Hebreos 7 - Qheshwa Biblia DC

Jesusqa, sacerdote churasqa Melquisedecpa t'aqanman jina

¹ Kay Melquisedecqa, Salem llajtaj reynin, jatun Diospa sacerdoten karqa; pichus Abrahamta taripaj llojserqa, reyesta atipasqanmanta kutimushajtin, paytataj yanaparqa.

² Paymantaj Abrahampis tukuy imanmanta, chunkamanta ujta qorqa; ñaupajta Melquisedec suteqa, cheqanta ruwaj rey niyta munan. Chantá, Salempa reynintaj. Chayqa sonqo tiyachej rey niyta munan.

³ Mana tatayoj, mana mamayoj, mana aylluyoj kaspa, p'unchayninmantapis mana qallariynin kanchu, nitaj kausayninmantapis tukukuynin, Diospa Churinman rijch'akuspa, sacerdote churasqa wiñaypaj.

⁴ Qhawaychej ari, imayna jatunchus Melquisedec kasqanta, Abrahampis, maqanakupi tukuy qhechusqanmanta, sapa chunkamanta ujta payman qorqa.

⁵ Cheqatapuni Levejpa churisnin, sacerdote oficiota jap'erqanku, kamachisqastaj karqanku diezmota llajtamanta orqhonankupaj leyman jina, kay niyta munan, wauqesninkumanta. Paykunapis Abrahampa aychallanmantataj llojserqanku.

⁶ Melquisedectaj mana paykunaj ayllunmantachu kaspa, diezmota Abrahammanta jap'erqa, paytataj yanaparqa, Dios qosqayki nisqasninta jap'isqanrayku.

⁷ Chaymantaqa mana ima ninapis kanchu. Cheqamanta, sullk'a kajtaqa, kuraj kajpuni Diospa bendicionninwan yanapan.

⁸ Cheqamanta, kaypi diezmota jap'ejkunaqa, wañoj runas kanku. Jaqaypirí yachakun diezmota jap'ej Melquisedecqa, kausashallasqantapuni.

⁹ Niyta atisunman: Kikin Levipis, diezmota jap'ejqa, Abrahamnejta diezmota qollarqataj.

¹⁰ Tatampa ukhullampiraj kasharqa, maypachachus Melquisedec taripaj llojserqa Abrahamta, chaypacha.

¹¹ Sichus ari, levítico sacerdociorayku sumaj kay, kanman karqa chayqa; imapajñataj waj sacerdote, Melquisedecpa t'aqanman jina jatarinman karqari, manataj Aarompa t'aqanman jina kajtinri?

¹² Sacerdocio tijrakojtenqa, leypis tijrakunallantaj tiyan.

¹³ Chayrayku, jaqay pimantachus runas kayta ninku chayqa, waj ayllumanta karqa; chay ayllumantarí, mana pipis altarman jaywaj yaykorqachu.

¹⁴ Yachakun Señorninchejqa Judajpa ayllunmanta jamusqan. Chay ayllumantaqa mana imatapis Moisés, sacerdocio jawa parlarqachu.

¹⁵ Kaytaj astawan sut'inchakun, Melquisedecpa rijch'ayninman jinachus, waj sacerdote jatarin chayqa.

¹⁶ Payqa mana aychaj kamachisqanman jina churasqachu; astawanqa, mana tukukoj kausaypa atiyninman jina.

¹⁷ Paymanta willanku: Qan wiñaypaj sacerdote kanki, Melquisedecpa t'aqanman jina.

¹⁸ Chayrayku, ñaupa kamacheyqa qhechukapun; pisi kallpayoj, mana imapaj allin kasqanrayku.

¹⁹ Leyqa, mana imatapis allinta tukuycharqachu; astawanqa, allin suyakuyllaman pusaykuwarqanchej. Chaynejtataj Diosman qayllaykunchej.

²⁰ Kay sacerdoteqa juramentowan churasqa karqa.

²¹ Cheqamanta chay waj sacerdotesqa mana juramentowanchu churasqas karqanku. Kayrí juramentowan churasqa karqa. Paymantaj nisqa karqa: Señor jurarqa, manataj jurasqanmanta kuyurerqachu. Qanqa wiñaypaj sacerdote kanki.

²² Chayrayku, Jesusqa astawan allin tratomanta garante churasqa karqa.

²³ Chay ujkunaqa ashkha sacerdotes karqanku, imaraykuchus paykunaqa wañuyrayku mana sayayta aterqankuchu.

²⁴ Kayrí, wiñaypaj sayasqanrayku sacerdote kaynenqa mana tukukuyta atinchu.

²⁵ Chayrayku payqa atin wiñaypaj salvayta, paynejta Diosman qayllakojkunata. Payqa kausallanqapuni paykunapaj Diosmanta mañapuspa.

²⁶ Chay jina jatun sacerdotepuni allin kanan karqa noqanchejpaj; ajllasqa mana juchayoj, llimphu, juchasapakunamanta t'aqasqa, janaj pachamanta nisqapis, aswan jatumpaj churasqa.

²⁷ Payqa mana chay waj kuraj sacerdotes jinachu. Paykunaqa sapa p'unchay ñaupajtaraj uywa wañuchisqasta jaywananku tiyan juchasninkurayku, qhepantataj aylloj juchasninrayku. Kayta Cristoqa uj kutillata wiñaypaj ruwarqa, pay kikin wañuyman qokuspa.

²⁸ Leyqa kuraj sacerdotesta churan pisi kallpayoj runasta. Diospa palabrantaj, juramentowan leymanta qhepataña, Churinta wiñaypaj sumaj allinchasqata churarqa.