Hebreos 6 - Qheshwa Biblia DC

^1-2 Chayrayku, Cristomanta qallariy yachachiykunata saqespa ñaupajman rina, aswan allin kajta tarinakama. Amaña parlanachu chay ñaupa juchamanta, Diosman kutirina kasqanmanta, wañusqa ruwasqasmanta, qallariypi jina, Diospi creenamanta ima; bautismospa yachachiyninmanta, makista churaykunamanta, wañusqakunaj kausarimuyninkumanta, chay wiñaypaj juicio p'unchaymantawan.

³ Kay tukuy imatapis ruwasunchej, cheqamanta Dios munajtenqa.

⁴ Manaña atinkuchu juchamanta kutiriyta, pikunachus uj kutita k'anchasqaña kaspa, janaj pacha Diospa qosqantapis jap'erqanku, Santo Espiritunejtapis chayaqepaj jap'erqanku.

⁵ Ajinallatataj Diospa allin palabrantapis rejserqanku, chay jamoj p'unchaykunaj atiynintawan.

⁶ Paykunaqa urmaspa manaña atinkuchu mosojyayta, juchasmanta kutirinankupaj; imaraykuchus paykunamantaqa ujtawan Diospa churinta chakatanku, p'enqaypitaj rikuchinku.

⁷ Ashkha kutita para yakuta ch'onqaj jallp'aqa, allin qhorata poqon llank'ajkunapaj, Diospa yanapaynintataj jap'in.

⁸ Ima jallp'achus khishkasta, qhasi qhorasta poqojqa, qhesachasqaña, maldicisqa kanampajtaj qayllapiña, tukukuynimpitaj ruphachisqa kanqa.

⁹ Munakusqasniyku, qankunamantaqa astawan jatuchaj sumaj imasta suyayku. Chaykunaqa salvaciompata kanku, chay jinata parlashajtiykupis.

¹⁰ Diosqa cheqan kaspa, mana qonqapunchu ruwasqasniykichejmanta, munakuyta rikuchisqaykichejmanta sutinrayku. Qankunaqa ajllasqasta yanaparqankichej, kunampis yanapashallankichejpuni.

¹¹ Munayku ari, sapa ujniykichej chay kikin k'uchi kayta rikuchinaykichejta tukukuykama, cheqatapuni suyay junt'akunampaj.

¹² Ama qhellas kaychejchu, astawanqa paykunamanta yachakuychej; pikunachus fewan, pacienciawantaj, Diospa qonasninta chayaqepaj jap'erqanku.

^13-14 Diosqa qosqayki nishajtin Abrahamman, mana jatun sutirayku jurayta atispa, pay kikin sutimpi jurarqa, nerqataj: Cheqamanta yanapaywan junt'achisqayki, mirachisqaykitaj ashkhata.

¹⁵ Abrahamqa, chay jina unayta pacienciawan suyakuspa, Diospa qonanta tarerqa.

¹⁶ Runasqa astawan kurajninkoj sutimpi juranku; juramentota oqharejtinkutaj tukuy ima churanaku tukukapun.

¹⁷ Chayrayku, Diosqa, imatachus qonan kasqanta chayaqeyojkunaman, aswan allinta rikuchinampaj, munaynintataj manapuni kuyuchinanta, juramentowan chaupincharqa.

¹⁸ Kay iskay mana kuyurikoj imasrayku, Diosqa manapuni atinchu llullakuyta. Chayrayku, sumajta sonqochakuspa jaku rina, ñaupaqenchejpi churasqa kashan chay suyaymanta jap'iykukunanchejpaj.

¹⁹ Chay suyaytaqa jap'inchej allin sayayta, thuruta, almaj sayachinata jina, mayqenchus warkhusqa veloj ukhunkama yaykun, chayta.

²⁰ Chay veloman, noqanchejrayku ñaupaykuspa yaykorqa, wiñaypaj kuraj sacerdote churasqa kaspa, Melquisedecpa t'aqanman jina.