Hebreos 5 - Qheshwa Biblia DC

¹ Sapa kuraj sacerdoteqa, runakuna ukhumanta ajllasqa, runakunaj allinnimpajtaj churasqa Diospa imasnimpi. Payqa rikuchikuta jaywan, uywa wañuchisqastapis juchasrayku.

² Mana yachajkunata, pantasqa kajkunatapis atin khuyakuyta, paypis pisi kallpawan p'achallisqa kasqanrayku.

³ Chayrayku, imaynatachus pay kikimpaj uywa wañuchisqasta jaywan; ajinallatataj runaspajpis jaywanan tiyan juchasrayku.

⁴ Manataj pipis pay kikimpaj allin sutita jap'inchu, manachus Dios wajyanman chayqa, Aaronta jina.

⁵ Ajinata Cristopis, mana pay kikinmantachu allin sutita jap'erqa kuraj sacerdote kanampaj. Kikin Diospuni payman nerqa: Qan Churiy kanki. Kunan p'unchay yumarqayki, nispa.

⁶ Wajnejpipis nillantaj: Qan wiñaypaj sacerdote kanki, Melquisedecpa t'aqanman jina.

⁷ Cristo aychallapiraj kashaspa mañakoj wañuymanta salvayta atejmanta, manchay qhapariywan, waqaywantaj; manchachikuywan qhaparisqanraykutaj uyarichikorqa.

⁸ Diospa Churin kashaspapis ñak'arisqanrayku, kasukuyta yachakorqa.

⁹ Allinchasqaña kaspa, tukuy payta kasojkunapaj wiñaypaj salvajnin churasqa karqa.

¹⁰ Diostaj kuraj sacerdoteta payta suticharqa, Melquisedecpa t'aqanman jina.

Qhawakuychej creeyta saqechejkunamanta

¹¹ Chaymantaqa ashkhata ninanchej tiyan, qankunataj qhellas kankichej uyarinaykichejpaj.

¹² Unaymantapacha creesqaykichejrayku, yachachejkunaña kanaykichej karqa; kunantaj watejmanta yachachinaraj kankichej, Diospa palabrampa qallariyninmanta. Qankunaqa lechellapajraj kankichej, mana khamuna mikhunapajrajchu.

¹³ Pichus lechellawanraj kajqa, cheqan kaj yachachiyta mana yachanrajchu, wawa kasqanrayku.

¹⁴ Khamuna mikhoyqa machu runaspajña, pikunachus yachasqaña kaspa, unanchanku allin kajta, sajra kajtapis sut'ita rejsispa.