamuspa ñawisninkumanta payta pakaykorqa.

¹⁰ Jesús ripushajtintaj, apostolesqa patata qhawaspallapuni kasharqanku. Chayllamantaj iskay qharis ujllata rikhurimorqanku yuraj p'achasniyoj, paykunawan khuskataj sayasharqanku.

¹¹ Paykunamantaj nerqanku: Galileokuna, imaraykutaj patata qhawaspallapuni kankichejri? Kay kikin Jesús, imaynatachus qankuna ukhumanta janaj pachaman ripun, ajinallatataj ujtawan kutirimonqa, imaynatachus ripojta rikunkichej ajinata.

Matiasta ajllanku Judaspa cuentanmanta

¹² Chay qhepatataj apostolkuna Jerusalenman kutiporqanku, Olivos nisqa orqomanta. Chay orqoqa mana karupichu karqa Jerusalenmanta. Uj samakuna p'unchay puriypi jinalla karqa.

¹³ Llajtaman chayaspataj, maypichus kasharqanku chay wasipi, alto pataman wicharerqanku. Paykunataj karqanku: Pedro, Santiago, Juan, Andrés, Felipe, Tomás, Bartolomé, Mateo, Alfeoj churin Santiago, Zelotes nisqa Simón, Santiagoj wauqen Judas ima.

¹⁴ Tukuyninkutaj uj sonqolla tantakorqanku, Dios Tatamanta mañakuspallapuni kanankupaj, Jesuspa maman Mariawan, wauqesninwan, wakin warmiswan ima.

^15-16 Chay p'unchaykunallapitaj creejkuna tantakorqanku tukuyninkupi, pachaj iskay chunkayoj jina. Sayaykuspataj Pedro paykunaman nerqa: Hermanosníy, escribisqapi nisqan junt'akunampuni karqa, imatachus Santo Espíritu Davidpa siminnejta Judasmanta nerqa. Chay Judasqa runasta pusarqa Jesusta jap'inankupaj.

¹⁷ Judasqa noqaykuwan yupasqa karqa, imaraykuchus paypis ajllasqallataj karqa kay ruwaypi kanampaj.

¹⁸ Chay Judasqa sajrata ruwasqanmanta qolqeta jap'isqanwan jallp'ata ranterqa. Chay jallp'apitaj, umamanta urmaspa wijsanta phatachikorqa, ch'unchulasnin thallisqataj wañorqa.

¹⁹ Jerusalén llajtapi tukuy tiyajkunataj chaymanta uyarerqanku. Chayrayku chay jallp'ata parlayninkupi Acéldama nispa, suticharqanku. Chay niyta munan Yawar Jallp'a.

²⁰ Salmos escribisqapi kay jinata nin: Wasinta ch'inta saqerparichunku, amataj pipis chaypi tiyachunñachu. Nillantaj: Ruwanantapis wajtaj jap'ichun, ruwanampaj.

²¹ Walej kanman uj runata ajllana, Jesucristoj kausarimpusqanta willanampaj, noqaykuwan khuska. Chay runaqa kanan tiyan Señor Jesús noqanchej ukhupi kashajtin, noqaykuwampuni purejkunamanta.

²² Payqa willanqa, qallarispa Juan bautizasqanmantapacha, mayk'ajchus Jesús janaj pachaman ripusqankama.

²³ Ajinamanta iskaypa sutisninta oqharerqanku ajllanankupaj: José Barsabasta, pitachus Justo nej kanku; chantá Matiastawan.

^24-25 Kay jinatataj Diosmanta mañakorqanku: Señor, tukuypa sonqonta rejsej, rikuchiwayku ari mayqentachus kay iskay qharismanta ajllasqaykita, apostolniyki kanampaj, kamachisqaykitataj ruwanampaj Judaspa cuentanmanta, pichus juchanrayku saqerparerqa ruwananta, maypachachus juchallikusqanrayku rinan karqa chayman rinampaj.

²⁶ Chaymantataj suerteta choqarqanku. Suertetaj Matiaspaj llojserqa. Paytaj chaymantapacha chunka ujniyoj apostolesman yapakorqa.